Skꞌaneal Naj Amnón Yetoj Ix Tamar
13
Ey jun scꞌaal naj rey David chi yij Absalón, ey jun yanabꞌ naj chi yij Tamar, caw sakꞌal xacꞌal yili ix. Jaxa jix yun xin, ey junxa scꞌaal naj David chi yij Amnón, jix yaoc snaꞌbꞌal naj yin ix. 2 Jaꞌ naj Amnón tuꞌ, caw jix yaꞌbꞌi xacꞌal ey naj yet chi yaon oc snaꞌbꞌal yin ix Tamar, ix scaabꞌ yanabꞌ naj tuꞌ. Yutol caw kꞌopoto ix to ix, cꞌamto junoj winaj chi kꞌanabꞌ yetoj ix, yuxan jix snaꞌ naj tol man comonoj xacꞌal chi sjijetoj ix tzetyetal oj yal naj. 3 Jaꞌ naj Amnón tuꞌ ey jun swatxꞌil ánima naj caw jelan snaꞌbꞌal yin spenail, jaꞌton jun chi yij Jonadab. Jaꞌ jun tuꞌ scꞌaal Simá, yuẍtaj naj rey David. 4 Ey jun cꞌual jix skꞌanle naj Jonadab tet naj jaxca tiꞌ: ¿Jaach scꞌaal rey, tzet chach ioni? ¿Tzet yuxan junjun cꞌal cꞌu caw chi tzꞌonbꞌitoj yili ja sat? ¿Tzet yuxan cꞌam cha wal ey jin, tzet chach ioni? ẍi naj.Catuꞌ jix takꞌwi naj Amnón tet jaxca tiꞌ:
—Caw wal chi woche oc ix Tamar, ix scaabꞌ wanabꞌ tuꞌ an, ix yanabꞌ naj scaabꞌ wuẍtaj Absalón, ẍi naj Amnón tuꞌ.
5 Catuꞌ jix yalon naj Jonadab tet naj jaxca tiꞌ:
—Jaꞌ tinaniꞌ aantoj telan sat ja txꞌat, catuꞌ cha lanon yaꞌbꞌoj ey ja bꞌa. Jaꞌ yet oj apnoj oc naj ja mam tuꞌ jaach yiloni, catuꞌ cha walon tet naj, chin kꞌan wal ey jaach an, tol chi el wal yin ja cꞌul tol cha chejtej ix wanabꞌ Tamar jin cꞌatan an, yet chi jul ix swaꞌnen niꞌoj jin loꞌbꞌe, jaꞌcaw ix chi jul waꞌnen ey jin, yet watxꞌ oj jin loꞌ niꞌoj loꞌbꞌe tuꞌ an, ja chi tet naj ja mam tuꞌ, ẍi naj Jonadab tet naj Amnón.
6 Queytuꞌ jix yun yatoj telan naj Amnón tuꞌ bꞌey sat xꞌat, jix slanon yaꞌbꞌoj ey sbꞌa naj. Jaꞌ yet jix apni oc naj rey tuꞌ yilon jun scꞌaal tuꞌ, jix yalon naj Amnón tuꞌ tet smam jaxca tiꞌ:
—Chin kꞌan wal ey jaach an mamin, tol oj wal chi el yin ja cꞌul tol cha chejtej ix wanabꞌ Tamar jin cꞌatan an, yet chi jul ix swaꞌnen niꞌoj jin loꞌbꞌe ix, jaꞌcaw ix chin jul akꞌon lowoj, ẍi naj.
7 Jaꞌ yet jix apni oc naj rey David bꞌey sna, jix yalon tet ix Tamar jaxca tiꞌ:
—Jaꞌ tinaniꞌ, asiꞌ bꞌey sna naj ja no Amnón, yet chi too ja waꞌnen niꞌoj sloꞌbꞌe naj, ẍi naj tet scutzꞌin tuꞌ.
