—Ey cawan winaj bꞌey yul jun conobꞌ; ey jun naj caw wal bꞌeom, jal junxa naj xin caw mebꞌa naj. 2 Jaꞌ jun bꞌeom tuꞌ caw ecꞌal sbꞌisil smeꞌ, ey cꞌal pax swacax. 3 Jal pax naj mebꞌa tuꞌ xin, jun chꞌan kꞌetxan smeꞌ naj, tol manbꞌil yu, catuꞌ jaꞌ jix ilon chꞌibꞌoj. Jatuꞌ jix chꞌibꞌa noꞌ yul sna yetoj ebꞌ unin. Jaꞌ tzet chi sloꞌ naj yul sna, jaꞌ chi yakꞌ tet noꞌ; jaꞌ yul svaso bꞌey chi yucꞌ jaꞌ, jatuꞌ chi yucꞌ jaꞌ noꞌ. Jaꞌ bꞌey xaamscꞌul, jatuꞌ chi wey noꞌ, caw wal ochebꞌil noꞌ yuneꞌ meꞌ tuꞌ yu; jaxca wal scutzꞌin yeoc noꞌ. 4 Jaxa yet junxa cꞌual xin, jix apni oc jun swatxꞌil ánima jun bꞌeom tuꞌ scꞌatan. Jaꞌ jun bꞌeom tuꞌ ma cꞌal smitxꞌ junoj noꞌ smeꞌ tuꞌ, caw tol yaꞌ yel yu, yuxan jaꞌ noꞌ jun chꞌan qꞌuetxan yet jun naj mebꞌa tuꞌ, jaꞌ jix bꞌet yakꞌ titoj. Jaꞌ jix yakꞌ ẍiꞌ jun mactxequel eyecꞌ scꞌatan tuꞌ, ẍi Natán tet naj.

5 Jaꞌ yet jix yabꞌen naj rey David jun kꞌane tuꞌ, caw jix tit sjowal naj sicꞌlebꞌil. Jix yalon tet naj Natán jaxca tiꞌ:

—Sattaj wal Jehová Dios chi walon an, jaꞌ jun mactxequel chi uten jaxca tuꞌ, smoo wal chi cami. 6 Catuꞌ sowalil chi yakꞌ cancꞌonoj sqꞌuexel noꞌ yuneꞌ meꞌ tuꞌ, yutol jaꞌ jun winaj tuꞌ cꞌam chi okꞌ niꞌoj scꞌul yin yet animail, ẍi naj.

7 Jix yalon naj Natán jaxca tiꞌ:

—Jaꞌ jun chi wal tuꞌ, jaach toni. Jaꞌ Jehová cu Diosal jaon Israel jon tiꞌ chi yal ey jaach jaxca tiꞌ: Jain jix jaach waoc sreyaloj Israel, jix jaach jin colon el bꞌey yul skꞌabꞌ naj Saúl. 8 Jix wakꞌ sna cꞌal ix yistil naj ja waawil tuꞌ yul ja kꞌabꞌ, catuꞌ jix jaach waon oc sreyaloj conobꞌ Israel cꞌal Judá. Tumi txenne yeoc wan tuꞌ cha wabꞌe, jix wakꞌon tocꞌal wanxa ey jaach an. 9 ¿Tzet yu, yuxan jix ja wintajne can el jin chejbꞌanil, jix ja wun tzetyetal tol cꞌam chi ẍaꞌ jin cꞌul? Jix ja makꞌ cam naj Urías, Hitita, yu yespada ebꞌ Amonita, catuꞌ jix ja waon oc ix yistil naj tuꞌ ja wistiloj. 10 Yu cꞌal jun tuꞌ, yuxan ey cꞌal mactxequel oj makꞌle cam xol ebꞌ ja wicꞌaal, yutol jix jin ja wintajne can eloj, jix ja waon oc ix yistil naj Urías, Hitita ja wistiloj. 11 Jain Jehová jin chi walaꞌ: Jaꞌ xol ebꞌ ja wuninal oj pitzcꞌu eltej spenail. Ja sattaj wal oj wiꞌon eltej ebꞌ ix ja wistil catuꞌ oj wakꞌon ebꞌ ix tet junoj ebꞌ ja cꞌaal, catuꞌ oj wey ebꞌ yetoj ebꞌ ix yet cꞌualil. 12 Jaach tiꞌ, ewantaj jix ja wun jun spenail tuꞌ, jaxa jin jain tiꞌ xol wal sajkꞌinal yet cꞌualil oj jin txꞌoxon el sattaj conobꞌ Israel, ẍi Jehová, ẍi naj Natán.

