2 Jix lawi tuꞌ, jix yalon naj rey David tol chi yambꞌale oc masanil ebꞌ txꞌoj conobꞌal caan ecꞌ xol ebꞌ Israel; jix sicꞌle el ebꞌ josom chꞌen, jaꞌton chꞌen oj oc yin swaꞌxubꞌal stemplo Jehová. 3 Jix syambꞌan cꞌal pax miman chꞌen hierro yet chi oc chꞌen yin lawuẍal chi kꞌanle yin spuertail, cꞌal chꞌen chi oc yet chi smitxꞌlen sbꞌa steꞌal, yetoj cꞌal pax jun miman bꞌulan chꞌen bronce cꞌamxa chi skeꞌ yechele jantaj yalil chꞌen, 4 yetoj cꞌal pax teꞌ kꞌuteꞌ cꞌamxa chi naꞌcha jantaj sbꞌisil teꞌ jix yambꞌale ocoj, yutol jaꞌ ebꞌ caan bꞌey Sidonio cꞌal ebꞌ caan bꞌey Tiro, caw miman teꞌ kꞌuteꞌ tuꞌ jix yiꞌtej ebꞌ.

5 Yutol jix snaꞌ naj rey David, jaxca tiꞌ: Jaꞌ naj jin cꞌaal Salomón caw achꞌeto naj, yutol eyto stzꞌajna snaꞌbꞌal naj. Jaꞌ jun stemplo Jehová oj waꞌxoj tuꞌ, tol miman oj yunne, yel xacꞌal oj bꞌina yu swatxꞌil yili bꞌey masanil yul yibꞌankꞌinal tiꞌ. Yu jun tuꞌ, yuxan sowalil oj jin yambꞌa can oc masanil tzetyetal oj oc yin, ẍi naj.

Yu jun tuꞌ, yuxan caw ecꞌal tzetyetal jix syambꞌa can oc yet cꞌamto chi cami. 6 Jix lawi tuꞌ xin, jix awtele naj Salomón yu naj rey David, jaꞌton scꞌaal, jix yalon tet tol jaꞌ oj waꞌnen a jun stemplo Jehová, sDiosal conobꞌ Israel. 7 Jix yalon tet jaxca tiꞌ: Jaach jin cꞌaal, ey wal oc yin jin naꞌbꞌal tol chin waꞌne a junoj stemplo Jehová cu Diosal. 8 Asan xin, jaꞌ Jehová jix alon ey jin jaxca tiꞌ: Jaach tiꞌ caw miman chicꞌ jix el ja wu, yutol ecꞌal ánima jix cam yu jowal, yu jun tuꞌ, yuxan man jaach oj ja waꞌne a jun jin templo tuꞌ. 9-10 Yuxan ey jun ja cꞌaal oj oc ja qꞌuexeloj tol cꞌam bꞌey oj yakꞌ jowal. Tol oj waoc watxꞌcꞌulal xol yetoj ebꞌ scajat. Tol oj cancan yin tzalacꞌulal yetoj ebꞌ nacionlaj. Yu jun tuꞌ, yuxan, oj yij Salomón.^a Jaꞌ yul stiempoal tuꞌ oj wakꞌ watxꞌcꞌulal cꞌal tzalacꞌulal bꞌey jin conobꞌ Israel. Jaꞌ oj waꞌnen a jun jin templo tuꞌ. Jaxca wal jin cꞌaal oj yun ocoj; jain xa jaxca wal smam oj wun ocoj, catuꞌ oj waon cꞌal oc yopiso bꞌey Israel yin junelne, ẍi Jehová ey jin an. 11 Jix yalon naj David tet scꞌaal jaxca tiꞌ: Jaꞌ tinaniꞌ jaach jin cꞌaal, jaꞌ ojabꞌ Jehová cu Diosal, oj oc cꞌal ja wetoj yet oj ja waꞌnen a jun templo tuꞌ, jaxca jix yun yakꞌon can stiꞌ tol jaach oj ja waꞌne aoj. 12 Jaꞌ ojabꞌ Jehová oj akꞌon ja jelanil cꞌal ja naꞌbꞌal, yet watxꞌ jaꞌ yet oj yakꞌon ja wopiso Naj yibꞌan cu conobꞌ Israel tiꞌ, oj ja jije masanil ẍejbꞌanil Naj. 13 Ta oj ja wun jaxca tuꞌ, watxꞌ cꞌal oj jaach elocoj, ta tol oj ja jije masanil sley Jehová, cꞌal masanil tzetyetal jix yal naj Moisés tet cu conobꞌ Israel tiꞌ. Akꞌ ja wip, tecꞌan cꞌal cha wute ja bꞌa. Cꞌam cꞌal cha wakꞌ caabꞌcꞌulal, cꞌam ojabꞌ chach xiwaoj, catuꞌ cꞌam ojabꞌ chach cꞌuumbꞌi ja wunen jun mulnail tiꞌ. 14 Ilaꞌ jin jain tiꞌ, jix wakꞌ wip jin yambꞌan oc 66,000 quintal chꞌen oro yetoj 660,000 quintal chꞌen plata, yetoj jun miman bꞌulan chꞌen bronce, cꞌal chꞌen hierro tol cꞌamxa chi skeꞌ yechele jantaj yalil chꞌen. Catuꞌ miman cꞌal pax teꞌ teꞌ jix jin yambꞌa ocoj, cꞌal chꞌen chꞌen, yu swaꞌxubꞌal a stemplo Jehová, Eyto cꞌal pax stzꞌajil chꞌen oj ja yambꞌa oc jaach tiꞌ. 15-16 Ecꞌal pax ebꞌ mulnawom eyecꞌ yul ja kꞌabꞌ oj mulna ja wetoj, ebꞌ josom chꞌen, ebꞌ albañil, cꞌal ebꞌ josom teꞌ. Cꞌamxa chi bꞌischa jantaj ebꞌ winaj tol caw jelan swaꞌnen yal cꞌal tzet mulnail, jaxca yin chꞌen oro, yin chꞌen plata, yin chꞌen bronce cꞌal yin chꞌen hierro. Yu tuꞌ xin, oc ojabꞌ mulnail ja wu, jaꞌ ojabꞌ Jehová oj colwa cꞌal ja wetoj, ẍi naj rey David tet Salomón.

17 Jix lawi tuꞌ xin, jix yalon tet masanil ebꞌ eyoc yin yopiso yetoj, tol chi colwa ebꞌ yin mulnail yetoj Salomón, jaꞌton scꞌaal; jix yalon tet ebꞌ jaxca tiꞌ: 18 Jaꞌ Jehová cu Diosal lalan cꞌal scolwa ketoj. Jaꞌ jix akꞌon cꞌal watxꞌcꞌulal cu xol cu masanil bꞌey cu conobꞌ tiꞌ, yutol jaꞌ Naj jix aon oc masanil wan nación tiꞌ yul jin kꞌabꞌ, yuxan jix oc can ebꞌ yul skꞌabꞌ Jehová, cꞌal yul cu kꞌabꞌ jaon sconobꞌ jon tiꞌ. 19 Yu tuꞌ xin, awej cꞌal oc yin je cꞌul je yaon oc je bꞌa yul skꞌabꞌ Jehová cu Diosal. Yelcꞌulal che yaoc yin je cꞌul je waꞌnen a stemplo bꞌey chi iꞌle can sbꞌi, yet watxꞌ oj octoj teꞌ Scaẍail Swa Kꞌane Jehová cu Diosal yul, cꞌal yetoj masanil mitxꞌkꞌabꞌe tol yet Jehová yeocoj, ẍi naj rey David tet naj Salomón.