—Tol oj wal chi ẍaꞌ ja cꞌul chin sicꞌ el junoj 12,000 ebꞌ soldado, catuꞌ chin too yintaj David yet jun akꞌbꞌal tiꞌ, 2 yajbꞌan cꞌam yip yu cꞌuumbꞌilal. Catuꞌ chin apni oc bꞌey eyecꞌ tuꞌ, queytuꞌ oj yun jin xibꞌten yetoj masanil ebꞌ jaꞌjun yetoj, catuꞌ chi ela ebꞌ scꞌatan naj rey tuꞌ, cꞌam junoj mactxequel chin makꞌ camoj, asanne naj rey tuꞌ. 3 Queytuꞌ oj yun sjul masanil ebꞌ ánima tuꞌ ja cꞌatan, yutol junne mactxequel sowalil cha makꞌ camoj, jaxa pax masanil ebꞌ ánima xin, chi oc ebꞌ yin watxꞌcꞌulal ja wetoj, ẍi naj Ahitófel tet naj.

4 Caw wal jix ẍaꞌ scꞌul naj Absalón jun naꞌbꞌale tuꞌ, yetoj cꞌal masanil ebꞌ icham winaj yeoc yul conobꞌ Israel. 5 Jix yalon cꞌal pax naj Absalón tol watxꞌ chi awtele pax naj Husai, a Arquita yet chi yakꞌon junoj naꞌbꞌale naj. 6 Jaxa yet jix apni oc naj, jix yalon naj Absalón jaxca tiꞌ:

—Queywal tiꞌ yeoc snaꞌbꞌal naj Ahitófel jaxca tiꞌ, ¿tzet pax ẍi ja naꞌbꞌal jaach tiꞌ yibꞌan? ¿jaxca mi tuꞌ chi kunne, ma cꞌamaj? ẍi naj.

7 Catuꞌ jix takꞌwi naj Husai jaxca tiꞌ:

—Jaꞌ tinaniꞌ, jaꞌ jun snaꞌbꞌal naj Ahitófel tuꞌ man watxꞌoj. 8 Jaach tiꞌ, caw ja wotaj sicꞌlebꞌil tol jaꞌ naj ja mam caw bꞌinabꞌil naj yin jowal yetoj masanil ebꞌ jaꞌjun yetoj. Jaꞌ tinaniꞌ yel xacꞌal mi chi tit sjowal yetoj ebꞌ jaꞌjun yetoj tuꞌ, jaxca xacꞌal mi junoj noꞌ xutx oso chi iꞌle ecꞌ yuneꞌ tet. Yetoj cꞌal pax oj, jaꞌ naj ja mam tuꞌ caw wal qꞌueynaj naj yakꞌon jowal, tumi wal oj ecꞌ junoj akꞌbꞌal yu naj xol ebꞌ ánima tuꞌ. 9 Jaꞌ tinaniꞌ, bꞌey mi tuꞌ chi yewbꞌa oc el sbꞌa naj bꞌey junoj nachꞌen ma bꞌey junojxa lugar. Yetoj cꞌal pax oj, ta chi eyqꞌuey jaywanoj ebꞌ ja soldado tiꞌ yin jowal, jaxam wal yel skꞌumal tol jix eyqꞌuey ebꞌ soldado yet Absalón, ẍim ebꞌ naj. 10 Yu tuꞌ xin, caxcꞌal ey ebꞌ naj cꞌam cꞌal chi xiw yakꞌon jowal, jaxca cꞌal junoj noꞌ mimej bꞌalam, oj cꞌaltaꞌ yakꞌ caabꞌcꞌulal ebꞌ naj, yutol masanil ebꞌ ket conobꞌ Israel yotaj ebꞌ sicꞌlebꞌil tol jaꞌ naj ja mam caw jelan yakꞌon jowal naj, yetoj cꞌal ebꞌ jaꞌjun yetoj tuꞌ. 11 Yu tuꞌ xin, jaꞌ jun naꞌbꞌale chi wakꞌ ey jaach tinaniꞌ, tol cha yambꞌa oc masanil ebꞌ Israel ja wetoj, chi tit tacꞌal bꞌey Dan masantaꞌcꞌal bꞌey Beerseba. Jaꞌ ebꞌ tuꞌ, laan sbꞌisil ebꞌ jaxca yarenail stiꞌ jaꞌ mar, catuꞌ jaach caw cha wijbꞌatoj ebꞌ, catuꞌ chach too yin jowal tuꞌ, 12 yet watxꞌ yal cꞌal bꞌeytuꞌ eyoc ecꞌ naj ja mam tuꞌ, catuꞌ cha wakꞌon eyqꞌuey yetoj cꞌal ebꞌ jaꞌjun yetoj, jaxca wal chi yun yeyqꞌuey yal akꞌbꞌal yibꞌan txꞌotxꞌ txꞌotxꞌ. Cꞌamxa junoj ebꞌ oj colcha canoj. 13 Caxcꞌal chi too yewbꞌa el sbꞌa ebꞌ yul junoj conobꞌ yaloni, jaon xa tiꞌ, cu masanil jaon Israel jon tiꞌ chi kiꞌtoj cu txꞌan catuꞌ chi cu jutxontej jun conobꞌ tuꞌ yetoj cꞌal jantaj chꞌen chꞌen eyoc yinlaj, catuꞌ chi cu tenon cantoj bꞌulna yul-laj jobꞌe, cꞌamxa junoj chꞌen chi can tituꞌ, ẍi naj Husai.

