2 Jaꞌ yet jun yeycꞌualil xin, jix a waan naj David bꞌey sat xꞌat, catuꞌ jix atoj naj mujloj yibꞌan spananil spalacio. Jaꞌ yet lalan yecꞌ tꞌananoj naj tituꞌ, jix yilontoj yin jun ix ix naj tol lalan yaẍni ix, caw wal watxꞌ xacꞌal yili oc ix jix yiltoj naj. 3 Eyman jix ẍejtoj jun yakꞌomal servil naj, yet chi skꞌanlen mactxequel jun ix ix tuꞌ, catuꞌ jix al-le tet naj tol jaꞌ ix Betsabé scutzꞌin naj Eliam, ix yistil naj Urías, Hitita. 4 Eyman jix yatoj jun ẍejabꞌ David yet chi iꞌletej ix scꞌatan naj, catuꞌ jix wey naj yetoj ix. Jix lawi tuꞌ, jix sajbꞌanen sbꞌa ix, jix meltzo ix bꞌey sna.

5 Jaxa jix yunne jix oc can unin yin ix, yuxan eyman jix yatoj kꞌane ix tet naj rey David. 6 Jaꞌ yet jix yabꞌen oc naj rey David jun tuꞌ, jix yaontoj kꞌane tet naj Joab tol chi meltzotej naj Urías, Hitita. Jix sjije naj Joab jun chejbꞌanile tuꞌ. 7 Jaxa yet jix jul naj Urías sattaj naj rey, jix skꞌanlen naj ta watxꞌ scꞌul naj Joab yetoj ebꞌ soldado, catuꞌ tzet utbꞌil cꞌal yoc jowal tuꞌ. 8 Jix lawi tuꞌ, jix chejletoj naj bꞌey sna xewoj.

Jix cꞌal eltoj naj Urías yul sdespacho naj rey, catuꞌ jix aletoj sloꞌbꞌe naj tol caw watxꞌ xacꞌal scawxi. 9 Ma cꞌaltaꞌ too naj Urías tuꞌ bꞌey sna. Jatuꞌ jix cancan naj wey yetoj ebꞌ yet soldadoal chi teynen sdespacho naj rey tuꞌ. 10 Jaxa yet junxa cꞌual xin, jix al-le tet naj rey David tol jaꞌ naj Urías ma toj naj wey bꞌey sna yet jun akꞌbꞌal tuꞌ, yuxan jix skꞌanle tet naj jaxca tiꞌ:

—¿Tzet yu, yuxan ma jaach too wey bꞌey ja na, ilaꞌ tol ecꞌalxa cꞌual ja toocanoj? ẍi naj rey tet naj.

11 Jix takꞌwi naj Urías jaxca tiꞌ:

—¿Tumi oj ẍaꞌ jin cꞌul oj jin apnoj low bꞌey jin na cꞌal jin wey yetoj ix wistil? Ilaꞌ teꞌ Scaẍail Swa Kꞌane Jehová tinaniꞌ, cꞌal ebꞌ wet soldadoal a Israel, cꞌal ebꞌ a Judá, xajlaj teꞌ chꞌan eya yibꞌan ebꞌ naj, jacꞌalaꞌ naj jin yaawil Joab cꞌal ebꞌ yet yaawil, sat acꞌal chi wey ebꞌ naj. Cꞌam cꞌal chi kaltej jun tuꞌ jaach rey, cꞌam cꞌal chi ẍaꞌ jin cꞌul, tꞌinan tol watxꞌ cꞌal we bꞌey oj jin wey tiꞌ an, ẍi naj Urías.

12 Jix yalon naj rey David tet naj jaxca tiꞌ:

—Canan yet junxa akꞌbꞌal tiꞌ xin, yet yecal catuꞌ chach paxtoj bꞌey eyoc jowal tuꞌ, ẍi naj.

Catuꞌ jix cancan naj Urías junxa akꞌbꞌal tuꞌ bꞌey Jerusalén. 13 Jix awtele naj low yu naj rey David tuꞌ, catuꞌ jix akꞌle an yucꞌ naj sicꞌlebꞌil. Jix qꞌueyel scꞌul naj Urías tuꞌ yu teꞌ an tuꞌ, jaxa jix yunne, ma toj naj wey bꞌey sna, jacꞌal tuꞌ jix can naj wey yetoj ebꞌ yet soldadoal tuꞌ junelxa.

