Meltzonaj Oc Naj Absalón Yin Smam
15
Jaꞌ yet jix bꞌey cꞌaltoj tiempo xin, jix swaꞌne jun scarruaje naj Absalón chi tokꞌle ecꞌ yu che, catuꞌ jix seyon jun 50 ebꞌ winaj tol chi teynen naj, jaꞌ ebꞌ chi teynen bꞌey chi eqꞌui. 2 Caw sebꞌ chi a waan naj Absalón tuꞌ junjun cꞌu, catuꞌ chi bꞌet oc linan naj bꞌey spuertail conobꞌ tuꞌ. Junjun cꞌal mactxequel chi octej yet chi jul swaꞌnen yeoc junoj skꞌane ebꞌ ánima tet naj rey tuꞌ, chi mitxꞌle oc tucan ebꞌ yu naj, catuꞌ chi skꞌanlen naj tet ebꞌ tzet conobꞌal ebꞌ. Jaꞌ yet chi yalon ebꞌ tet tzet conobꞌal cꞌal tzet icꞌaaleal ebꞌ, 3 eyman chi yal naj Absalón tuꞌ tet ebꞌ: Yel toni, watxꞌ tzet chi too je waꞌne tuꞌ, asan xin, cꞌam mactxequel eyoc yin swaꞌnen yeoc kꞌane yu naj rey tuꞌ, ẍi naj tet ebꞌ. 4 Catuꞌ chi yalon cꞌal pax oj: Toloj wal jain chin oc yin reyal bꞌey jun conobꞌ tiꞌ, catuꞌ chex jul jin cꞌatan an, chi jul je waꞌnen yeoc je kꞌane tuꞌ, caw yin eymanil chi yun jin waꞌne yeoc jex an, ẍi naj Absalón tuꞌ tet ebꞌ. 5 Ey wal junxa chi yute cꞌal sbꞌa naj Absalón tuꞌ. Jaꞌ yet chi apni oc ebꞌ ánima scꞌatan naj chi ey noan ebꞌ sattaj, eyman chi oc mitxꞌan naj yin skꞌabꞌ ebꞌ, chi oc lakꞌan naj yin ebꞌ, catuꞌ chi stzꞌubꞌon el stiꞌ ebꞌ naj. 6 Quey cꞌal tuꞌ chi utele ebꞌ Israel yu Absalón tuꞌ, ebꞌ chi apni oc swaꞌne yeoc junoj skꞌane sattaj naj rey tuꞌ. Jaxca tuꞌ jix yun smoncha ebꞌ ánima tuꞌ yu naj.7 Jaꞌ yet jix lawi canebꞌ abꞌil yunen cꞌal naj jaxca tuꞌ, jix yalon naj Absalón tet smam jaꞌton naj rey David:
—Chin kꞌan ey jaach, jaach rey, tol chin ja chaꞌtoj bꞌey conobꞌ Hebrón, yet watxꞌ chi wun bꞌey jix wakꞌcan jin tiꞌ tet Jehová. 8 Jaꞌ yet ey jin ecꞌ bꞌey conobꞌ Guesur yul yet Siria, jix walon tet Jehová ta tol chin meltzo bꞌey Jerusalén, sowalil oj wakꞌ junoj jin xaambꞌal tet Dios, ẍi naj Absalón.
9 Jix yalon naj rey tet naj jaxca tiꞌ:
—Asiꞌ yin tzalacꞌulal xin, ẍi naj rey David.
Queytuꞌ jix yun stoo naj Absalón bꞌey conobꞌ Hebrón. 10 Jaꞌ yet jix apni oc naj bꞌey jun conobꞌ tuꞌ, catuꞌ jix yaontoj ebꞌ yakꞌomal servil yin ewantajil xol masanil ebꞌ yicꞌaal Israel yet chi al-le tet ebꞌ, tol jaꞌ yet oj yabꞌen xuꞌle noꞌ cacho ebꞌ, catuꞌ chi yalon ebꞌ tol chi oc naj Absalón yin reyal bꞌey conobꞌ Hebrón. 11 Catuꞌ jix yawten jun 200 ebꞌ winaj a conobꞌ Jerusalén, jaꞌ ebꞌ tuꞌ cꞌam niꞌoj tzet yotaj ebꞌ tzet chi snaꞌ naj Absalón tuꞌ. 12 Jaꞌ yet lalan yakꞌon xaambꞌal naj Absalón, jix yakꞌon bꞌet tit naj Ahitófel a conobꞌ Guiló. Jaꞌ naj tuꞌ chi colwa yaon oc snaꞌbꞌal naj rey David. Queytuꞌ jix yun ẍꞌibꞌ cꞌal sbꞌisil ebꞌ ánima jix oc yetoj naj Absalón.
