—Asiꞌwej, catuꞌ che yiꞌon a sbꞌisil ebꞌ soldado. Chi too je chaꞌtej bꞌey conobꞌ Beerseba, masantaꞌcꞌal chex apni oc bꞌey conobꞌ Dan. Yet chi lawi a je yu, catuꞌ che yiꞌontej sbꞌisil ebꞌ ey jin an, yet watxꞌ chi wilaꞌ jantaj ebꞌ yin masanil.

3 Jix takꞌwi naj Joab tet naj jaxca tiꞌ:

—Jaꞌ ojabꞌ Jehová chi iꞌon a can sbꞌisil sconobꞌ yin tol cꞌamxa chi bꞌischai. Yul ja kꞌabꞌ eyoc masanil ebꞌ, ¿Tzet yuxan chi yoche ja cꞌul jun tiꞌ, jaach rey? Jaꞌ yu jun tuꞌ oj oc spenail cu conobꞌ tiꞌ ja wu, ẍi naj.

4 Ma cꞌaltaꞌ ẍaꞌ yabꞌ naj rey tzet jix yal naj Joab tuꞌ, yuxan jix too cꞌaltaꞌ naj, jix bꞌetecꞌ naj stzꞌibꞌe a sbꞌisil masanil ebꞌ soldado Israel, catuꞌ jix meltzo naj bꞌey Jerusalén. 5 Jix yalon naj Joab tet naj rey David yu jantaj sbꞌisil masanil ebꞌ soldado ey yul nación tuꞌ, jaxa jix yun xin, jaꞌ bꞌey yul yet Israel ey jun 1,100,000 ebꞌ winaj tol stiempoal stoo yin jowal, ey cꞌal pax 470,000 ebꞌ bꞌey Judá. 6 Jaꞌ ebꞌ yicꞌaal Leví, cꞌal ebꞌ yicꞌaal Benjamín ma ale oc ebꞌ sbꞌisiloj yu naj, yutol jaꞌ naj Joab ma ẍaꞌ scꞌul jun chejbꞌanile jix yakꞌ naj rey tuꞌ.

7 Jaꞌ jun tuꞌ ma ẍaꞌ scꞌul Dios, yuxan jix aletej jun syaꞌilal yibꞌan conobꞌ Israel. 8 Yu jun tuꞌ, yuxan jix yal spenail naj rey David tet Dios, Jix yalon jaxca tiꞌ:

—Caw miman jin penail jix oc ey jaach, yutol jix wun jun tiꞌ. Yuxan chin kꞌan ey jaach tol cha wakꞌ mimancꞌulal yin jun jin penail tiꞌ, yutol jaxca junoj cꞌam snaꞌbꞌal jix wute jin bꞌa, ẍi naj.

9 Yu tuꞌ xin, jix yalon Jehová tet Gad, jaꞌton jun yakꞌomal servil, jun chi aon oc snaꞌbꞌal naj rey David, jix yalon jaxca tiꞌ: 10 Asiꞌ, al tet naj David jaxca tiꞌ: Ey oxebꞌ tujan tzetyetal oj skeꞌ wuneni; jaach oj ja sicꞌle tzetyetal oj wunne, ẍi Jehová. 11 Yuxan jix too naj Gad yilon naj rey David, jix yalon tet jaxca tiꞌ:

—Jaꞌ Jehová chi alon jaxca tiꞌ: Cha sicꞌle xol wan syaꞌilal tiꞌ: 12 Ey oxebꞌ abꞌil wail, ey pax oxebꞌ xꞌaaw oj jex makꞌle cam yin jowal yu ebꞌ je cajat, ey pax oxebꞌ cꞌual syaꞌilal oj jul yul cu nación tiꞌ, jaꞌton yespada Jehová; yutol jaꞌ jun yángel oj iꞌon jul jun syaꞌilal bꞌey masanil yul conobꞌ Israel tiꞌ. Yuxan cha sicꞌle tinaniꞌ yet watxꞌ oj skeꞌ wakꞌon spaj tet Naj jix jin chejontej, ẍi naj Gad tet naj David.

13 Jix yalon naj rey David tet naj Gad, jaxca tiꞌ:

—Caw jow xacꞌal jix yun jin michꞌcha chi wabꞌe. Yel xacꞌal mi watxꞌ tol jaꞌ Jehová chi eyqꞌuey skꞌabꞌ wibꞌan, man ojabꞌ jaꞌ oj ebꞌ ánima chi low skꞌabꞌ win, yutol wotaj tol miman scamcꞌulal Naj, ẍi naj rey David tuꞌ.

14 Jix yaontej jun syaꞌilal Jehová yibꞌan conobꞌ Israel, yuxan jix cam 70,000 ebꞌ Israel. 15 Jix ẍejontej jun yángel Jehová yet chi akꞌle lawoj el Jerusalén. Jaꞌ yet lalan yakꞌon lawoj tuꞌ, jix cus scꞌul Jehová yu jun syaꞌilal tuꞌ, jix yalon tet jun yángel lalan yakꞌon cam ánima tuꞌ jaxca tiꞌ: Kꞌojbꞌilxa, ocan tucanoj, ẍi Dios tet.

