2 Jaꞌ xol ebꞌ yicꞌaal Asaf, jaꞌton: Jacur, José, Netanías cꞌal Asarela. Jaꞌ mactxequel chi ijbꞌan ebꞌ, jaꞌton Asaf. Jaꞌ chi alon el skꞌane Dios yet chi yalon naj rey.

3 Jaꞌ xol ebꞌ yicꞌaal Jedutún ey wajwan ebꞌ, jaꞌton: Jedalías, Serí, Isaías, Simí, Hasabías cꞌal Matatías. Jaꞌ mactxequel chi ijbꞌan ebꞌ, jaꞌton Jedutún; jaꞌ chi alon el skꞌane Dios yet chi bꞌitni yetoj arpa yu yal-le yu diosal, cꞌal yal-le watxꞌ kꞌane tet Dios.

4 Jaꞌ xol ebꞌ yicꞌaal Hemán, jaꞌton ebꞌ tiꞌ: Buquías, Matanías, Uziel, Sebuel, Jeremot, Hananías, Hananí, Eliatá, Guidalti, Romamti-ézer, Josbecasa, Malotí, Hotir, cꞌal Mahaziot. 5 Jaꞌ masanil wan tiꞌ scꞌaal Hemán ebꞌ; jaꞌ naj Hemán tuꞌ, akꞌom naꞌbꞌale yeoc tet naj rey. Ey canlajonwan scꞌaal naj Hemán jix akꞌle tet yu Dios, yetoj oxwan scutzꞌin, jix yun bꞌey jix yakꞌ can stiꞌ Dios tet, yu yiꞌle a can yu. 6 Jaꞌ masanil ebꞌ tuꞌ, jaꞌ smam ebꞌ chi ijbꞌan yin bꞌit yet chi oc eyilal bꞌey stemplo Jehová. Chi tenle chꞌen patxquiltaj chꞌen, salterio cꞌal cítara yu ebꞌ.

Jaꞌ naj Asaf, Jedutún cꞌal Hemán eyoc ebꞌ yalan ẍejbꞌanil naj rey. 7 Jaꞌ sbꞌisil ebꞌ cuywinaj yin sbꞌitni tet Jehová, jaꞌton: Asaf, Jedutún, Hemán yetoj ebꞌ scꞌaal junjun ebꞌ, cꞌal yican ebꞌ, ey 288 ebꞌ yin masanil.

8 Yin cꞌal xolilal jix yun spoꞌole ecꞌ ebꞌ, chi octoj ebꞌ icham winaj cꞌal ebꞌ achꞌe, ebꞌ cuywinajxa cꞌal ebꞌ lalanto scuywi.

9-31 Jaꞌ yet jix lawi yoc sicꞌwal yin ebꞌ tuꞌ, jix ale yoc ebꞌ yin xolilal, ey 24 tujan ebꞌ yin masanil tol jacꞌal oc ebꞌ. Jaꞌ yin junjun tujan, ey lacawan ebꞌ. Jaꞌ xol ebꞌ lacawan tuꞌ, ey jun ijbꞌawom: Jaꞌton, José yicꞌaal Asaf, Guedalías, Zacur, Izri, Netanías, Buquías, Jesarela, Jesahías, Matanías, Simí, Azarel, Hasabías, Subael, Matatías, Jeremot, Hananías, Josbecasa, Hananí, Malotí, Eliatá, Hotir, Guidalti, Mahaziot, Romamti-ézer.