13 Yu jun tuꞌ, jix stakꞌen oc naj rey David smuloj sattaj naj Natán, jix yalon naj jaxca tiꞌ:

—Yel ton wal bꞌian, jix oc jin penail tet Jehová.

Catuꞌ jix yalon naj Natán jaxca tiꞌ:

—Caw yel toni, oj oc syaꞌilal ja wibꞌan, asan xin, oj yakꞌ mimancꞌulal Jehová yibꞌan ja penail tuꞌ, yuxan man oj jaach cam xacꞌal yu. 14 Syaꞌiloj cꞌal jun jix ja wun tiꞌ, yuxan chi yal pena kꞌane ebꞌ chi jowi oc yin Jehová, yuxan oj cam jun ja cꞌaal tol to jix ali tuꞌ, ẍi naj Natán.

15 Jix lawi tuꞌ, catuꞌ jix paxtoj naj Natán bꞌey sna.

Jaxa jix yun xin, jix ale oc syaꞌilal jun scꞌaal naj David tuꞌ yu Jehová, jaꞌton jun scꞌaal naj jix ali yetoj ix yistil naj camom Urías. 16 Jix lawi tuꞌ, catuꞌ jix oc ian naj rey David skꞌanon tet Jehová tol chi waꞌxi scꞌul naj unin tuꞌ. Jix yijle nocha sbꞌa naj, jaxa sat txꞌotxꞌ chi wey naj. 17 Jantaj ebꞌ naj icham winaj yeoc yul conobꞌ chi mulna yetoj naj, chi oc wal tean ebꞌ yin naj tol chi a waanoj, jal naj xin, cꞌamxa chi yal scꞌul chi a waanoj, ma xacꞌal low naj yetoj ebꞌ.

18 Jaꞌ yet sjuj cꞌualxa smichꞌcha oc naj unin tuꞌ, catuꞌ jix cam naj. Caw wal jix xiw ebꞌ smulnawom naj rey David tuꞌ yalon tet, yutol chi snaꞌ ebꞌ: Tol tax cꞌam chi yabꞌ naj tzet chi kal yet iquisto ecꞌ naj unin tiꞌ, jaxca tam wal chi kal tet naj tol jix cam naj unin tiꞌ, txꞌojxam chi yute sbꞌa, ẍi ebꞌ naj.

19 Jix yabꞌen naj rey David yet chi sason ebꞌ skꞌanabꞌi, jix naꞌcha el yu naj tol jix cam naj unin tuꞌ, yuxan jix skꞌanle naj tet ebꞌ jaxca tiꞌ:

—¿Tumi jix cam naj unin tuꞌ xin? ẍi naj tet ebꞌ.

—Jix camel naj, ẍi ebꞌ tet naj.

20 Jaꞌ yet jix yabꞌen naj jaxca tuꞌ, catuꞌ jix a waan bꞌey sat txꞌotxꞌ tuꞌ, jix aẍni, catuꞌ jix yaon atoj yanil xil sjolom, jix sqꞌuexon el spichil, jaxa yoc yin eyilal bꞌey yul snail scalubꞌal Jehová. Jix lawi tuꞌ catuꞌ jix too skꞌanon low sbꞌa bꞌey yul sna, catuꞌ jix lowi. 21 Jaxa ebꞌ smulnawom naj jix kꞌanlen tet jaxca tiꞌ:

—¿Tzet yu, yuxan jaxca tuꞌ cha wute ja bꞌa, jaach rey? Jaꞌ yet iquisto ecꞌ naj unin tiꞌ, jix ja wijle nocha ja bꞌa catuꞌ chach okꞌ yu naj; jaxa yet jix cam naj, jix jaach a waan lowoj, ẍi ebꞌ tet naj.

