Jaꞌ xol ebꞌ yicꞌaal Coré, jaꞌton: Meselemías, scꞌaal Coré yicꞌaal Asaf. 2 Jaꞌ ebꞌ scꞌaal Meselemías yin xolilal tiꞌ: Jaꞌton Zacarías, Jediael, Zebadías, Jatniel, 3 Elam, Johanán cꞌal Elioenai.

4-5 Jaꞌ Dios jix yakꞌ syaaxilal yibꞌan naj Obed-edom yuxan caw ecꞌal sbꞌisil yuninal naj. Jaꞌton ebꞌ scꞌaal yin xolilal tiꞌ: Semaías, Jozabad, Joah, Sacar, Natanael, Amiel, Isacar, cꞌal Peultai.

6 Jaꞌ Semaías, scꞌaal Obed-edom naj, ey ebꞌ scꞌaal caw bꞌinabꞌil jix yun yeloc xol ebꞌ yican, yutol caw jelan ebꞌ. 7 Jaꞌ ebꞌ scꞌaal Semaías, jaꞌton: Otní, Rafael, Obed, Elzabad, Elihú cꞌal Samaquías; caw jelan ebꞌ. 8 Jaꞌ masanil wan tiꞌ, yicꞌaal Obed-edom cꞌal ebꞌ, masanil ebꞌ cꞌaale, cꞌal ebꞌ icane, caw tecꞌan ebꞌ, ey yip ebꞌ smulnai. Ey 62 ebꞌ yicꞌaal naj Obed-edom tuꞌ yin masanil.

9 Ebꞌ scꞌaal, cꞌal ebꞌ yican Meselemías, ey 18 ebꞌ winaj tol caw jelan.

10 Jaꞌ ebꞌ scꞌaal Hosá, yicꞌaal Merarí, jaꞌton: Simrí, jaꞌ eyoc yin yaawil. Caxcꞌal manaj bꞌabꞌel cꞌaale yeocoj, jaꞌ smam jix aon oc yin yaawil tuꞌ. 11 Jaꞌ naj scaabꞌ, chi yij Hilquías, naj yet yox, Tebalías, naj yet scan Zacarías. Jaꞌ ebꞌ scꞌaal yican Hosá tiꞌ, ey oxlajonwan ebꞌ yin masanil.

12 Yin junjun tujan jix yun spoꞌocha ecꞌ ebꞌ teynem templo, jatacꞌalaꞌ yeoc smam icham ebꞌ, catuꞌ jix txꞌoxle smulnail ebꞌ bꞌey stemplo Jehová, jaxca cꞌal jix yun wanxa ebꞌ yet Levitail ebꞌ. 13 Yin xolilal jix yun xꞌoxle tzet puertail chi steyne junjun tujan ebꞌ, caxcꞌal achꞌe ma icham winaj ebꞌ.

14 Jaꞌ naj Selemías, yetoj ebꞌ eyoc yetoj, jaꞌ ebꞌ chi teynen puerta yetcꞌulal bꞌey chi aol cꞌu, jaꞌ naj Zacarías scꞌaal tol jelan snaꞌbꞌal, jaꞌ ebꞌ chi teynen puerta yetcꞌulal norte, yetoj ebꞌ eyoc yetoj. 15 Jaꞌ naj Obed-edom, yetoj ebꞌ eyoc yetoj, jaꞌ ebꞌ chi teynen puerta yetcꞌulal sur; jaꞌ ebꞌ chi teynen cꞌuanbꞌal bꞌey templo. 16 Jaꞌ naj Supim, cꞌal Hosá yetoj ebꞌ eyoc yetoj ebꞌ, jaꞌ ebꞌ chi teynen puerta yetcꞌulal bꞌey chi too cꞌu, jaꞌton bꞌey ey jun puerta yet Saléquet bꞌey chi atoj bꞌe. Jaꞌ ebꞌ eyoc yetoj ebꞌ ijbꞌawom tuꞌ, yin xolilal chi yun steynen puerta ebꞌ. 17 Junjun cꞌal cꞌu, ey wajwan chi teynen puerta yetcꞌulal bꞌey chi aol cꞌu, canwan yetcꞌulal norte, canwan yetcꞌulal sur, jal pax cꞌuanbꞌal bꞌey templo tuꞌ xin, catajwan cꞌal chi teynen junjun puerta. 18 Jaꞌ bꞌey scawilal sattaj eltoj templo yetcꞌulal bꞌey chi too cꞌu, canwan chi teynen bꞌey stiꞌ bꞌe, cawan chi teynen bꞌey yul stiꞌ na tuꞌ. 19 Jaxca ton tuꞌ jix yun spoꞌole ecꞌ yopiso ebꞌ yicꞌaal Coré cꞌal ebꞌ yicꞌaal Merarí.

