Jix lawi tuꞌ, jix yalon wan kꞌane naj Joab tet ix tol chi yal tet naj rey tuꞌ. 4 Jix lawi tuꞌ xin, catuꞌ jix too jun ix a conobꞌ Tecoa tuꞌ sattaj naj rey, yin yeynajil jix yun yapni oc ix sattaj naj, jix ey noan ix sat txꞌotxꞌ, jix yalon ix tet naj rey jaxca tiꞌ:

—Colwaanwej wetoj an, jaach rey, ẍi ix tet naj.

5 —¿Tzet chach iꞌon txo ix? ẍi naj.

Jix takꞌwi ix ix tuꞌ tet naj jaxca tiꞌ:

—Caw jin txꞌojli xacꞌal, yutol camnajxa wichamil an. 6 Ey cawan ebꞌ naj wuneꞌ an. Ey junel jix too ebꞌ naj yin mulnail. Jaꞌ xol mulnail tuꞌ jix a jowal yu ebꞌ naj, cꞌam junoj mac jix poꞌon snan ebꞌ, yuxan jix makꞌle xacꞌal cam jun naj yu yuẍtaj tuꞌ. 7 Jaxa tinaniꞌ, masanil ebꞌ wican caw chi el sjowal ebꞌ win an, chi yoche ebꞌ chi waoc naj jix smakꞌ cam yuẍtaj tuꞌ yul skꞌabꞌ ebꞌ, yet chi makꞌle cam naj yu ebꞌ, yu spajtzebꞌal scamichal jun naj jix cam tuꞌ. Jaxca tuꞌ chi yoche ebꞌ, yet watxꞌ cꞌamxa mactxequel chi iꞌon can oc smajul stzetyetal smam ebꞌ wuneꞌ tuꞌ. Chi yoche ebꞌ chin can jaxca tuꞌ, catuꞌ cꞌamxa chi yoche ebꞌ chi bꞌinale ecꞌ sbꞌi naj camom wichamil sat txꞌotxꞌ txꞌotxꞌ tiꞌ, ẍi ix tet naj rey tuꞌ.

8 Jix takꞌwi naj rey tet ix jaxca tiꞌ:

—Asiꞌ bꞌey ja na, jain oj wil tzet oj yun jin colwa ja win yu jun cha wal ey jin tiꞌ, ẍi naj rey tet ix.

9 Jix takꞌwi ix tet naj jaxca tiꞌ:

—Jaach rey, jaꞌ spenail naj wuneꞌ tiꞌ, tit ojabꞌ can wibꞌan yetoj cꞌal yibꞌan ebꞌ wican masanil, cꞌam ojabꞌ chi tit can ja wibꞌan, cꞌal yibꞌan bꞌey cha wakꞌ yaawilal tiꞌ, ẍi ix tuꞌ.

10 Jix yalon pax naj rey tet ix jaxca tiꞌ:

—Jaꞌ mactxequel chi yoche chach yetnen tuꞌ, cha wiꞌtej ey jin tiꞌ an, yet watxꞌ manxa oj jaach yetne cꞌal ebꞌ, ẍi naj tet ix.

11 Jix oc cꞌal tean ix yin naj rey tuꞌ, jix yalon ix jaxca tiꞌ:

—Chin oc wal tean ja win jaach rey, tol cha kꞌan tet Jehová cu Diosal, yutol jaꞌ ebꞌ wican chi yoche chi spajtze scamichal naj wuneꞌ tuꞌ an, cꞌam ojabꞌ chi yaoc snaꞌbꞌal ebꞌ smakꞌon cam junxa wuneꞌ tiꞌ, ẍi ix.

Catuꞌ jix yalon naj rey tet ix jaxca tiꞌ:

—Sattaj wal Jehová chi wakꞌon can jin tiꞌ, tol cꞌam cꞌal tzet oj iꞌon naj ja wuneꞌ tuꞌ, ẍi naj tet ix.

12 Jix oc cꞌal ian ix ix tuꞌ yalon jaxca tiꞌ:

—Eloj wal yin ja cꞌul jaach rey, tol cha chaꞌ ja wabꞌ junxa kꞌane oj wal ey jaach tiꞌ, ẍi ix tuꞌ.

—Al ey jin tzet chi yoche ja cꞌul, ẍi naj rey tet ix.

