2 Yuxan jix a linan naj rey David, jix yalon jaxca tiꞌ: Abꞌwej je masanil jex wet conobꞌ. Ey wal oc yin jin naꞌbꞌal jin waꞌnen a junoj snail bꞌey chi skeꞌ yeecꞌ teꞌ Scaẍail Swa Kꞌane Jehová yin junelne, jaꞌton bꞌey chi caey ecꞌ Naj cu Diosal. Tuxa jix jin yambꞌa masanil tzetyetal oj oc yin swaꞌxubꞌaloj. 3 Asan xin, jix yal Jehová cu Diosal ey jin jaxca tiꞌ: Tol man jaach oj ja waꞌne a jun jin templo tuꞌ, yutol akꞌom jaach jowal, caw ecꞌal ánima jix cam ja wu yin jowal, ẍi Naj ey jin an. 4 Yel, caw je yotaj jun tiꞌ, yutol jaꞌ Jehová cu Diosal jaon Israel jon tiꞌ, jaꞌ jix jin sicꞌon can yetoj ebꞌ wicꞌaal yet chi cu oc can yin reyal xol cu conobꞌ Israel yin junelne. Yutol jaꞌ Naj jix sicꞌon el yicꞌaal Judá, yet chi yakꞌon yaawil xol masanil ebꞌ kicꞌaal. Jaꞌ xol ebꞌ yicꞌaal Judá, jaꞌ yicꞌaal jin mam jix sicꞌ can eloj. Jaꞌ xol ebꞌ tuꞌ jix jin sicꞌle el xol ebꞌ wuẍtaj yet chin oc sreyaloj cu conobꞌ tiꞌ yu Jehová. 5 Jaꞌ tinaniꞌ xin, jaꞌ xol ebꞌ jin cꞌaal jix yakꞌ Jehová ey jin, jatuꞌ jix sicꞌle el naj jin cꞌaal Salomón. Jaꞌ oj ey chotan bꞌey sdespacho yet Jehová yibꞌan sconobꞌ. 6 Jacꞌalaꞌ jix yalon cꞌal pax Jehová ey jin jaxca tiꞌ: Jaꞌ naj ja cꞌaal Salomón, jaꞌ naj oj waꞌnen a jun jin templo yetoj cꞌal yamakꞌil, yutol jaxca wal jin cꞌaal jix yun jin sicꞌon eloj, jaxca smam oj wun ocoj. 7 Catuꞌ oj waon can oc yin yopiso junelne, ta tol oj sjije masanil jin chejbꞌanil, cꞌal masanil tzet chi walaꞌ, jaxca chi yun tinaniꞌ, ẍi Jehová ey jin an.

8 Jaꞌ tinaniꞌ xin, je sattaj wal je masanil jex wet Israelal, jaꞌton sconobꞌ Jehová, cꞌal sattaj Naj cu Diosal chi cu abꞌeni, chi cam walon ey jex, tol che jije masanil ẍejbꞌanil Jehová, catuꞌ che cuyon pax oj, yet watxꞌ oj jex caey cꞌal ecꞌ bꞌey jun conobꞌ tol cꞌamxa chi alcha jantaj swatxꞌil yili; jaꞌ ebꞌ je yuninal oj iꞌon can oc yin junelne. 9 Jal pax jaach jin cꞌaal Salomón, otajne wal el cu Diosal, catuꞌ cha wakꞌon servil yetoj masanil ja cꞌul, yutol jaꞌ Jehová yotaj masanil cu naꞌbꞌal, catuꞌ chi naꞌcha pax el yu tzet chi cu naꞌ. Yu tuꞌ xin, ta oj ja jitz cꞌal oc ja bꞌa scꞌatan Naj, oj jaach chaꞌle cꞌal yu; ta tol oj ja wiꞌ can el ja bꞌa yintaj Naj xin, junelne oj jaach yintajne can eloj. 10 Ilaꞌ tol jaꞌ Jehová jix jaach sicꞌon el yet oj ja waꞌne a jun na oj oc stemplo oj. Yu jun tuꞌ xin, akꞌ cꞌal ja wip, oc ojabꞌ mulnail, ẍi naj rey David tet scꞌaal.

