Jix Eyqꞌuey Ebꞌ Sirio Yetoj Cꞌal Ebꞌ Amonita
10
Jaꞌ yet jix bꞌey cꞌaltoj tiempo xin, jix cam naj chi yij Nahas, jaꞌton naj sreyal ebꞌ Amonita, jaxa jun scꞌaal chi yij Hanún jix oc can yin reyal sqꞌuexeloj. 2 Jix yalon naj David jaxca tiꞌ: Jaꞌ tinaniꞌ oj jin txꞌox jin watxꞌcꞌulal tet naj Hanún, jaxca jix jin yute scamcꞌulnen smam naj, ẍi naj. Jix yaontoj jaywan ebꞌ ẍejabꞌ naj rey David, yet chi too akꞌle smimanil scꞌul naj Hanún yu scamichal smam, jaꞌton naj Nahas. Jaxa wal jix yun xin, tol jaꞌ yet jix apni oc ebꞌ ẍejabꞌ David bꞌey sconobꞌ ebꞌ Amonita, 3 jaxa ebꞌ naj yaaw yeoc bꞌey jun conobꞌ tuꞌ, jix yal ebꞌ tet Hanún naj sreyal ebꞌ tuꞌ jaxca tiꞌ: ¿Tumi cha waoc yin ja cꞌul tol jaꞌ wan winaj jix ẍejtej naj rey David tiꞌ, tumi tucꞌal chi jul ebꞌ naj yakꞌ smimanil ja cꞌul yu scamichal naj ja mam tuꞌ cha naꞌ? ¿Chim la ja naꞌ tol miman xacꞌal yeloc apnoj naj ja mam tuꞌ yul sat naj rey David tuꞌ, jaach rey? ¡Jaꞌ jun rey tuꞌ, tol jix yatej wan ẍejabꞌ tiꞌ yet chi jul yilon ebꞌ naj tzet utbꞌil yili yul cu conobꞌ tiꞌ, catuꞌ oj jul yakꞌon lawoj ebꞌ naj! ẍi ebꞌ tet naj.4 Yu tuꞌ xin, jix yalon naj Hanún tuꞌ tol chi mitxꞌle ebꞌ yakꞌomal servil naj rey David tuꞌ, jix tzujle el nanoj xil stiꞌ ebꞌ naj, jix kꞌuple el yajantaj swex ebꞌ masantaꞌcꞌal yin ẍop ebꞌ, jix lawi tuꞌ jix chejle paxtoj ebꞌ naj yu ebꞌ. 5 Jaꞌ yet jix yabꞌen naj rey David jaxca tuꞌ, jix yaontoj wanxa ẍejabꞌ yet chi too chaꞌle ebꞌ naj, yutol caw wal chi qꞌuixwi ebꞌ, jix al-le tet ebꞌ tol chi cancan ebꞌ naj bꞌey Jericó masantaꞌcꞌal chi chꞌibꞌ xil stiꞌ ebꞌ, catuꞌ chi to skeꞌ meltzotej ebꞌ bꞌey Jerusalén.
6 Jaxa ebꞌ Amonita xin, jix naꞌcha el yu ebꞌ tol pena jix can ebꞌ yul sat naj rey David, yuxan jix toolane jun 20,000 soldado yet Siria ebꞌ bꞌey yul yet Bet-rehob cꞌal yul yet Sobá, cꞌal tet naj sreyal Maacá jix tit mil ebꞌ soldado, jix tit cꞌal pax 12,000 soldado bꞌey ebꞌ a Is-tob. 7 Jaꞌ jun tuꞌ, jix yabꞌoc naj David, yuxan jix chejletoj naj Joab yetoj cꞌal ebꞌ soldado yu naj. 8 Jix eltej ebꞌ Amonita, jix swaꞌnen oc sbꞌa ebꞌ yin jowal bꞌey stiꞌel sconobꞌ ebꞌ tuꞌ, yajbꞌan jaꞌ ebꞌ soldado yet Siria bꞌey yul yet Sobá, cꞌal ebꞌ jix tit bꞌey Rehob, cꞌal ebꞌ soldado yet Is-tob, cꞌal ebꞌ jix tit bꞌey Maacá, naat jix swaꞌne oc txolan sbꞌa ebꞌ bꞌey stiꞌel conobꞌ tuꞌ. 9 Jaxa yet jix yilon naj Joab xin, tol lalanxa sjul jun tujan soldado sattaj ebꞌ, cꞌal junxa tujan chi jul yintaj ebꞌ, jix sicꞌon el wan soldado tol caw jelan yakꞌon jowal, catuꞌ jix oc ebꞌ yakꞌon jowal yin ebꞌ a Sirio. 