14 Jaꞌ jun jix yal naj Husai tuꞌ, caw wal jix ẍaꞌ scꞌul naj Absalón yetoj masanil ebꞌ conobꞌ Israel, jal pax tzet jix yal naj Ahitófel, ma ẍaꞌ scꞌul ebꞌ tzet jix yal naj, yutol jaꞌ Jehová jix uchontoj wan naꞌbꞌale jix yal naj Ahitófel tuꞌ, yet watxꞌ chi tit can yibꞌan naj Absalón. 15 Jix lawi tuꞌ xin, catuꞌ jix too naj Husai yalon tet ebꞌ naj yakꞌomal xaambꞌal, jaꞌton naj Sadoc cꞌal naj Abiatar, yu wan naꞌbꞌale jix yakꞌ naj Ahitófel tet naj Absalón, jix yalon cꞌal pax naj tet ebꞌ icham winaj yeoc yul conobꞌ Israel, queytuꞌ jix yun walon pax tet naj an. 16 Jix lawi tuꞌ, jix too yalon ebꞌ tet naj rey David yin eymanil, tol cꞌam ojabꞌ chi can naj yet jun akꞌbꞌal tuꞌ bꞌey txꞌotxꞌ cusiltaj txꞌotxꞌ tuꞌ, tol ojabꞌ chi ecꞌtoj ebꞌ bꞌey junxa skꞌaxepal jaꞌ miman Jordán yet watxꞌ cꞌam chi makꞌle cam ebꞌ.

17 Jal pax naj Jonatán yetoj naj Ahimaas, jatuꞌ ey ebꞌ bꞌey chi aol jaꞌ snukꞌ jaꞌ jaꞌ chi yij En-roguel, bꞌey stiꞌeltoj conobꞌ, yet watxꞌ cꞌam mactxequel chi ilon yecꞌ ebꞌ bꞌey yul conobꞌ tuꞌ. Jaꞌ jun ix yakꞌomal servil jix bꞌet alon tet ebꞌ yin ewantajil tzet yeocoj. Jaꞌ yet jix yabꞌen oc ebꞌ, catuꞌ jix too yalon ebꞌ tet naj rey David. 18 Jaꞌ yet jun txolan tuꞌ, ey jun naj achꞌe unin jix iloni, catuꞌ jix too yalon tet naj Absalón. Jaxa naj Jonatán yetoj naj Ahimaas, jix too ebꞌ yin eymanil, jix apni oc ebꞌ bꞌey sna jun winaj caan bꞌey Bahurim. Eyman jix yewbꞌa el sbꞌa ebꞌ yul jun kꞌobꞌ bꞌey sattaj eltoj stiꞌ na tuꞌ. 19 Catuꞌ jix too ix yistil naj ey sna tuꞌ smajchen stiꞌ jun jolan tuꞌ yetoj jun kꞌap, catuꞌ jix secontoj ixim sbꞌakꞌ tiriw ix yibꞌan, yet man txequeloj ebꞌ. 20 Jaꞌ yet jix apni oc ebꞌ yakꞌomal servil naj Absalón tuꞌ, catuꞌ jix skꞌanlen ebꞌ tet ix ix tuꞌ jaxca tiꞌ:

—¿Bꞌeytuꞌ eyoc ecꞌ naj Ahimaas yetoj naj Jonatán titiꞌ? ẍi ebꞌ.

Catuꞌ jix takꞌwi ix tet ebꞌ naj jaxca tiꞌ:

—Maꞌitax ecꞌtoj ebꞌ naj titiꞌ. Xax mi kꞌaxbꞌo ecꞌtoj ebꞌ naj bꞌey jun jobꞌe tuꞌ, ẍi ix.