13 Catuꞌ jix skꞌanlen ix ix tuꞌ jaxca tiꞌ:

—¿Jaach rey, tzet yuxan jaxca tuꞌ cha wun yin ebꞌ sconobꞌ Dios? Jaxca jix yun ja waloni, tol ja wibꞌan oj tit canoj, yu cꞌam cha chaꞌ meltzo naj ja cꞌaal xiwnaj cantoj naat. 14 Yutol cu masanil oj cu cam cꞌaltaꞌa. Laan jon jaxca jaꞌ jaꞌ chi maltoj sat txꞌotxꞌ, cꞌamxa chi skeꞌ cu yambꞌan aoj, jaꞌ Dios cꞌam chi yiꞌel skꞌinal ebꞌ ánima. Jaꞌ tiꞌ yet, tol chi yoche chi seyle tzet chi yun smeltzotej mactxequel naat eycantoj. 15 Jaꞌ tinaniꞌ xin, jaach rey, jix jin jul wal wan tiꞌ ey jaach an, yutol jaꞌ ebꞌ ánima chin xibꞌten aoj. Yu jun tuꞌ, yuxan jix jin naꞌ tol chin jul kꞌanabꞌ ja sattaj, yuxan tala cꞌuxan cha chaꞌ ja wabꞌ tzet chin kꞌan ey jaach tiꞌ. 16 Yuxan, ta tol cha chaꞌ ja wabꞌ tzet chi walaꞌ, chi skeꞌ jin ja colon el yul skꞌabꞌ mactxequel chi ochen chin qꞌueyon el yetoj wuneꞌ bꞌey sat txꞌotxꞌ txꞌotxꞌ jix yakꞌ Dios ey jon tiꞌ. 17 Jain tol ja wakꞌomal servil weoc tiꞌ, chi wechbꞌane tzet oj yun ja pajtzen ey jin, yet watxꞌ cꞌamxa tzet oj jin naꞌ, yutol jaach rey jaach tiꞌ, ja wotaj cha naꞌoc yin junoj tzetyetal watxꞌ, cꞌal tzetyetal tol pena, laan wal jaach jaxca junoj yángel Dios. Oc ojabꞌ cꞌal Jehová cu Diosal ja wetoj, catuꞌ chi yakꞌon syaaxilal ja wibꞌan, ẍi ix ix tet naj rey.

18 Jix takꞌwi pax naj rey tet ix jaxca tiꞌ:

—Jaꞌ tinaniꞌ chin oc tean ja win, cꞌam ojabꞌ cha wewbꞌa el ey jin yu tzetyetal oj jin kꞌanle el ey jaach, ẍi naj tet ix.

—Kꞌanabꞌan xin jaach rey, ẍi ix tet naj.

19 —Jix yalon naj rey tet ix jaxca tiꞌ:

—¿Man mi jaꞌ oj naj Joab jix chejon ja wal wan kꞌane tiꞌ? ẍi naj tet ix.

Jix yalon ix tet naj rey jaxca tiꞌ:

—Caw yel cha wal jaach rey, jaꞌton naj Joab, naj ja wakꞌomal servil yeocoj, jaꞌ naj jix jin chejontej yet chi jul walon ey jaach an. 20 Chi yun naj jaxca tuꞌ, yet chi qꞌuexcha ja naꞌbꞌal yin naj ja cꞌaal Absalón. Yutol jaach rey jaach tiꞌ, caw wal ey ja naꞌbꞌal, laan jaach jaxca junoj yángel Dios, ja wotaj masanil tzetyetal chi ecꞌtoj yul ja conobꞌ bꞌey cha wakꞌ yaawil tiꞌ, ẍi ix tet naj.

21 Catuꞌ jix awtele naj Joab tuꞌ yu naj rey:

—Tuxa jix jin naꞌ yibꞌan an, yun ojabꞌ jaxca chi yoche ja cꞌul. Asiꞌ, chi too ja wiꞌon meltzotej naj achꞌe Absalón, ẍi naj rey tet naj Joab.