8 Queytuꞌ jix too ix Tamar bꞌey jun sno tuꞌ, telan atoj naj sat xꞌat yet jix apni oc ix scꞌatan naj. Jix scalon a ixim jarina ix, jaꞌ tituꞌ jix swaꞌne ix yin panil. 9 Eyman jix yiꞌtej jun chꞌen ẍaltin ix, jix swaꞌnen jun loꞌbꞌe tuꞌ ix, jix secon eltej ix yul jun ẍaltin tuꞌ, jaxa naj Amnón tuꞌ xin, ma yal scꞌul naj chi lowi, jix yalon naj tol chi eltoj masanil ebꞌ ánima eyecꞌ yetoj bꞌey yul sna tuꞌ. 10 Jaꞌ yet jix eltoj masanil ebꞌ bꞌey stiꞌ na tuꞌ, jix yalon naj Amnón tuꞌ tet ix Tamar jaxca tiꞌ:
—Jaach wal caw cha wiꞌtej jin loꞌbꞌe tuꞌ bꞌey ey jin ecꞌ tiꞌ an, ẍi naj tet ix.
Queytuꞌ jix yun yiꞌontoj jun loꞌbꞌe ix Tamar bꞌey sat xꞌat sno tuꞌ. 11 Jaꞌ yet jix apni oc ix yetoj jun loꞌbꞌe tuꞌ yet chi low naj tuꞌ yaloni, catuꞌ jix oc mitxꞌan naj yin ix, jix yalon naj tet ix jaxca tiꞌ: Jaach wanabꞌ, titan jin cꞌatan an, weyan wetoj an, ẍi naj tet ix.
12 Jix takꞌwi ix tet naj jaxca tiꞌ:
—Cꞌamaj jaach no, cꞌam ojabꞌ chin ja wakꞌ pural, yutol jaꞌ jun tiꞌ cꞌam bꞌey chi yun cu xol jaon Israel jon tiꞌ, yutol yel xacꞌal quixwiltaj jun bꞌeybꞌale jaxca tuꞌ. 13 ¿Bꞌeytuꞌ oj toj webꞌa oc el jin bꞌa yetoj jun jin qꞌuixwilal tuꞌ? Jaxa jaach tiꞌ, jaxca xacꞌal junoj suc ánima cha wun can xol cu conobꞌ tiꞌ. Jaꞌ tinaniꞌ, chi wal ey jaach tol cha wal tet naj rey, jaꞌ ojabꞌ naj chin akꞌon ey jaach,a ẍi ix tet naj.
14 Jal naj Amnón tuꞌ xin, ma xacꞌal ẍaꞌ naj yabꞌ tzet jix yal ix. Jix yakꞌ xacꞌal pural naj yoc lacan yin ix, yutol ecꞌbꞌan yip naj tet ix, queytuꞌ jix yun yetnele ix yu naj. 15 Jaꞌ yet jix lawi yetnele ix tuꞌ, jix tit sjowal scꞌul naj Amnón tuꞌ yin ix, yel xacꞌal jix tit sjowal naj yin ix, yintaj yet jix yaon oc snaꞌbꞌal naj yin ix, yuxan jix yal naj tet ix jaxca tiꞌ: Aan waanoj, catuꞌ chach paxtoj, ẍi naj tet ix.
16 Catuꞌ jix takꞌwi ix Tamar tet naj, jix yalon ix jaxca tiꞌ:
—Cꞌamaj jaach no, ta tol chin ja wujte eltoj tinaniꞌ an, yel xacꞌal pena yintaj jun tzetyetal jix ja wun win tiꞌ an, ẍi ix tet naj.
Ma xacꞌal ẍaꞌ yabꞌ naj Amnón tzet jix yal ix. 17 Jix yawte naj Amnón jun yakꞌomal servil, jix yalon naj tet tol chi ujtele eltoj ix stiꞌ na yu, catuꞌ chi majchele teꞌ smajil na tuꞌ yin eymanil.