Jaꞌ jun yángel Jehová tuꞌ, jatuꞌ eyecꞌ bꞌey lalan stecꞌwi tiriw naj Ornán, Jebuseo. 16 Jaꞌ yet jix too tꞌanan naj rey David, jix yiloni tol eyecꞌ jun yángel Jehová snan xol satcan yetoj txꞌotxꞌ txꞌotxꞌ tiꞌ, yetoj jun espada mitxꞌbꞌil a yu, lalan yetcꞌulnentoj yespada tuꞌ yin conobꞌ Jerusalén. Jaꞌ yet tuꞌ, jix ey noan naj rey David yetoj ebꞌ icham winaj yeoc yul conobꞌ Israel masantaꞌcꞌal bꞌey sat txꞌotxꞌ, eyoc an eel pichile yu ebꞌ. 17 Jix yalon naj rey David tet Dios jaxca tiꞌ:

—Jaach jin Diosal, jain ton jix walaꞌ tol chi iꞌle a sbꞌisil ebꞌ conobꞌ. Jaꞌ yu jun tuꞌ, yuxan jix oc jin penail. ¿Tumi ey junoj spenail jix yun ebꞌ ánima tiꞌ? Jaach jin Diosal, chi wal ey jaach, tol jaꞌ jun syaꞌilal tiꞌ, jaꞌ ojabꞌ wibꞌan chi eyqꞌuey yetoj ebꞌ wicꞌaal, yuxan cꞌam ojabꞌ cha wakꞌ lawoj jun conobꞌ tiꞌ, ẍi naj.

18 Jix yalon jun yángel Jehová tet naj Gad, tol chi yal tet naj rey David, tol chi swaꞌne a jun yet xaambꞌal bꞌey chi tecꞌwi tiriw naj Ornán, Jebuseo. 19 Yu tuꞌ xin, jix too naj rey swaꞌnen a jun yet xaambꞌal sattaj Jehová, jaxca jix yun yal-le tet. 20 Jaꞌ naj Ornán yetoj canwan scꞌaal, lalan stecꞌwi tiriw yet jix yilon ebꞌ tol eyecꞌ jun yángel Jehová tituꞌ, jaꞌ ebꞌ scꞌaal naj Ornán tuꞌ, jix too yewbꞌa el sbꞌa ebꞌ. 21 Jaꞌ yet jix yilon naj Ornán tuꞌ tol lalan yapni oc naj rey bꞌey scawilal tuꞌ, jix eltej naj bꞌey chi tecꞌwi tiriw tuꞌ, jix ey noan sattaj naj rey. 22 Jix lawi tuꞌ, jix yalon naj rey tet naj Ornán, jaxca tiꞌ:

—Tol oj wal chi el yin ja cꞌul, tol cha wakꞌ jun txꞌotxꞌ bꞌey chach tecꞌwi tiriw tiꞌ ey jin an, yet chin waꞌne a junoj yet xaambꞌal tet Jehová, yet chi oc tucan jun syaꞌilal tiꞌ xol conobꞌ tiꞌ. Txon el txꞌotxꞌ ey jin an, yal cꞌal jantaj cha kꞌanaꞌ, ẍi naj rey.

23 Jix takꞌwi naj Ornán tet naj jaxca tiꞌ:

—Jaach rey, chi skeꞌ wakꞌon txꞌotxꞌ ey jaach an, catuꞌ cha waꞌnen tzet chi yoche ja cꞌul, catuꞌ chi wakꞌon cꞌal pax junoj noꞌ icham wacax, yet chi oc noꞌ yin xaambꞌal, yetoj cꞌal teꞌ lutxꞌbꞌal tiriw tiꞌ, chi skeꞌ yoc teꞌ yin siꞌal, jaꞌ ixim tiriw tiꞌ chi skeꞌ yoc yin ofrendail. Masanil wan tuꞌ chi wakꞌ ey jaach, ẍi naj Ornán tuꞌ tet naj rey.

24 Jix lawi tuꞌ, jix takꞌwi naj rey David jaxca tiꞌ:

—Yuwal dios ey jaach yu masanil wan tuꞌ, jain tiꞌ sowalil tol oj jin man masanil wan tuꞌ ey jaach, yal cꞌal jantaj cha kꞌanaꞌ, yutol ma skeꞌ wiꞌon ecꞌ tzetyetal tol ja wet yeocoj, catuꞌ oj wakꞌon yin xaambꞌal tet Jehová. Ma skeꞌ wakꞌon junoj tzetyetal tol man oj wabꞌ syaꞌil jin manoni, ẍi naj rey tuꞌ.

25 Queytuꞌ jix yun smanon jun txꞌotxꞌ tuꞌ naj rey David yin 600 siclo chꞌen oro. 26 Jaꞌ tituꞌ jix swaꞌne a jun yet xaambꞌal naj, jix yakꞌon tzꞌaꞌ xaambꞌal, cꞌal xaambꞌal yet watxꞌcꞌulal. Jix lawi tuꞌ, jix txali naj tet Jehová; jix takꞌwi Jehová tet naj, jix yaontej jun kꞌakꞌ bꞌey satcan jix eyol yibꞌan jun xaambꞌal tuꞌ. 27 Jix lawi tuꞌ xin, jix yalon Jehová tet jun ángel tuꞌ, tol chi scꞌubꞌa a yespada yul stzꞌuumal.

28 Jaꞌ yet jix yilon naj rey David tol jix takꞌwi Jehová tet, bꞌey ey stecꞌbꞌal tiriw naj Ornán, Jebuseo tuꞌ, jix yakꞌon wanxa xaambꞌal tituꞌ. 29 Caxcꞌal mi jaꞌ jun Kꞌap Na jix swaꞌne a naj Moisés tet Jehová bꞌey txꞌotxꞌ cusiltaj txꞌotxꞌ, cꞌal jun yet xaambꞌal bꞌey chi tzꞌaꞌ xaambꞌal tuꞌ, bꞌey chi oc ebꞌ yin eyilal, bꞌey tzalan Gabaón. 30 Jaꞌ yu jun tuꞌ, ma skeꞌ stoo naj rey David tituꞌ yet chi too skꞌanle naj tet Jehová, yutol caw chi xiw scꞌul naj yet jix yilon jun espada iꞌbꞌil oc yu jun yángel Jehová tuꞌ.