2 Ey jun yakꞌomal servil naj Saúl chi yij Sibá, jix awteletej sattaj naj rey David tuꞌ. Jaꞌ yet jix apni ocoj, jix skꞌanlen naj tet jaxca tiꞌ:

—¿Jaach mi tiꞌ cha wij Sibá? ẍi tet.

—Jaaꞌ, jain ton jaach rey, ẍi naj Sibá tuꞌ.

3 Catuꞌ jix skꞌanlen tet naj jaxca tiꞌ:

—¿Ey tom wal junoj yicꞌaal naj Saúl eyecꞌoj, bꞌey chi skeꞌ jin colwa yin, yu jin jijen wunen jin wa kꞌane jix jin waꞌne can sattaj Jehová? ẍi naj.

Jix takꞌwi naj Sibá tet naj:

—Ey jun scꞌaal naj Jonatán, asan tol cꞌam yip yajan naj scaabꞌil, ẍi naj Sibá.

4 —¿Bꞌeytuꞌ eyoc naj xin? ẍi naj rey David.

—Jata tuꞌ ey naj bꞌey Lodebar, bꞌey sna naj Maquir scꞌaal Amiel, ẍi naj Sibá.

5-6 Jix lawi tuꞌ xin, catuꞌ jix yalon David tol chi too tit naj Mefi-bóset scꞌaal Jonatán, yitxiquin Saúl. Jaꞌ yet jix apni oc sattaj naj rey David, jix ey noan naj, yet chi xꞌoxon el sjijemal tet naj.

—Jaach tiꞌ cha wij Mefi-bóset, ẍi naj David.

—Jain ton tiꞌ, jaach rey, ẍi naj.

7 Jix yalon David tet naj jaxca tiꞌ:

—Cꞌam ojabꞌ chach xiwi, yutol xaan oj jaach wilaꞌ yu jin camcꞌulal yetoj Jonatán, naj ja mam. Oj wakꞌ masanil txꞌotxꞌ xꞌotxꞌ naj ja mam icham Saúl ey jaach, yetoj cꞌal pax oj, oj jaach low cꞌal wetoj bꞌey jin meẍa tiꞌ, ẍi naj David tet naj.

8 Jix ey noan naj Mefi-bóset, jix yalon jaxca tiꞌ:

—Jaach rey, ¿tzet wal yu, yuxan chi okꞌ ja cꞌul win, yutol jain tiꞌ laan jin jaxca junoj noꞌ camnaj txꞌiꞌ, tumi ey niꞌoj weloc apnoj an? ẍi naj.

9 Catuꞌ jix awtele naj Sibá tuꞌ yu naj, jaꞌton naj yakꞌomal servil naj Saúl yet peyxa:

—Jaꞌ masanil tzetyetal ey tet naj ja patrón yetoj cꞌal tet ebꞌ yuninal, pilan chi wakꞌcan tet jun yitxiquin naj tiꞌ. 10 Jaach tiꞌ oj jaach mulna sat txꞌotxꞌ tuꞌ, yetoj masanil ebꞌ ja cꞌaal yetoj cꞌal masanil ebꞌ ja wakꞌomal servil. Jaꞌ masanil tzet chi el sat txꞌotxꞌ oj ja yambꞌa oc yul junoj scꞌunaꞌil, yet watxꞌ chi oc yopiso yu ebꞌ yuninal naj Mefi-bóset tiꞌ. Jal pax naj xin, oj low cꞌal naj wetoj an, ẍi David tet naj.

Ey jolajonwan ebꞌ scꞌaal naj Sibá tuꞌ, catuꞌ ey juncꞌalwan ebꞌ yakꞌomal servil naj. 11 Catuꞌ jix takꞌwi naj Sibá jaxca tiꞌ:

—Jaꞌ masanil tzet cha chej jin waꞌne tiꞌ, oj jin waꞌne an, ẍi naj.

Jal pax naj Mefi-bóset xin, jaxca wal tol yuninal naj rey David jix yute can oc bꞌey sna, jatuꞌ chi low naj junjun cꞌu. 12 Ey jun scꞌaal naj Mefi-bóset tuꞌ yaliẍ to chi yij Micaías. Jaꞌ masanil ebꞌ eyecꞌ bꞌey sna naj Sibá tuꞌ, yakꞌomal servil naj Mefi-bóset yeoc ebꞌ. 13 Jaꞌ naj Mefi-bóset tuꞌ cꞌam yip yajan naj scaabꞌil, jaꞌ bꞌey Jerusalén caan naj, yuxan jaxa cꞌal tuꞌ chi low yetoj naj rey.