—¿Tzet yuxan cha wiꞌtej wan tiꞌ?

Catuꞌ jix takꞌwi naj Sibá tet naj:

—Jaꞌ noꞌ bꞌuru tiꞌ, jaꞌ noꞌ oj ijon ebꞌ eyoc ja wetoj yul ja na, jaach rey. Jaxa ixim pan cꞌal teꞌ loꞌbꞌeal sat teꞌ, yet ebꞌ naj ja soldado jaꞌjun ja wetoj, jal pax an yal uva tuꞌ, jaꞌ oj yucꞌ ebꞌ naj chi cꞌuumbꞌi sbꞌey bꞌey txꞌotxꞌ cusiltaj txꞌotxꞌ tiꞌ, ẍi naj Sibá tuꞌ.

3 Jix skꞌanlen pax naj rey tet naj jaxca tiꞌ.

—¿Bꞌeytuꞌ eyoc naj Mefi-bóset naj yitxiquin Saúl tinaniꞌ? ẍi naj tet.

—Jix cancan naj bꞌey Jerusalén, yutol chi snaꞌ naj tala oj oc naj yin reyal jaxca jix yun yoc smam naj yin reyal yu ebꞌ Israel, ẍi naj Sibá tuꞌ.

4 Catuꞌ jix takꞌwi naj rey tet naj Sibá jaxca tiꞌ:

—Masanil tzetyetal tol yet taꞌle naj Mefi-bóset, oj ja wiꞌ can ocoj, ẍi naj tet.

—Yuwal dios ey jaach, jaach rey. Jaꞌ tinaniꞌ chi wotajne eloj, tol watxꞌ ja naꞌbꞌal win an, ẍi naj Sibá tuꞌ.

5 Jaꞌ yet jix apni oc naj rey David bꞌey Bahurim, jix eltej jun winaj chi yij Simí, scꞌaal Guerá, tol yican to sbꞌa yetoj rey Saúl, 6 catuꞌ jix cꞌoli syambꞌan oc sbꞌa yetoj ebꞌ yetbꞌi tuꞌ yin naj rey David, jix skꞌojontoj chꞌen ebꞌ yin naj, yetoj cꞌal yin ebꞌ eyoc yin opiso yetoj, joyan oc ebꞌ soldado cꞌal ebꞌ ánima yin naj David. Chi yalon naj Simí jaxca tiꞌ:

7 —Elan titiꞌ, caw wal pena jaach, makꞌom cam ánima jaach. 8 Yuxan lalan ja chaꞌon spaj yu Jehová tinaniꞌ, yu jantaj ebꞌ yicꞌaal Saúl jix ja makꞌ camoj, yu cꞌal ja woc can sqꞌuexeloj yin reyal. Tuxa jix yaoc Jehová ja wopiso yul skꞌabꞌ naj ja cꞌaal Absalón. Smoo ja chaꞌon spaj yutol makꞌom cam ánima jaach, ẍi tet naj.

9 Catuꞌ jix yalon naj Abisai, naj yuneꞌ ix Seruiá tet naj rey David jaxca tiꞌ:

—¿Tzet yuxan chi bꞌawa jun winaj tiꞌ ja win, laan yetoj junoj noꞌ camnaj txꞌiꞌ? Chaꞌ jin toj yet chi too jin tzokꞌon el sjolom, ẍi naj.

10 Jix yalon naj rey tet naj jaxca tiꞌ:

—Jaꞌ jun tuꞌ cꞌam je yalon je yet yin, jaex yuneꞌ jex ix Seruiá tiꞌ. Ta chin bꞌuchle yu naj, jaꞌ mi Jehová chi akꞌon yalaꞌ. Ta jaxca tuꞌ, cꞌam cꞌal mactxequel chi skeꞌ tenon oc tucan naj, ẍi naj rey David.

11 Catuꞌ jix yalon naj David tet naj Abisai yetoj cꞌal tet ebꞌ eyoc yin opiso yetoj, jix yalon jaxca tiꞌ:

—Ilaꞌ tax tol chi yoche jun jin cꞌaal chin smakꞌ camoj, jaxa tam wal jun naj yicꞌaal Benjamín tiꞌ. Yilxa naj, bꞌawa ojabꞌ naj win an, tala jaꞌ Jehová chi akꞌon yunne. 12 Tala cꞌuxan chi okꞌ scꞌul Jehová win, yet chi yakꞌon syaaxilal wibꞌan yu sqꞌuexeloj yet chi bꞌawa naj win tiꞌ an, ẍi naj rey David tuꞌ.