18 Yuxan jix ujtele eltoj ix yu jun yakꞌomal servil tuꞌ bꞌey stiꞌ na, catuꞌ jix smajchen can spuertail na tuꞌ. Jaꞌ ix Tamar tuꞌ, caw watxꞌ yili an spichil ix eyocoj, jaxca cꞌaltaꞌ yili an spichil ebꞌ kꞌopo ix scutzꞌin ebꞌ rey chi yaocoj. 19 Jix yaon atoj stikꞌakꞌil taan ix yibꞌan sjolom, jix stzilontoj spichil ix eyocoj, jix yaon oc skꞌabꞌ ix yin sat, jix okꞌ ix yet jix too yul-laj bꞌe. 20 Catuꞌ jix skꞌanlen naj Absalón tet ix, jaꞌton naj sno ix:
—¿Tumi wal jix jaach yetne naj ja no Amnón tuꞌ? Ta tol jaxca tuꞌ jaach wanabꞌ, tzꞌin ojabꞌ cꞌal ja chi. Cꞌam ojabꞌ chach oc yin bꞌiscꞌulal yu jun tuꞌ, yutol caw ja no naj.
Yuxan jix cancan ix Tamar tuꞌ yin cuscꞌulal bꞌey sna naj Absalón, jaꞌton naj sno ix tuꞌ. 21 Jaꞌ yet jix yabꞌen naj rey David masanil tzet jix yun jun scꞌaal tuꞌ, caw jix tit sjowal naj sicꞌlebꞌil, asan xin, cꞌam cꞌal tzet jix yal tet naj Amnón tuꞌ, yutol caw xaan jun scꞌaal naj tuꞌ yu. 22 Jal pax naj Absalón xin, cꞌam cꞌal pax tzet jix yal tet Amnón tuꞌ, tucꞌal caw ey sjowal scꞌul yin, yutol jix etnele ix Tamar yu jun yuẍtaj tuꞌ.
Makꞌbꞌil Cam Naj Amnón Yu Naj Absalón
23 Caabꞌxa abꞌil tuꞌ, jaꞌ yet junel lalan stzujon el meꞌ ebꞌ naj yakꞌomal servil naj Absalón bꞌey txꞌotxꞌ Baal-hazor, bꞌey scawilal conobꞌ Efraín. Jaꞌ yet tuꞌ jix awtele masanil ebꞌ scꞌaal naj rey yin jun miman loꞌo jix oc yu naj Absalón. 24 Jix bꞌet iꞌle cꞌal pax naj rey yu naj Absalón tuꞌ, jix yalon naj jaxca tiꞌ:
—Jaꞌ tinaniꞌ, lalan stzujle noꞌ jin meꞌ yu ebꞌ naj jin mulnawom an. Chi woche an, jaach rey, tol chach too wetoj yetoj masanil ebꞌ naj ja wakꞌomal servil.
25 Jix takꞌwi naj rey, jix yalon jaxca tiꞌ:
—Cꞌamaj jaach cꞌaal, cꞌam chi skeꞌ cu too cu masanil ey jaach tuꞌ. Cꞌam chi woche tol miman xacꞌal tumin chi lawi ja wu, ẍi naj David.
Caxcꞌal jix oc cꞌal tean naj Absalón tuꞌ yin naj rey, caw ma cꞌaltaꞌ yal scꞌul naj jix too yetoj scꞌaal tuꞌ, asan tucꞌal jix yal watxꞌ kꞌane naj yibꞌan jun scꞌaal tuꞌ.
26 Jaxa naj Absalón xin, jix oc cꞌal ian naj yalon jaxca tiꞌ:
—Ta caw yel cꞌam chi skeꞌ ja too wetoj an xin, eloj wal yin ja cꞌul tol cha watoj naj wuẍtaj Amnón wetoj an, ẍi naj.
—¿Tzet yu, yuxan chi yoche ja cꞌul chi too naj ja wuẍtaj Amnón tuꞌ ja wetoj? ẍi naj rey tuꞌ tet naj Absalón.