20 Ey cꞌal pax wanxa ebꞌ yet Levitail ebꞌ chi ilon cꞌuanbꞌal bꞌey templo, cꞌal bꞌey yaman chꞌen ofrenda tol yet Jehová yeocoj. 21 Jal pax ebꞌ scꞌaal Ladán, jaꞌton ebꞌ jix tit yin yicꞌaal Guersón cꞌal Jehiel. 22 Jaꞌ ebꞌ scꞌaal Jehiel, jaꞌton Zetam cꞌal Joel. Jaꞌ ebꞌ chi teynen cꞌuanbꞌal bꞌey templo, yetoj ebꞌ eyoc yetoj ebꞌ.

23 Jix akꞌle cꞌal pax smulnail ebꞌ yicꞌaal Amram, jaꞌton ebꞌ yicꞌaal Ishar, Hebrón, cꞌal Uziel. 24 Jaꞌ jun mactxequel eyoc yibꞌan yilon jantaj tzetyetal ey bꞌey templo, jaꞌton naj Sebuel, yicꞌaal Moisés, titnaj yin yicꞌaal Guersón.

25 Jaꞌ naj Sebuel tiꞌ, yican sbꞌa yetoj Selomit, yutol jaꞌ smam icham Selomit tuꞌ, jaꞌton Eliézer yuẍtaj Guersón, smam icham Sebuel. Jaꞌ ebꞌ smam icham Selomit yin xolilal tiꞌ: Jaꞌton Eliézer, Rehabías, Isaías, Joram, cꞌal Zicrí.

26 Jaꞌ Selomit, yetoj ebꞌ yican chi teynen tzetyetal akꞌbꞌil tet Dios yu naj rey David, yu ebꞌ yaaw yeoc xol junjun tujan, cꞌal junjun icꞌaaleal, cꞌal yu ebꞌ mimej yopiso xol ebꞌ soldado.

27 Jaꞌ wan tzetyetal tuꞌ, jaꞌton tzet jix yiꞌ ebꞌ bꞌey jix oc jowal, jix yakꞌ yu skꞌanbꞌalnele bꞌey templo. 28 Jaꞌ tituꞌ ey cꞌal pax ecꞌ masanil tzetyetal jix yakꞌ can ebꞌ tiꞌ, naj Samuel ẍejabꞌ Dios, naj Saúl scꞌaal Quis, naj Abner scꞌaal Ner, cꞌal naj Joab, yuneꞌ ix Seruiá. Masanil wan tzetyetal sicꞌbꞌil el tuꞌ, jaꞌ Selomit yetoj cꞌal yican chi teyneni.

29 Yin ebꞌ yicꞌaal Ishar titnaj Quenanías, ebꞌ scꞌaal yetoj cꞌal ebꞌ yican. Jaꞌ ebꞌ tuꞌ, manxa jaꞌ oj bꞌey templo eyoc ebꞌ yin yopiso; yin xa juezal yeoc ebꞌ, yu yilontoj conobꞌ Israel ebꞌ.

30 Jaꞌton Hasabías, yetoj ebꞌ yican, yicꞌaal Hebrón ebꞌ. Jaꞌ ebꞌ tuꞌ syaawil conobꞌ Israel yeoc ebꞌ yetcꞌulal spacꞌulal bꞌey chi too cꞌu bꞌey jaꞌ Jordán, yet chi yilon tzetyetal ebꞌ tol yet Jehová yeocoj, cꞌal masanil tzetyetal tol yet naj rey yeocoj. Ey 1,700 ebꞌ winaj caw jelan.

31 Jaꞌ yet 40 abꞌil xa yoc naj rey David yin reyal, jix seyle il yul slistail yu ebꞌ ánima bꞌey junjun conobꞌ. Jaꞌ yet tuꞌ jix ilcha ocoj, tol ey ebꞌ yicꞌaal Hebrón caw jelan bꞌey conobꞌ Jazer, yul yet Galaad. Jaꞌ jun yaaw yeoc yin yicꞌaal Hebrón tuꞌ, jaꞌton Jerías. 32 Jix aapnoj sbꞌisil ebꞌ yin 2,700 ebꞌ yaaw yeoc xol yican. Jix ale oc yibꞌan ebꞌ yu naj rey David, tol jaꞌ ebꞌ chi ilon ebꞌ yicꞌaal Rubén, ebꞌ yicꞌaal Gad, yetoj nanxa tujan ebꞌ yicꞌaal Manasés. Jaꞌ smulnail ebꞌ tuꞌ, jaꞌton yilon ebꞌ tzettaj yetal yet Dios yeocoj, yetoj cꞌal tzetyetal yet naj rey yeocoj.