14 Jaxa yet jix kꞌinibꞌi a yet junxa cꞌual, jix stzꞌibꞌentoj jun carta naj rey David tet naj Joab, jix yiꞌontoj jun an carta tuꞌ naj Urías. 15 Jix yalontoj naj yul an jaxca tiꞌ: Awej oc naj Urías sattaj bꞌey caw jow yakꞌon jowal tuꞌ, catuꞌ chex el scꞌatan yet watxꞌ chi cami, ẍi naj rey David tuꞌ yin an carta tuꞌ.

16 Yu tuꞌ xin, jaꞌ yet jix sjoyon oc sbꞌa naj Joab yetoj soldado yin jun conobꞌ tuꞌ, jaꞌ bꞌey eyecꞌ ebꞌ scajat ebꞌ tol caw wal jelan yakꞌon jowal, jatuꞌ jix oc naj Urías yu naj Joab. 17 Jaxa jix eltej wan scajat ebꞌ tuꞌ yul sconobꞌ yin ebꞌ yet Joab, ey ebꞌ soldado jix cami, catuꞌ jix cam naj Urías xol ebꞌ naj tuꞌ.

18 Yu jun tuꞌ, eyman jix yatoj ẍejabꞌ naj Joab tet naj rey David, yu yalon tzet jix yun yeloc jun jowal tuꞌ. 19 Jix yalon naj tet jaxca tiꞌ: Jaꞌ yet oj lawoj ja walon tet naj rey yu tzet jix yun yoc jowal tuꞌ, 20 tala chi tit sjowal naj catuꞌ chi yalon jaxca tiꞌ: ¿Tzet wal yuxan jix je jitztoj je bꞌa scꞌatan ebꞌ je cajat tuꞌ? ¿Tumi man je yotaj oj xin, tol subꞌo skꞌojon eytej junoj tzetyetal ebꞌ je yin bꞌey yibꞌan smuroal conobꞌ tuꞌ? 21 ¿Tumi man je yabꞌnaj oj skꞌumal xin, yu tzet jix yun jun ix ix bꞌey Tebés, tol jix skꞌojeytej jun chꞌen ẍꞌenal molino ix yibꞌan sjolom naj Abimélec scꞌaal Jerubaal? Tol oj wal ma je jitztoj je bꞌa, ta ẍi naj, catuꞌ cha waloni tol jix cam cꞌal pax naj Urías, Hitita, ẍi naj Joab tet naj.

22 Catuꞌ jix tit jun chejabꞌwom tuꞌ xin, jix yalon tet naj rey David jaxca jix yun yalon naj Joab tuꞌ.

23 Jix yalon tet naj rey David jaxca tiꞌ:

—Caw wal jow jix yun yelol ebꞌ cu cajat tuꞌ kin jon, ian wal jix cu eyqꞌuey yu ebꞌ jon, asan xin, jix meltzo ebꞌ yintaj cu jon, masantaꞌcꞌal jix cu apni oc tzajan yintaj ebꞌ bꞌey spuertail conobꞌ tuꞌ. 24 Jaxa yibꞌan smuroal conobꞌ tuꞌ, jaꞌ tituꞌ eyatoj ebꞌ soldado, catuꞌ jix julwatej ebꞌ yin ebꞌ naj ja soldado tuꞌ, queytuꞌ jix yun scam jaywan ebꞌ naj, jix cam cꞌal pax naj Urías, Hitita, ẍi jun naj chejabꞌwom tuꞌ.

25 Jix yalon naj rey David tet jun chejabꞌwom tuꞌ jaxca tiꞌ:

—Al tet naj Joab tol cꞌam ojabꞌ chi oc naj yin sbꞌiscꞌulal yu jun tuꞌ. Quey cꞌaltaꞌ tuꞌ yakꞌon jowal, ey cꞌaltaꞌ mactxequel chi cami. Cꞌam ojabꞌ chex oc tucanoj, tol yelcꞌulal che yakꞌ je yip, masantaꞌcꞌal chi eyqꞌuey ebꞌ je yu, ja chi tet naj Joab tuꞌ, ẍi naj rey David tet jun chejabꞌwom tuꞌ.

26 Jaꞌ yet jix yabꞌen oc ix yistil naj Urías tol jix cam naj yichamil ix yin jowal, jix oc ix yin cuscꞌulal yu yichamil tuꞌ. 27 Jaꞌ yet jix lawi yecꞌtoj jun scuscꞌulal ix tuꞌ xin, jaxca ta sbꞌeybꞌal ebꞌ, catuꞌ jix yalon naj rey David tol chi tit ix bꞌey sna naj, jix yaon oc yistiloj, catuꞌ jix ali jun yuneꞌ ix. Asan xin, ma ẍaꞌ scꞌul Jehová jun tzet jix yun naj rey David tuꞌ.