27 Caw jix oc cꞌal tean naj Absalón tuꞌ yin naj rey, yuxan jix chaꞌletoj naj Amnón tuꞌ yetoj cꞌal wanxa ebꞌ yuẍtaj.
28 Jaꞌ yet cꞌamto chi too ebꞌ, jix yalon naj Absalón tet ebꞌ yakꞌomal servil, jaxca tiꞌ: Chi cam je yiloni, jaꞌ yet oj a teꞌ an sjolom naj Amnón tiꞌ, jaꞌ yet tuꞌ che makꞌon cam yin eymanil. Cꞌam cꞌal chex xiw je makꞌon camoj, yutol jain chi walaꞌ. Caw che tecꞌbꞌa je bꞌa, cꞌam ojabꞌ chex xiw je yuneni.
29 Yu jun tuꞌ xin, jix sjije ebꞌ tzet jix yal naj Absalón tuꞌ, jix makꞌle cam naj Amnón tuꞌ yu ebꞌ. Jix lawi tuꞌ, jix a waan masanil ebꞌ scꞌaal naj rey, junjun ebꞌ jix oc ebꞌ yibꞌan mula che, yin eymanil jix yun yela ebꞌ naj.
30 Jaꞌ yet eyto oc ebꞌ yul-laj bꞌe, yin eymanil jix apni oc skꞌumal tet naj rey David tol jix cam masanil ebꞌ scꞌaal yu naj Absalón, cꞌamxa junoj ebꞌ tuꞌ jix can yin yiquisal. 31 Yuxan jix a lemna naj rey, jix stzilontoj spichil, jix sbꞌejon ey telan sbꞌa naj sat txꞌotxꞌ, yu xꞌoxon eloj tol ey scuscꞌulal. Jaꞌ masanil ebꞌ yakꞌomal servil eyecꞌ tituꞌ jix stzil cꞌal pax toj spichil ebꞌ yetoj. 32 Jaꞌ naj Jonadab scꞌaal Simá, yuẍtaj naj rey David, jaꞌ jix alon tet naj jaxca tiꞌ:
—Cꞌam ojabꞌ cha naꞌ jun tuꞌ jaach rey. Cꞌam ebꞌ naj ja cꞌaal tuꞌ jix cam masanil, asan cꞌal naj Amnón jix cami, yutol jaxca tuꞌ jix yun snaꞌon naj Absalón yin, yu cꞌal tol jix etnele ix Tamar yu naj. 33 Yuxan cꞌam cha naꞌ jaach rey tol masanil ebꞌ naj ja cꞌaal jix cami, asanne naj Amnón jix cami, ẍi naj.
34 Jaꞌ yet jun txolan tuꞌ, jix ela naj Absalón. Jaxa naj eyoc steynemaloj conobꞌ yu naj rey jix too tꞌananoj, jix yilontoj tol ey jun bꞌulan ebꞌ ánima chi eytej yin scꞌul txꞌotxꞌ wonan bꞌey sbꞌeal Horonaim, jix too yalon tet naj rey.
35 Jix yalon Jonadab tet naj rey:
—Jaach rey, lalan sjul ebꞌ naj ja cꞌaal, jaxca wal jix yun walon jain ja wakꞌomal jin servil tiꞌ, ẍi naj.
36 Lalanto wal slawi skꞌanabꞌ naj Jonadab tuꞌ, jix apni oc ebꞌ scꞌaal naj rey tuꞌ. Jaꞌ yet jix apni oc ebꞌ naj tuꞌ, jix a yaw ebꞌ naj yokꞌi, jix okꞌ pax naj rey tuꞌ yetoj ebꞌ, yetoj cꞌal masanil ebꞌ yakꞌomal servil naj, caw jix okꞌ ebꞌ sicꞌlebꞌil. 37-38 Jaxa naj Absalón xin, jix ela naj. Jatuꞌ jix apni oc scꞌatan naj Talmai, scꞌaal naj Amihud, jaꞌton sreyal conobꞌ Guesur. Oxebꞌ abꞌil jix can naj tituꞌ. Jaxa pax naj rey David xin, okꞌil cꞌal ye naj junjun cꞌu yu jun scꞌaal tuꞌ. 39 Jaxa yet jix ecꞌtoj jun scuscꞌulal naj tuꞌ xin, chi yoche xacꞌal scꞌul chi yil yin Absalón.