22 Jix takꞌwi naj tet ebꞌ jaxca tiꞌ:

—Jaꞌ yet iquisto ecꞌ naj unin tuꞌ chin okꞌ yu naj, catuꞌ jix wijle nocha jin bꞌa, jaꞌ jin naꞌoni tala chi to okꞌ scꞌul Dios win yetoj naj, yet cꞌam chi cam naj. 23 Jal pax tinaniꞌ xin, tuxa jix cam naj, ¿tzet to wal yu yuxan oj wijle nocha jin bꞌa? ¿tumi oj to pitzcꞌu a naj unin tiꞌ junelxa? Jain xa tiꞌ oj jin apnoj oc bꞌey jix too naj tuꞌ, jal naj xin ma xa skeꞌ tol oj jul naj junelxa, ẍi naj tet ebꞌ.

24 Jix lawi tuꞌ, jix too naj David scꞌatan ix Betsabé yet chi smimancꞌulneni, catuꞌ jix wey naj yetoj yistil tuꞌ, catuꞌ jix ali junxa yuneꞌ ix yetoj naj, jix yakꞌon yij sbꞌi Salomón. Jaꞌ naj unin tuꞌ, caw jix camcꞌulnele yu Jehová. 25 Yu tuꞌ xin, catuꞌ jix chejletoj naj Natán yu Jehová, yet chi yalon tet naj rey David tol camcꞌulnebꞌil jun unin tuꞌ yu. Yu jun tuꞌ, yuxan Jedidías,^a jix yij sbꞌi jun unin tuꞌ yu naj David.

26 Yajbꞌan tuꞌ xin, jix oc naj Joab yakꞌon jowal yin ebꞌ Amonita caan bꞌey conobꞌ Rabá. Jaꞌ yet tuxa wal chi eyqꞌuey jun conobꞌ tuꞌ yu, 27 jix yaontej kꞌane tet naj rey David jaxca tiꞌ: Lalan wakꞌon jowal yin conobꞌ Rabá, jix wiꞌecꞌ wan scuartel ebꞌ soldado chi teynen jaꞌ jaꞌ chi skꞌan ebꞌ ánima. 28 Yu tuꞌ xin, jaꞌ tinaniꞌ jaach rey, yambꞌa oc masanil ebꞌ ja soldado ja wetoj. Catuꞌ chach tit ja wakꞌon jowal yetoj jun conobꞌ tiꞌ, catuꞌ cha majon can ocoj. Ta jain chi wakꞌ jowal yin jun conobꞌ tiꞌ, catuꞌ chi wiꞌon can ocoj, jaxa tala chi yunne, tol jain xacꞌal chi bꞌina jin bꞌi yin, ẍi naj Joab tuꞌ.

29 Catuꞌ jix syambꞌa oc masanil ebꞌ soldado naj rey David, jix too yakꞌon jowal ebꞌ yin conobꞌ Rabá. Jix eyqꞌuey yu ebꞌ, catuꞌ jix yiꞌon oc jun conobꞌ tuꞌ. 30 Jix lawi tuꞌ, jix iꞌle el scorona jun rey tuꞌ yin sjolom yu naj David. Ey mi oxebꞌoj arroba yalil, caw ecꞌal wan chꞌen chꞌen eyoc yelawiloj. Jaꞌ jix oc scoronaoj naj rey David tuꞌ. Ey cꞌal pax wanxa tzetyetal tol caw ey stool jix yiꞌeltej ebꞌ bꞌey jun conobꞌ tuꞌ. 31 Jix iꞌle eltej masanil ebꞌ ánima caan bꞌey conobꞌ tuꞌ, jix ale oc ebꞌ yin mulnail yetoj chꞌen serrucho, yetoj chꞌen piocha, yetoj cꞌal chꞌen eche. Jix ale cꞌal pax oc ebꞌ yin nuso ladrillo yul jorna. Quey cꞌal tuꞌ jix yute masanil junjun conobꞌal ebꞌ Amonita tuꞌ. Jix lawi tuꞌ xin, jix meltzotej naj David yetoj masanil ebꞌ soldado bꞌey Jerusalén.