24
Yin cꞌal xolilal chi yun yilon yopiso ebꞌ yicꞌaal Aarón tuꞌ. Jaꞌ ebꞌ scꞌaal Aarón tuꞌ, jaꞌton: Nadab, Abihú, Eleazar cꞌal Itamar. 2 Jaꞌ naj Nadab yetoj Abihú, bꞌabꞌel jix cam ebꞌ sattaj smam, cꞌam cꞌal junoj scꞌaal ebꞌ jix ali, yuxan asan naj Eleazar yetoj Itamar jix oc yin yakꞌomaloj servil.3 Yin junjun tujan jix yun spoꞌole ecꞌ ebꞌ yakꞌomal xaambꞌal yu naj rey David, yetoj scolwal naj Sadoc yicꞌaal Eleazar, cꞌal Ahimélec yicꞌaal Itamar. 4 Jaꞌ yet jix yilontej ebꞌ tol jaꞌ ebꞌ yicꞌaal Eleazar ecꞌal sbꞌisil ebꞌ yintaj ebꞌ yicꞌaal Itamar, yuxan ey wajlajonebꞌ tujan jix yun spoꞌole ecꞌ ebꞌ yicꞌaal Eleazar, jal ebꞌ yicꞌaal Itamar asanne waxajebꞌ tujan ebꞌ. 5 Yin xolilal jix yun sicꞌcha oc junjun tujan ebꞌ, jatacꞌalaꞌ tzet jix yun yeyqꞌuey yibꞌan ebꞌ, yutol ey ebꞌ mimej winaj sicꞌbꞌil oc yin mimej opiso sattaj Dios xol ebꞌ yicꞌaal Eleazar, cꞌal xol ebꞌ yicꞌaal Itamar. 6 Jaꞌ ebꞌ yaaw yeoc xol ebꞌ yicꞌaal Eleazar, yetoj cꞌal xol ebꞌ yicꞌaal Itamar, jix sicꞌcha oc ebꞌ yin xolilal, jun yin yet Eleazar, junxa pax yin yet Itamar, jaxca cꞌal tuꞌ jix yun sbꞌeytoj ebꞌ yin yopiso tuꞌ masanil. Jaꞌ Semaías naj tzꞌibꞌlom, scꞌaal Natanael, jun Levita, jaꞌ jix tzꞌibꞌen sbꞌi ebꞌ jatacꞌalaꞌ yeoc ebꞌ yin xolilal. Jaꞌ naj rey yetoj cꞌal ebꞌ eyoc yin yopiso yetoj, ebꞌ yakꞌomal xaambꞌal, jaꞌton Sadoc cꞌal Ahimélec scꞌaal Abiatar, yetoj cꞌal ebꞌ yaaw yeoc xol ebꞌ yakꞌomal xaambꞌal cꞌal xol ebꞌ Levita, jaꞌ ebꞌ tuꞌ jix wa al-lnen masanil.
7-18 Jaꞌton sbꞌi junjun tujan ebꞌ yin xolilal tiꞌ, jatacꞌalaꞌ jix yun sicꞌcha oc ebꞌ: Tol ey 24 tujan ebꞌ yin masanil: Jaꞌton Joiarib, Jedaías, Harim, Seorim, Malquías, Mijamín, Cos, Abías, Jesús, Secanías, Eliasib, Jaquim, Hupá, Jesebab, Bilgá, Imer, Hezir, Pisés, Petahías, Hezequiel, Jaquín, Gamul, Delaías, Maazías.
19 Queytuꞌ jix yun spoꞌole ecꞌ ebꞌ yakꞌomal xaambꞌal yin xolilal yet chi akꞌwi servil ebꞌ bꞌey templo, jatacꞌalaꞌ sleyal Jehová cu Diosal jaon Israel jon tiꞌ, jaxca jix yun yalon tet Aarón, jaꞌton smam icham ebꞌ.
20 Jaꞌton sbꞌi ebꞌ yaaw yeoc xol wanxa ebꞌ yicꞌaal Leví tiꞌ: Jehedías yicꞌaal Subael titnaj yin yicꞌaal Amram. 21 Jaꞌ naj Isías bꞌabꞌel xol ebꞌ yicꞌaal Rehabías. 22 Jáhat yicꞌaal Selomit titnaj yin yicꞌaal Ishar. 23 Jerías, Amarías, Jahaziel cꞌal Jecamán, yicꞌaal Hebrón ebꞌ tiꞌ, jatacꞌalaꞌ jantaj sbꞌisil yabꞌilal ebꞌ yin xolilal. 24 Samir yicꞌaal Micaías titnaj yin yicꞌaal Uziel. 25 Zacarías scꞌaal Isías yuẍtaj Micaías. 26 Mahli, Musí, cꞌal Jaazías, scꞌaal Merarí ebꞌ. 27 Beno, Sóham, Zacur, cꞌal Ibrí, scꞌaal Jaazías ebꞌ, titnaj ebꞌ yin Merarí. 28-29 Cawan ebꞌ scꞌaal Mahli, jaꞌton Eleazar cꞌal Quis. Jaꞌ Eleazar tuꞌ, cꞌam scꞌaal. Jal pax naj Quis xin, ey jun scꞌaal, jaꞌton Jerahmeel. 30 Jaꞌ ebꞌ scꞌaal Musí, jaꞌton Mahli, Éder cꞌal Jerimot.
Jaꞌton ebꞌ tuꞌ yaaw yeoc xol ebꞌ yicꞌaal Leví. 31 Jaꞌ ebꞌ tuꞌ jix sicꞌle cꞌal pax oc ebꞌ yin xolilal yin yopiso jaxca jix yun ebꞌ yican ebꞌ, jaꞌton ebꞌ yicꞌaal Aarón. Jaꞌton bꞌey sattaj naj rey David, yetoj Sadoc cꞌal Ahimélec cꞌal ebꞌ yaaw yeoc xol ebꞌ yicꞌaal Leví, cꞌal ebꞌ yakꞌomal xaambꞌal, jatuꞌ jix sicꞌle oc ebꞌ tuꞌ. Laan cꞌal jix utele ebꞌ yaaw yeoc xol yicꞌaal naj bꞌabꞌel winaj, cꞌal xol ebꞌ yicꞌaal naj slawubꞌal.