Elnaj A Naj Rey David Tet Naj Absalón
13 Ey jun yakꞌomal servil jix bꞌet alon tet naj rey David tol ey ebꞌ Israel eyxa oc yetoj naj Absalón. 14 Yu jun tuꞌ, yuxan jix yal naj David tet masanil ebꞌ eyoc yin yopiso yetoj bꞌey Jerusalén:
—Toonwej, eloj jonwej yin eymanil, ta cꞌamaj, ma xa skeꞌ cu colon cu bꞌa tet naj Absalón tuꞌ. Kakꞌwej kip keli, ta cꞌamaj cu michꞌcha tala yu naj, catuꞌ chi cu smakꞌon cam naj yetoj chꞌen espada bꞌey yul conobꞌ tiꞌ, ẍi naj rey David.
15 Catuꞌ jix takꞌwi ebꞌ tet naj rey jaxca tiꞌ:
—Jaon tiꞌ jon, caw bꞌejan cꞌal cu cꞌul cu jijen masanil tzet oj ja wal jaach rey, ẍi ebꞌ tet naj.
16 Queytuꞌ jix yun yel naj rey David yetoj ebꞌ yistil cꞌal yuninal yetoj cꞌal ebꞌ eyoc yin yopiso yetoj. Asanxane laonwan ebꞌ ix scaabꞌ yistil naj jix cancan steynen bꞌey spalacio. 17 Jaꞌ yet xax ela naj yetoj masanil ebꞌ jix too yintaj tuꞌ, jix oc linan ebꞌ bꞌey stiꞌel conobꞌ. 18 Jaxa cꞌal scꞌatan naj rey tuꞌ linan oc masanil ebꞌ eyoc yin yopiso tuꞌ yetoj. Jal pax ebꞌ soldado chi teynen ebꞌ xin, jaꞌton ebꞌ Cereteo, cꞌal ebꞌ Peleteo, jix oc txolan ebꞌ sattaj naj yin jowal, yetoj cꞌal 600 ebꞌ soldado jix tit tzajan yintaj bꞌey conobꞌ Gat. 19 Jix yalon naj rey David tet naj Itai a conobꞌ Gat, jaxca tiꞌ:
—¿Tzet yuxan jix jaach tit ketoj jaach tiꞌ? Watxꞌ mi ta chach meltzo cantoj, catuꞌ chach can yetoj junxa naj acꞌ rey oj ocoj, yutol txꞌoj conobꞌal jaach. 20 Yutol jaach tiꞌ, tucꞌal jix jaach juli, catuꞌ txꞌoj conobꞌal jaach, man watxꞌoj ta chi wakꞌ pural ja too wetoj, caw yel jain tiꞌ man wotaj oj bꞌey chin toi. Yel xacꞌal mi watxꞌ tol chach meltzotoj. Iꞌtoj ebꞌ naj ja wet conobꞌ tiꞌ ja wetoj, jaꞌ Jehová oj yakꞌ swatxꞌcꞌulal ja wibꞌan, ẍi naj rey tuꞌ.
21 Jix takꞌwi naj Itai tet naj rey jaxca tiꞌ:
—Jaach rey, chi wakꞌ jin tiꞌ sattaj Dios, catuꞌ chi waloni, yal cꞌal bꞌeytuꞌ oj jaach toj, tacꞌal watxꞌ, ma pena, ma yin camich, oj jin toj cꞌal ja wetoj, ẍi naj Itai.
22 Yu jun tuꞌ xin, jix yalon naj rey David tet naj jaxca tiꞌ: Eyman xin, toon, ẍi naj.
Queytuꞌ jix yun stoo naj Itai yetoj naj rey David yetoj cꞌal ebꞌ jaꞌjun yetoj cꞌal yuninal cꞌal yistil ebꞌ. 23 Masanil ebꞌ ánima jix okꞌ ebꞌ sicꞌlebꞌil yet jix yilon ebꞌ stoo naj rey yetoj ebꞌ jaꞌjun yetoj. Jix ecꞌtoj ebꞌ bꞌey yul jaꞌ Cedrón, catuꞌ jix too cꞌal ebꞌ bꞌey sbꞌeal txꞌotxꞌ cusiltaj txꞌotxꞌ. 24 Tzajan oc naj Sadoc yetoj cꞌal masanil ebꞌ Levita. Iꞌbꞌil oc teꞌ Scaẍail Swa Kꞌane Dios yu ebꞌ, catuꞌ jix apni cꞌal pax oc naj Abiatar. Jix yaon ey teꞌ caẍa ebꞌ tuꞌ masantaꞌcꞌal yet jix lawi yecꞌ eltoj ebꞌ ánima jix too yetoj naj rey tuꞌ bꞌey xol conobꞌ. 25 Jix yalon naj rey David tet naj Sadoc jaxca tiꞌ:
—Iꞌwej meltzo teꞌ Scaẍail Swa Kꞌane Dios yul conobꞌ tuꞌ. Ta tol oj oc Jehová wetoj, catuꞌ oj jin yiꞌon meltzo, ta jaxca tuꞌ, catuꞌ oj wiꞌontoj teꞌ Scaẍail Swa Kꞌane Dios bꞌey snail scalubꞌal tuꞌ. 26 Ta tol cꞌamxa chi tzala scꞌul Jehová wetoj an xin, yun ojabꞌ tzet chi yoche scꞌul win, yutol ey jin oc yul skꞌabꞌ Naj, ẍi naj David.