22 Catuꞌ jix ey noan naj Joab sat txꞌotxꞌ sattaj naj rey yu xꞌoxon eloj tol miman yeloc apnoj yul sat, jix yalon watxꞌ kꞌane yin naj rey jaxca tiꞌ:

—Jaꞌ tinaniꞌ jaach rey, tuxa jix naꞌcha el ja wu tol ey weloc apnoj yul ja sat, yutol jix ja chaꞌ ja wabꞌ tzet chi yoche jin cꞌul jix wal ey jaach, ẍi naj Joab.

23 Jix lawi tuꞌ xin, jix too naj Joab bꞌey conobꞌ Guesur yu stoo yiꞌletej naj Absalón yu naj, catuꞌ chi jul naj bꞌey Jerusalén. 24 Jix yalon naj rey tol tꞌinan cꞌal stoo can naj Absalón bꞌey sna, cꞌam ojabꞌ chi ecꞌ naj xꞌox sbꞌa sattaj naj. Queytuꞌ jix yun stoo can naj bꞌey sna, ma cꞌal il-le oc yin naj rey tuꞌ yu naj.

25 Jaꞌ xol masanil ebꞌ Israel cꞌam junojxa winaj watxꞌ yili jaxca yili naj Absalón tuꞌ, caw wal bꞌinabꞌil naj yu swatxꞌil yili, yutol caw watxꞌ yili masanil smimanil naj. 26 Junel chi tzule el xil sjolom naj yul junjun abꞌil, yutol al xa chi yabꞌe, yutol jaꞌ xil sjolom tuꞌ, ecꞌbꞌan canebꞌoj libra yalil, jatacꞌalaꞌ yechbꞌal ebꞌ rey chi skꞌanbꞌalne. 27 Jaꞌ naj Absalón tuꞌ ey oxwan scꞌaal, jun scutzꞌin. Jaꞌ jun scutzꞌin tuꞌ chi yij sbꞌi Tamar, caw sakꞌal yili ix.

28 Caabꞌxa abꞌil yapni oc naj Absalón bꞌey Jerusalén, cꞌam tocꞌal chi skeꞌ stoo naj xꞌoxon sbꞌa sattaj naj rey. 29 Yu jun tuꞌ, jix awtele naj Joab yu naj Absalón yet chi iꞌletoj sattaj naj rey tuꞌ, jaxa naj Joab ma tit naj. Jix awtele pax naj yet scaelal, ma cꞌal yal scꞌul naj jix tita. 30 Jix lawi tuꞌ xin, jix ẍejontoj naj Absalón ebꞌ yakꞌomal servil, jix yalon tet ebꞌ jaxca tiꞌ:

—Asiꞌwej bꞌey xol yawo naj Joab bꞌey scawilal stiꞌ jin mulnail an, bꞌey awbꞌil ey ixim cebada naj, che yaoc skꞌakꞌal yawo naj tuꞌ, ẍi naj tet ebꞌ.

Jix too ebꞌ yakꞌomal servil naj Absalón tuꞌ, jix bꞌet ebꞌ yaon oc skꞌakꞌal yawo naj Joab tuꞌ. 31 Catuꞌ jix too naj Joab bꞌey sna naj Absalón tuꞌ, jix yalon jaxca tiꞌ:

—¿Tzet yuxan jix yaoc skꞌakꞌal jin awo ebꞌ naj ja mulnawom bꞌey jin mulnail an? ẍi naj.

32 Jix takꞌwi Absalón tet naj jaxca tiꞌ:

—Cael oxel jix jaach bꞌet wakꞌ awteletej, yet chi too ja kꞌanle tet naj rey tzet yuxan jix jin bꞌet tit bꞌey conobꞌ Guesur. Yel xacꞌal mi watxꞌ ta tol jix jin can cꞌal can tituꞌ. Yutol jain tiꞌ chi woche chi wil yin naj rey tuꞌ. Ta ey jin penail, chi skeꞌ chin makꞌle camoj, ẍi naj Absalón tuꞌ tet naj.

33 Yu jun tuꞌ, jix too naj Joab yilon ecꞌ naj rey, yet chi yalon tzetyetal jix yal naj Absalón tuꞌ. Jix lawi tuꞌ xin, jix awtele naj Absalón yu naj rey David. Jaꞌ yet jix apni ocoj, jix ey noan naj sat txꞌotxꞌ sattaj naj rey tuꞌ, jix chaꞌle naj yin tzalacꞌulal, catuꞌ jix stzꞌubꞌon el stiꞌ jun yuninal naj rey tuꞌ.