13 Catuꞌ jix too cꞌal naj rey yetoj masanil ebꞌ tzajan oc yintaj tuꞌ yul bꞌe, jaxa pax naj Simí tuꞌ xin, jix bꞌey cꞌal stoo naj yibꞌanlaj bꞌe bꞌey chi too naj rey David tuꞌ, catuꞌ chi skꞌojon eytej chꞌen naj yibꞌan ebꞌ, chi bꞌawa eytej naj yin ebꞌ, catuꞌ chi stiẍon eytej pojoj naj yibꞌan ebꞌ. 14 Jaꞌ yet jix apni oc naj rey David bꞌey stiꞌ jaꞌ miman Jordán, yetoj cꞌal masanil ebꞌ jaꞌjun yetoj, caw wal chi cꞌuumbꞌi xacꞌal ebꞌ, yuxan jix xew ebꞌ tituꞌ.

15 Jix oc naj Absalón yul conobꞌ Jerusalén yetoj masanil ebꞌ Israel jaꞌjun yetoj, yetoj cꞌal naj Ahitófel. 16 Jix apni cꞌal pax oc naj Husai a Arquita yetoj, jaꞌton jun swatxꞌil ánima naj rey David; caw chi el yaw naj, jix bꞌet chaꞌle naj Absalón yu naj, chi yalon naj jaxca tiꞌ:

—Viva, viva, miman ojabꞌ yeloc apnoj naj rey, ẍi naj.

17 Jix skꞌanlen naj Absalón tet naj Husai jaxca tiꞌ:

—¿Tumi jaxca tuꞌ ja naꞌbꞌal yin naj ja watxꞌil ánima tiꞌ? ¿Tzet yuxan ma jaach too yetoj naj? ẍi tet naj.

18 Jix takꞌwi naj Husai tet naj Absalón jaxca tiꞌ:

—Cꞌamaj, man smoo oj chin too yetoj naj. Jaꞌ mactxequel sicꞌbꞌil el yu Jehová cꞌal ebꞌ conobꞌ Israel, jaꞌ yetoj ebꞌ oj jin cancanoj. 19 Yetoj cꞌal pax oj, ey cꞌaltaꞌ mactxequel oj jin jije ẍejbꞌanil, jaꞌton scꞌaal naj jin watxꞌil ánima tuꞌ. Yu jun tuꞌ, yuxan chin oc can yin ja wakꞌomal servil, jaxca jix yun jin jijen ẍejbꞌanil naj ja mam, ẍi naj Husai.

20 Jix lawi tuꞌ, catuꞌ jix skꞌanlen naj Absalón tet naj Ahitófel jaxca tiꞌ:

—¿Tzet ja chi jaach tiꞌ, tzet watxꞌ chi kunne? ẍi naj.

21 Jix yalon Ahitófel tet naj Absalón jaxca tiꞌ:

—Jaꞌ jun tzet cha wun tinaniꞌ, tol chach oc wey yetoj ebꞌ ix scaabꞌ yistil naj ja mam ey can oc steynemaloj spalacio, yet watxꞌ chi naꞌcha el yu masanil ebꞌ Israel tiꞌ, tol caw wal pena jaach yul sat naj ja mam tuꞌ, queytuꞌ oj yun yaon oc yipoj scꞌul masanil ebꞌ ánima tzajan oc ja wintaj tiꞌ, ẍi naj Ahitófel.

22 Jix lawi tuꞌ, catuꞌ jix waꞌnele a jun kꞌap na bꞌey yibꞌan spalacio naj rey tuꞌ, catuꞌ jix octoj naj Absalón wey yetoj ebꞌ ix scaabꞌ yistil smam tuꞌ, tꞌanan oc masanil ebꞌ conobꞌ Israel yet jix octoj naj wey yetoj ebꞌ ix. 23 Jaꞌ yet jun tiempoal tuꞌ, ta jaꞌ tet naj Ahitófel chi skꞌanle junoj naꞌbꞌale ebꞌ, jaxca wal tol jaꞌ tet Dios chi skꞌanle yabꞌ ebꞌ, yu jun tuꞌ, yuxan jix skꞌanle snaꞌbꞌal naj Absalón tet naj, jaxca jix yun skꞌanlen snaꞌbꞌal naj rey David.