Junjun Tujan Yeoc Ebꞌ Soldado Naj Rey David
27
Jaꞌ jun tiꞌ, slistail ebꞌ Israel, jatacꞌalaꞌ ebꞌ yaaw yeoc xol ebꞌ yican, yetoj cꞌal ebꞌ yaaw yeoc yin junjun bꞌulan ebꞌ soldado, yetoj cꞌal ebꞌ eyoc yin yopiso yetoj naj rey, yet chi yil tzet utbꞌil yeoc junjun tujan ebꞌ soldado chi oc yin xolilal, jun tujan yin junjun xꞌaaw yul junjun abꞌil. Yin junjun tujan ey 24,000 winaj.2-3 Jaꞌ naj syaawil ebꞌ chi oc yin yopiso yet sbꞌabꞌel xꞌaaw, jaꞌton Jasobeam, scꞌaal Zabdíel. Jaꞌ naj tuꞌ yicꞌaal Fares.
4 Jaꞌ naj syaawil chi oc yin yopiso yet scaabꞌ xꞌaaw, jaꞌton Dodai yicꞌaal Ahohíta. Jaꞌ naj Miclot, yet scaabꞌ yaaw yeocoj.
5 Jaꞌ naj syaawil ebꞌ chi oc yin yopiso yet yox xꞌaaw jaꞌton naj Benaías, scꞌaal naj sat yakꞌomal xaambꞌal chi yij Joiadá. 6 Jaꞌ naj eyoc stzꞌajiloj ebꞌ 30 caw jelan tuꞌ, yaaw yeoc xol ebꞌ; jaꞌ scꞌaal chi yij Amizabad, yet scaabꞌ yaaw yeoc yin jun tujan tuꞌ.
7 Jaꞌ naj syaawil ebꞌ yet scan xꞌaaw, jaꞌton naj Asael, yuẍtaj Joab. Jaꞌ jun scꞌaal chi yij Zebadías, jaꞌ jix oc can yin yaawil sqꞌuexeloj smam.
8 Jaꞌ naj syaawil ebꞌ yet sjoꞌ xꞌaaw, jaꞌton naj Samhut a Izraíta.
9 Jaꞌ naj syaawil ebꞌ yet swaj xꞌaaw, jaꞌton naj Irá, scꞌaal Iqués, a conobꞌ Tecoa.
10 Jaꞌ naj syaawil ebꞌ yet sjuj xꞌaaw, jaꞌton naj Heles, a Paltita; yicꞌaal Efraín naj tuꞌ.
11 Jaꞌ naj syaawil ebꞌ yet swaxajebꞌ xꞌaaw, jaꞌton naj Sibecai, a conobꞌ Husá, yicꞌaal Zérah naj tuꞌ.
12 Jaꞌ naj syaawil ebꞌ yet sbꞌalonebꞌ xꞌaaw, jaꞌton Abiézer, a conobꞌ Anatot, yicꞌaal Benjamín naj tuꞌ.
13 Jaꞌ naj syaawil ebꞌ yet slaonebꞌ xꞌaaw, jaꞌton Maharai a conobꞌ Netofá, yicꞌaal Zérah naj tuꞌ.
14 Jaꞌ naj syaawil ebꞌ yet jusluqꞌuebꞌ xꞌaaw, jaꞌton Benaías a Piratón, yicꞌaal Efraín naj tuꞌ.
15 Jaꞌ naj syaawil ebꞌ yet slacawebꞌ xꞌaaw, jaꞌton Heldai a conobꞌ Netofá, yicꞌaal Otoniel naj tuꞌ.
16 Jaꞌton ebꞌ tiꞌ yaaw yeoc xol ebꞌ yicꞌaal Israel: Jaꞌ xol ebꞌ yicꞌaal Rubén, jaꞌ naj Eliézer, scꞌaal naj Zicrí; jaꞌ xol ebꞌ yicꞌaal Simeón, jaꞌ naj Sefatías, scꞌaal Maacá; 17 jaꞌ xol ebꞌ yicꞌaal Leví, jaꞌ naj Hasabías, scꞌaal Quemuel; jaꞌ xol ebꞌ yicꞌaal Aarón, jaꞌ naj Sadoc; 18 jaꞌ xol ebꞌ yicꞌaal Judá, jaꞌ naj Elihú, jun yuẍtaj naj David; jaꞌ xol ebꞌ yicꞌaal Isacar, jaꞌton naj Omrí, scꞌaal Micael; 19 jaꞌ yin xol yicꞌaal Zabulón, jaꞌ naj Ismaías, scꞌaal Abdías; jaꞌ xol ebꞌ yicꞌaal Neftalí, jaꞌ naj Jerimot, scꞌaal Azriel; 20 jaꞌ xol ebꞌ yicꞌaal Efraín, jaꞌ naj Oseas, scꞌaal Azazías; jaꞌ xol ebꞌ nan tujan yicꞌaal Manasés, jaꞌ naj Joel, scꞌaal Pedaías; 21 jaꞌ xol nanxa tujan ebꞌ yicꞌaal Manasés, ey bꞌey Galaad, jaꞌ naj Idó, scꞌaal Zacarías; jaꞌ xol ebꞌ yicꞌaal Benjamín, jaꞌ naj Jaasiel, scꞌaal Abner; 22 jaꞌ xol ebꞌ yicꞌaal Dan, jaꞌ naj Azarel, scꞌaal Jeroham. Jaꞌton ebꞌ tiꞌ yaaw yeoc xol masanil ebꞌ yicꞌaal Israel.