10 Jaxa wanxa ebꞌ soldado xin, jix yaoc yul skꞌabꞌ jun yuẍtaj chi yij Abisai, yet watxꞌ, jaꞌ ebꞌ tuꞌ chi too yakꞌ jowal yin ebꞌ Amonita. 11 Jix yalon tet ebꞌ jaxca tiꞌ: Ta tol jaꞌ ebꞌ a Sirio yel xacꞌal oj skeꞌ yu ebꞌ wintaj an, jaach tiꞌ oj jaach jul colwa wetoj an. Ta tol jaꞌ ebꞌ Amonita yel xacꞌal oj skeꞌ yu ja wintaj jaach tiꞌ, jain xa oj jin toj colwa ja wetoj. 12 Akꞌ ja wip xin, cu tecꞌbꞌa cu bꞌa yu cu colon el cu conobꞌ tiꞌ, jaon sconobꞌ jon cu Diosal tiꞌ. Yun ojabꞌ jaxca chi yoche scꞌul Jehová, ẍi naj Joab.
13 Jix too naj Joab yakꞌon jowal yetoj ebꞌ soldado, jix yakꞌon jowal ebꞌ yetoj ebꞌ soldado a Sirio, jix el ebꞌ sattaj naj Joab. 14 Jaꞌ yet jix yilon ebꞌ Amonita tol jix ela ebꞌ a Sirio, catuꞌ jix el cꞌal pax a ebꞌ sattaj Abisai, queytuꞌ jix yun yoctoj ebꞌ yul sconobꞌ scolon sbꞌa. Yu jun tuꞌ, yuxan jix sbꞌej naj Joab yakꞌon jowal yin ebꞌ Amonita, catuꞌ jix meltzotej ebꞌ bꞌey Jerusalén.
15 Jaꞌ yet jix yilon ebꞌ a Sirio tol jix eyqꞌuey ebꞌ yu ebꞌ Israel, jix syambꞌa oc sbꞌa ebꞌ junelxa. 16 Jix awteletej ebꞌ a Sirio yu naj rey Hadad-ézer, jaꞌton ebꞌ ey bꞌey junxa skꞌaxepal ecꞌtoj jaꞌ miman jaꞌ Éufrates, catuꞌ jix apni oc ebꞌ bꞌey conobꞌ Helam. Jaꞌ naj Sobac bꞌabꞌel sattaj ebꞌ, jaꞌton naj syaawil ebꞌ soldado yet naj rey Hadad-ézer. 17 Jaꞌ jun kꞌane tuꞌ, jix al-le tet naj rey David, yuxan jix syambꞌa oc ebꞌ soldado Israel, jix kꞌaxbꞌo ecꞌtoj ebꞌ yul jaꞌ Jordán, jix apni oc ebꞌ bꞌey conobꞌ Helam. Jaꞌ tituꞌ jix stecꞌbꞌa sbꞌa ebꞌ Sirio sattaj naj rey David, jix yakꞌon jowal ebꞌ. 18 Jaxa jix yun xin, jix el ebꞌ a Sirio tuꞌ sattaj ebꞌ Israel. Jix makꞌle cam jun 40,000 ebꞌ soldado eyoc yibꞌan che yu naj rey David, yetoj cꞌal jun 700 ebꞌ eyoc yul carruaje, catuꞌ jix cam cꞌal pax naj Sobac syaawil ebꞌ soldado yet conobꞌ Sirio yu naj. 19 Jaꞌ yet jix yilon masanil ebꞌ rey eyoc yetoj naj rey Hadad-ézer, tol jix eyqꞌuey ebꞌ yu ebꞌ soldado Israel, jix yaon oc sbꞌa ebꞌ yin watxꞌcꞌulal yetoj ebꞌ Israel, yuxan jix cancan ebꞌ yalan ẍejbꞌanil naj rey David. Jatax cꞌal yet tuꞌ jix xiw xacꞌal a ebꞌ a Sirio tuꞌ, yuxan cꞌamxa bꞌey jix colwa ebꞌ junelxa yin junoj jowal yetoj ebꞌ Amonita.