Catuꞌ jix too tzajan ebꞌ yintaj ebꞌ naj cawan tuꞌ yaloni, jaxa yet jix yilon ebꞌ naj tol cꞌam ebꞌ naj chi too sattaj ebꞌ, catuꞌ jix meltzo ebꞌ bꞌey Jerusalén. 21 Jaꞌ yet jix too ebꞌ tuꞌ xin, catuꞌ jix atej naj Ahimaas yetoj naj Jonatán bꞌey yul jun jolan tuꞌ, jix too ebꞌ yalon tet naj rey David tol chi kꞌaxbꞌo ecꞌtoj bꞌey jaꞌ miman Jordán yetoj masanil ebꞌ jaꞌjun yetoj tuꞌ, yutol jix akꞌle scꞌul naj Absalón yu naj Ahitófel tol chi tit ebꞌ yakꞌon jowal yin ebꞌ. 22 Jaꞌ yet jix yabꞌen naj rey David jaxca tuꞌ, catuꞌ jix a lemna naj yetoj masanil ebꞌ jaꞌjun yetoj, catuꞌ jix kꞌaxbꞌo ecꞌtoj ebꞌ yul jaꞌ Jordán. Jaxa yet jix kꞌinibꞌi a yet junxa cꞌu, jix kꞌaxbꞌo ecꞌtoj masanil ebꞌ yul jaꞌ tuꞌ. 23 Jaꞌ yet jix yilon naj Ahitófel tol cꞌam cꞌal chi oc yopiso jun naꞌbꞌale jix yakꞌ naj Absalón, jix yaon oc stzꞌuum noꞌ sbꞌuru, jix oc naj yibꞌan noꞌ che, catuꞌ jix meltzo naj bꞌey sna bꞌey sconobꞌ bꞌey jix ali, catuꞌ jix swaꞌnen can yuunal masanil stzetyetal naj. Jix lawi tuꞌ, catuꞌ jix stꞌunbꞌan a sbꞌa. Queytuꞌ jix yun scam naj Ahitófel tuꞌ, jaꞌ bꞌey mujan smam jix mujlei.

24 Jix apni oc naj rey David bꞌey conobꞌ Mahanaim, jaxa pax naj Absalón jix ecꞌtoj naj yul jaꞌ Jordán yetoj masanil ebꞌ Israel. 25 Jaꞌ naj Amasá jix sicꞌle oc yin syaawiloj ebꞌ soldado yu naj Absalón, yu yoc can sqꞌuexeloj naj Joab. Jaꞌ naj Amasá tuꞌ, scꞌaal jun naj Ismaelita chi yij Itrá. Jaꞌ naj Itrá tuꞌ jix nupi yetoj ix chi yij Abigail, scutzꞌin naj Nahas, naj sno ix Seruiá, ix xutx naj Joab.

26 Jaꞌ tituꞌ jix swaꞌne ey bꞌulan sbꞌa naj Absalón yetoj ebꞌ Israel bꞌey yul yet txꞌotxꞌ Galaad. 27 Jaꞌ yet jix apni oc naj rey David bꞌey conobꞌ Mahanaim, jix chaꞌle apnoj yu naj Sobí, scꞌaal Nahas a conobꞌ Rabá, yul yet Amón. Yetoj cꞌal pax naj Maquir scꞌaal Amiel a conobꞌ Lodebar, cꞌal Barzilai a conobꞌ Roguelim yul yet Galaad. 28 Iꞌbꞌil oc weyubꞌe yu ebꞌ, yetoj chꞌen palangana, cꞌal wan txꞌotxꞌ xi bꞌey chi akꞌle ta loꞌbꞌe, ixim tiriw, ixim cebada, ixim jarina cꞌal ixim kꞌanbꞌinaj tiriw, an ubꞌal teꞌ, yetoj cꞌal teꞌ kꞌanbꞌinaj garbanzo, 29 yetoj yal noꞌ awcabꞌ, noꞌ queso yet wacax, cꞌal queso yet noꞌ meꞌ. Jaꞌ masanil wan tuꞌ, jix yiꞌtoj ebꞌ tet naj rey David yet chi sloꞌon yetoj masanil ebꞌ jaꞌjun yetoj. Yutol speto naj yetoj ebꞌ conobꞌ bꞌey txꞌotxꞌ cusiltaj txꞌotxꞌ, yutol caw chi cꞌuumbꞌi ebꞌ naj, chi taj stiꞌ ebꞌ, catuꞌ caw chi nocha pax ebꞌ.