23 Jaꞌ ebꞌ cꞌamto chi tzꞌajna yin 20 abꞌil skꞌinal, ma bꞌisle ebꞌ yu naj rey David tuꞌ, yutol yakꞌnaj can stiꞌ Jehová tol oj akꞌle chꞌibꞌ sbꞌisil ebꞌ yicꞌaal Israel jaxca wal sbꞌisil weycan. 24 Jix ẍaꞌel yich naj Joab yiꞌon a sbꞌisil ebꞌ tuꞌ; eyto cꞌal pax ma lawoj yiꞌon a naj, yutol jix aletej jun miman syaꞌilal yibꞌan conobꞌ Israel yu jun bꞌisbꞌal jix iꞌle a tuꞌ. Yuxan ma tzꞌajna tzꞌibꞌele sbꞌi ebꞌ yul an juun bꞌey tzꞌibꞌebꞌilcan ey skꞌaneal naj rey David.
25 Jaꞌ naj Azmávet scꞌaal Adiel, jaꞌ eyoc yin scꞌubꞌan masanil stzetyetal naj rey. Jaꞌ mactxequel chi ilon jantaj tzetyetal yaman ecꞌ bꞌey wan cꞌuanbꞌal bꞌey junjun conobꞌ, yetoj cꞌal bꞌey cuartel ey bꞌey yul-laj moon, jaꞌ naj Jonatán, scꞌaal Uzías chi iloni. 26 Jaꞌ mactxequel chi ilon ebꞌ chi mulna sat txꞌotxꞌ txꞌotxꞌ, jaꞌton naj Ezrí, cꞌaal Quelub. 27 Jaꞌ mactxequel chi ilon bꞌey awbꞌil an uva, jaꞌton naj Simí a conobꞌ Ramat. Jaꞌ mactxequel eyoc yibꞌan yin syambꞌan yal uva yet chi cꞌubꞌale can aoj, jaꞌton Zabdí a Sefam. 28 Jaꞌ mactxequel eyoc yilon teꞌ olivo, cꞌal teꞌ xol-lajil teꞌ higo ey bꞌey txꞌotxꞌ tzalquiltaj, jaꞌton naj Baal-hanán a conobꞌ Guéder. Jaꞌ mactxequel eyoc yibꞌan yet chi cꞌubꞌale a aceite olivo, jaꞌton naj Joás. 29 Jaꞌ mactxequel eyoc yilomaloj noꞌ wacax ey yul yet panan Sarón, jaꞌ naj Sitrai, a conobꞌ Sarón, jal pax mactxequel eyoc yilomaloj noꞌ wacax ey bꞌey spananil sjobꞌeal, jaꞌ naj Safat, scꞌaal Adlai. 30 Jaxa mactxequel chi ilon noꞌ camello, jaꞌton naj Obil, Ismaelita. Jaꞌ mac chi ilon noꞌ bꞌuru, jaꞌ naj Jehedías, a conobꞌ Meronot. 31 Jaꞌ mactxequel chi ilon noꞌ meꞌ, cꞌal noꞌ chiw, jaꞌ naj Jaziz, a Agarenos. Jaꞌ masanil ebꞌ tuꞌ, jaꞌton ebꞌ chi ilon masanil stzetyetal naj rey David.
32 Jaꞌ naj Jonatán, yuẍtaj smam naj David, tzꞌibꞌlom naj, catuꞌ caw cuywinaj, yuxan jaꞌ chi akꞌon naꞌbꞌale tet naj rey. Jaꞌ naj Jehiel, scꞌaal Hacmoní, jaꞌton a cuenta yilon ebꞌ scꞌaal naj rey. 33 Yetoj cꞌal pax naj Ahitófel aom oc naꞌbꞌale cꞌal pax yeoc tet naj rey; jaꞌ naj Husai, Arquita, swatxꞌil ánima naj rey yeoc naj, catuꞌ chi yakꞌon pax naꞌbꞌale tet naj. 34 Jaꞌ naj Joaida scꞌaal, Benaías, jaꞌ jix oc can sqꞌuexeloj naj Ahitófel yetoj naj Abiatar, jaꞌ Joab yaaw yeoc xol ebꞌ soldado naj rey.