11 Jix lawi tuꞌ, jix yakꞌon jun yechel jun templo naj rey David tet scꞌaal tuꞌ, jaꞌton Salomón, chi yal yeloc apnoj, jaꞌton tzet oj yun swaꞌxi yul-laj stiꞌ jun na tuꞌ, cꞌal wan cuarto yet cꞌuanbꞌal, cꞌal cuartolaj, yetoj cꞌal spisoal bꞌey naat eyaoj, yetoj cꞌal wan scuartoal bꞌey yul tuꞌ, yetoj jun lugar bꞌey chi akꞌle lawoj spenail. 12 Catuꞌ jix yakꞌon cꞌal pax yechel masanil tzet akꞌbꞌil xa oc yin snaꞌbꞌal yu Naj Espíritu, jaꞌton tzet oj yun swaꞌxi sattaj eltoj templo tuꞌ, yetoj cꞌal wan cuarto oj oc bꞌey yinlaj, cꞌal wan cꞌuanbꞌal, yetoj cꞌal bꞌey oj yambꞌale masanil ofrenda yet templo tuꞌ. 13 Jix yakꞌon cꞌal pax slistail tzet oj yun oc ebꞌ yakꞌomal xaambꞌal yin yopiso, cꞌal ebꞌ Levita yet chi oc ebꞌ yin xolilal steyneni, yetoj cꞌal masanil tzet oj yun ebꞌ bꞌey templo tuꞌ, yetoj cꞌal slistail masanil jantaj mitxꞌkꞌabꞌe yet eyilal cꞌal xaambꞌal chi akꞌle bꞌey templo.

14 Jix yalon naj jantaj chꞌen oro oj oc yin junjun tujan mitxꞌkꞌabꞌe oro yetoj jantaj chꞌen plata oj oc yin junjun tujan mitxꞌkꞌabꞌe tol plata cꞌal eloj. 15 Jix yalon cꞌal pax jantajoj yun yalil junjun sbꞌatxlubꞌal tzejtebꞌal, cꞌal jantaj junjun wan tzejtebꞌal tuꞌ, ta oro, ma plata. 16 Yetoj pax jun meẍa oro cꞌal eloj, bꞌey chi ey txolan ixim pan tol yet Dios yeocoj, yetoj cꞌal wanxa meẍa plata cꞌal eloj. 17 Jix yalon jantaj chꞌen oro oj oc yin swaꞌxubꞌal jun chꞌen miman lutxbꞌal, cꞌal chꞌen mimej secꞌ, cꞌal ẍalu, yetoj jantaj oro cꞌal plata oj oc yin masanil, cꞌal wanojxa chꞌen chꞌen, jatacꞌalaꞌ jantaj chi yun yalil junjun tujan. 18 Jix yalon cꞌal pax jantaj chꞌen oro caw watxꞌ oj oc yin jun yet xaambꞌal yet incienso cꞌal yin swaꞌxubꞌal jun yechel carruaje, chi yal yeloc apnoj jaꞌton wan yechel querubín jenantoj xicꞌ yibꞌan teꞌ Scaẍail Swa Kꞌane Jehová.

19 Masanil wan tuꞌ tzꞌibꞌebꞌilcanoj, tol jaꞌcaw Jehová jix txꞌoxon tet naj rey David, jaꞌton tituꞌ chi yalaꞌ yu tzet utbꞌil oj yun swaꞌxi jun mulnail tuꞌ, jaxca yakꞌon jun yechel tuꞌ.

20 Yu tuꞌ xin, jix yalon naj rey David tet Salomón jaxca tiꞌ: Tecꞌbꞌa ja bꞌa, oc ojabꞌ mulnail. Manche ja wakꞌ caabꞌcꞌulal, cꞌam ojabꞌ chach xiwaoj, yutol jaꞌ Jehová cu Diosal ey cꞌal oc ja wetoj. Man cꞌal oj jaach bꞌejlecan yu, masantaꞌcꞌal chi lawi jun mulnail tuꞌ masanil. 21 Jaꞌ ebꞌ yakꞌomal xaambꞌal, yetoj cꞌal ebꞌ Levita, jatacꞌalaꞌ yeoc junjun tujan ebꞌ, caw bꞌejan cꞌal scꞌul ebꞌ yin mulnail bꞌey templo tuꞌ. Masanil ebꞌ winaj tol caw ey snaꞌbꞌal yin yal cꞌal tzet mulnail, caw ey stzalacꞌulal ebꞌ yin mulnail, cꞌal ebꞌ yaaw yeocoj, yetoj cꞌal ebꞌ conobꞌ, jijem cꞌal ebꞌ tet ja chejbꞌanil, ẍi naj rey David tet Salomón.