7 Jaꞌ ebꞌ scꞌaal Guersón, jaꞌton ebꞌ tiꞌ: Ladán cꞌal Simí. 8 Ebꞌ scꞌaal Ladán ey oxwan ebꞌ: Jaꞌton Jehiel, naj bꞌabꞌel, yetoj naj Zetam cꞌal Joel. 9 Ebꞌ scꞌaal Simí, ey oxwan ebꞌ, jaꞌton: Selomit, Haziel, cꞌal Harán. Jaꞌton wan tiꞌ yaaw yeoc xol ebꞌ yicꞌaal Ladán. 10 Jaꞌ ebꞌ scꞌaal Simí, ey canwan ebꞌ, jaꞌton: Jáhat, Zizá, Jeús, cꞌal Beriá. 11 Jaꞌ naj bꞌabꞌel, jaꞌton Jáhat, jun yet scaabꞌ, jaꞌton Zizá, jal pax Jeús cꞌal Beriá cꞌam txꞌial yicꞌaal ebꞌ, yuxan cꞌam chi tzaji ebꞌ yilon yopiso, yuxan junne tujan jix yun oc ebꞌ.

12 Jaꞌ ebꞌ scꞌaal Quehat, ey canwan ebꞌ, jaꞌton Amram, Ishar, Hebrón, cꞌal Uziel. 13 Ebꞌ scꞌaal Amram, jaꞌton Aarón cꞌal Moisés. Jix sicꞌle el naj Aarón yetoj ebꞌ yicꞌaal yu Dios yin junelne, yu yilon wan tzetyetal ebꞌ tol yet Jehová yeocoj, yu yakꞌon tzꞌaꞌ incienso ebꞌ, cꞌal yijbꞌan eyilal ebꞌ, cꞌal yalon watxꞌ kꞌane yibꞌan ebꞌ conobꞌ yin sbꞌi Jehová. 14 Jal pax ebꞌ yicꞌaal Moisés naj ẍejabꞌ Dios, jix oc ebꞌ stzꞌajiloj yicꞌaal Leví.

15 Jaꞌ ebꞌ scꞌaal naj Moisés, jaꞌton Guersón cꞌal Eliézer. 16 Jaꞌ xol ebꞌ yicꞌaal Guersón jaꞌ naj Sebuel, bꞌabꞌel yeocoj. 17 Jaꞌ xol ebꞌ yicꞌaal Eliézer, jaꞌton Rehabías, asan jun scꞌaal Eliézer tuꞌ; jal pax Rehabías tuꞌ, ecꞌal ebꞌ scꞌaal.

18 Jaꞌ jun bꞌabꞌel scꞌaal Ishar, jaꞌton Selomit. 19 Jaꞌ ebꞌ scꞌaal Hebrón, naj bꞌabꞌel, jaꞌton Jeraías, naj scaabꞌ, jaꞌton Amarías, naj yox, jaꞌton Jahaziel, naj yet scan, jaꞌton Jecamán. 20 Jaꞌ ebꞌ scꞌaal Uziel, jaꞌton Micaías naj bꞌabꞌel, cꞌal Isías naj yet scaabꞌ.

21 Jaꞌ ebꞌ scꞌaal Merarí, jaꞌton Mahli cꞌal Musí. Ebꞌ scꞌaal Mahli, jaꞌton Eleazar cꞌal Quis. 22 Jaꞌ naj Eleazar tuꞌ cꞌam cꞌal junoj scꞌaal, asan scutzꞌin naj ey, jaꞌton ebꞌ ix tuꞌ jix nupi yetoj yican, jaꞌton yetoj ebꞌ scꞌaal naj Quis. 23 Jal pax ebꞌ scꞌaal Musí, ey oxwan ebꞌ, jaꞌton: Mahli, Éder cꞌal Jeremot.

24 Jaꞌton ebꞌ tuꞌ yicꞌaal Leví ebꞌ masanil, jatacꞌalaꞌ jix yun stzꞌibꞌele sbꞌi ebꞌ, ebꞌ ecꞌbꞌan 20 abꞌil skꞌinal yul yuunal yet sbꞌisbꞌal, jaꞌton ebꞌ tuꞌ eyoc yopiso bꞌey templo.

25 Jix yalon naj rey David jaxca tiꞌ: Tuxa jix yakꞌ swatxꞌcꞌulal Jehová cu Diosal kibꞌan jaon sconobꞌ jon tiꞌ, jaꞌ jix sicꞌon can eloj tol jaꞌ bꞌey conobꞌ Jerusalén tiꞌ oj eecꞌoj. 26 Yu jun tuꞌ xin, jaꞌ ebꞌ Levita man xacꞌal oj bꞌatxle ecꞌ skꞌap na Jehová yu ebꞌ, yetoj cꞌal jantaj mitxꞌkꞌabꞌe chi kꞌanle yet chi oc yin eyilal, ẍi naj David.

27 Queyton tuꞌ jix yun jaxca tzet jix yun yalon can naj rey David yin slawubꞌal, yuxan jix iꞌle a sbꞌisil ebꞌ yicꞌaal Leví; ebꞌ ecꞌbꞌan 20 abꞌil skꞌinal, yu yoc ebꞌ yin yakꞌomal servil bꞌey stemplo Jehová. 28 Jaꞌ ebꞌ tuꞌ jix can yul skꞌabꞌ ebꞌ naj yakꞌomal xaambꞌal, jaꞌton ebꞌ yicꞌaal Aarón, yin yoc yopiso ebꞌ bꞌey stemplo Jehová, cꞌal yilon sattaj eltoj templo ebꞌ, cꞌal yul-laj cuarto; cꞌal yilon ebꞌ sajbꞌanele el masanil mitxꞌkꞌabꞌe tol asan Jehová ey yet. Chi yilon cꞌal pax wanxa mulnail ebꞌ bꞌey templo tuꞌ. 29 Jaꞌ ebꞌ chi waꞌnen ixim pan chi akꞌle sattaj Jehová, cꞌal ixim jarina chi akꞌle yin ofrendail, cꞌal ixim wocꞌox pan cꞌam yich, yetoj cꞌal wan ofrenda tol chi waꞌnele yul ẍaltin, cꞌal ixim jarina calbꞌil yetoj aceite olivo, chi yilon cꞌal pax wan echbꞌal ebꞌ chi kꞌanbꞌalnele yin ofrendail. 30 Yetoj cꞌal pax oj, sowalil tol ey cꞌal ecꞌ ebꞌ bꞌey templo, yu yalon yu diosal ebꞌ, cꞌal yalon watxꞌ kꞌane ebꞌ tet Jehová yet junjun skꞌinibꞌalil, cꞌal junjun yeycꞌualil, 31 cꞌal yet chi akꞌle tzꞌaꞌ xaambꞌal tet Jehová yet scꞌual xewilal, yetoj yet scꞌual kꞌin yet chi ali xꞌaaw, yetoj cꞌal wanxa kꞌin caw miman yeloc apnoj. Chi akꞌwi cꞌal servil Jehová yu ebꞌ jatacꞌalaꞌ sbꞌisil ebꞌ, cꞌal mulnail akꞌbꞌil swaꞌne ebꞌ. 32 Jaꞌ ebꞌ chi teynen cꞌal pax Kꞌap Na bꞌey chi cu chaꞌle cu bꞌa yetoj Dios, cꞌal bꞌey scalubꞌal Naj; cꞌal smulna ebꞌ bꞌey templo yetoj ebꞌ yakꞌomal xaambꞌal, jaꞌton ebꞌ yicꞌaal Aarón.