27 Jix yalon pax naj rey junelxa tet naj Sadoc, jaꞌton naj yakꞌomal xaambꞌal, jix yalon jaxca tiꞌ:
—Jaach ẍejabꞌ Dios, meltzaantoj yul ja conobꞌ yin tzalacꞌulal yetoj naj Abiatar yetoj cꞌal cawan ja wuninal, Iꞌtoj naj ja cꞌaal Ahimaas, yetoj Jonatán scꞌaal Abiatar. 28 Jain xa tiꞌ oj jin cancan bꞌey yacꞌalil txꞌotxꞌ cusiltaj txꞌotxꞌ tuꞌ, masantaꞌcꞌal oj wabꞌoc je kꞌaneal tituꞌ tzet utbꞌil cꞌal je yeocoj.
29 Jix lawi tuꞌ xin, catuꞌ jix meltzo naj yakꞌomal xaambꞌal chi yij Sadoc yetoj naj Abiatar bꞌey conobꞌ Jerusalén yetoj teꞌ Scaẍail Swa Kꞌane Jehová, jaꞌ tituꞌ jix cancan ebꞌ. 30 Caw wal jix okꞌ naj rey David yetoj masanil ebꞌ tzajan oc yintaj, catuꞌ chi atoj ebꞌ bꞌey txꞌotxꞌ tzalan Olivo, cꞌam xanabꞌ naj eyocoj, eyoc skꞌoxil sjolom yetoj ebꞌ jaꞌjun yetoj, yu xꞌoxon el scuscꞌulal ebꞌ. 31 Jix al-le tet naj rey tol jaꞌ naj Ahitófel chi jowi oc yin naj, yetbꞌi sbꞌa yetoj naj Absalón, catuꞌ jix oc ian naj skꞌanon tet Jehová yet chi etex el tzetyetal naꞌbꞌil yu naj Ahitófel tuꞌ.
32 Jaꞌ yet jix aapnoj naj rey David bꞌey sjolom txꞌotxꞌ tzalan Olivo tuꞌ, jix oc naj yin eyilal tet Dios. Jaꞌ tituꞌ jix jul jun swatxꞌil ánima scꞌatan, jaꞌton naj chi yij Husai, yicꞌaal ebꞌ Arquita. Caw tzilquiltaj xacꞌal yoc spichil eyocoj, catuꞌ eyatoj txꞌotxꞌ xol xil sjolom. 33 Catuꞌ jix yalon naj rey David tet jaxca tiꞌ:
—Ta chach too wetoj an, jaxca tol oj jaach oc stzꞌajiloj yalil tzet eyoc wibꞌan tiꞌ. 34 Yu tuꞌ xin, yel xacꞌal mi watxꞌ ta tol chach meltzotoj bꞌey Jerusalén, catuꞌ cha walon tet naj Absalón jaxca tiꞌ: Jaach rey, jain tiꞌ chin cancan yin ja wakꞌomal servil jaxca jix yun woc yakꞌomaloj servil ja mam, ja chi tet. Queytuꞌ oj yun ja colwa ja wuchontoj snaꞌbꞌal naj Ahitófel tuꞌ. 35 Jaꞌ tituꞌ jix can ebꞌ naj yakꞌomal xaambꞌal, naj Sadoc yetoj cꞌal naj Abiatar. Yal cꞌal tzet cha wabꞌ yal-le bꞌey yul despacho tuꞌ, eyman cha wal tet ebꞌ. 36 Jaꞌ tituꞌ ey cꞌal pax ecꞌ naj Ahimaas yetoj naj Jonatán, ebꞌ scꞌaal Abiatar. Ta ey tzetyetal cha wabꞌe, cha wal tet ebꞌ, jaxa ebꞌ chi skeꞌ yalontej ey jin an, ẍi naj rey David tet naj Husai.
37 Queytuꞌ jix yun smeltzo naj Husai bꞌey Jerusalén, jaꞌ yet jix apni oc naj Absalón bꞌey yul conobꞌ tuꞌ, catuꞌ jix apni pax oc naj Husai.