Ofrenda Yu Swaꞌxubꞌal Templo
29
Jix lawi tuꞌ xin, jix yalon naj rey David tet masanil ebꞌ ánima yaman ecꞌ tituꞌ: Jex wet conobꞌ, jaꞌ naj jin cꞌaal Salomón tiꞌ jix sicꞌle el yu Dios. Caw achꞌeto naj, jal pax jun mulnail tiꞌ, caw miman yeocoj, yutol man spalacio oj junoj comon winaj oj swaꞌne a naj; yutol jaꞌ jun tiꞌ, tol stemplo Jehová Dios oj yun ocoj. 2 Jix wakꞌ wal wip jin yambꞌan masanil tzetyetal oj kꞌanle yin stemplo cu Diosal; jaxca chꞌen oro, plata, bronce, hierro cꞌal teꞌ teꞌ, jatacꞌalaꞌ tzet oj kꞌanbꞌalnele yin junjun tujan mulnail; yetoj cꞌal pax chꞌen cornalina, cꞌal wanxa chꞌen chꞌen chi oc yelawiloj, yetoj wanojxa chꞌen chꞌen watxꞌ yili, cꞌal ecꞌaloj chꞌen alabastro. 3 Jaꞌ yibꞌan wan tzetyetal jix jin yambꞌa oc yu swaꞌxubꞌal templo tuꞌ, chi wakꞌ cꞌal pax chꞌen oro cꞌal chꞌen plata tol wet yul wet, yutol caw ey jin camcꞌulal yin jun stemplo cu Diosal tiꞌ. 4 Chi wakꞌon pax 2,300 quintal chꞌen oro yel xacꞌal watxꞌ yili, yetoj 5,300 quintal chꞌen plata, chꞌen tol caw watxꞌ scawxi, yet chi oc yichlaj na, 5 cꞌal yin yoc chꞌen yal cꞌal tzet mulnail oj swaꞌne ebꞌ mulnawom yin chꞌen oro, ma yin chꞌen plata, jal tinaniꞌ xin, ¿mactxequel jex bꞌejan je cꞌul je yakꞌon je colwal tet Jehová, jaxca jix wun tuꞌ an? ẍi naj rey.6 Yu tuꞌ xin, jaꞌ ebꞌ yaaw yeoc xol ebꞌ yican, cꞌal ebꞌ yaaw yeoc yin junjun icꞌaaleal xol ebꞌ yet Israelal, yetoj cꞌal ebꞌ syaawil ebꞌ soldado, yetoj cꞌal masanil ebꞌ yaaw yeoc yin masanil mulnail chi waꞌxi yu naj rey tuꞌ, masanil ebꞌ jix el wal yin scꞌul yakꞌon scolwal. 7 Jix yakꞌ scolwal ebꞌ yin swaꞌxubꞌal templo: 3,800 quintal chꞌen oro, yetoj 7,600 quintal chꞌen plata, yetoj 13,500 quintal chꞌen bronce, yetoj cꞌal pax 75,000 quintal chꞌen hierro.
8 Yetoj cꞌal pax ebꞌ ey chꞌen chꞌen watxꞌ yili eyecꞌ yu, jix yiꞌtoj ebꞌ bꞌey jun cꞌuanbꞌal yet templo tuꞌ. Jaꞌ naj Jehiel yicꞌaal Guersón eyoc yilomaloj.
9 Caw jix tzala masanil ebꞌ ánima yu jantaj tzet jix yakꞌ ebꞌ tuꞌ, yutol yin masanil scꞌul ebꞌ jix yakꞌon masanil wan tzetyetal ebꞌ tet Jehová. Yetoj cꞌal pax oj, caw jix tzala naj rey David yetoj wan tuꞌ.
10 Yu jun tuꞌ xin, sattaj masanil ebꞌ conobꞌ, jix yalon watxꞌ kꞌane naj rey David tet Jehová jaxca tiꞌ: Jaach Jehová, cu Diosal jaach, yetoj ebꞌ wichmam Israel, al-le ojabꞌ watxꞌ kꞌane ey jaach, 11 yutol jaach tiꞌ, caw miman ja weloc apnoj, ey ja wipal, ey ja tzejejial, miman yeoc ja wopiso, caw bꞌinabꞌil bꞌey satcan, cꞌal bꞌey masanil sat txꞌotxꞌ tiꞌ, yutol ja wet yeocoj, yaaw jaach yin masanil. 12 Jaꞌ ey jaach chi tit masanil bꞌeomal cꞌal yiꞌle a can ja bꞌi. Jaach, yaaw jaach yibꞌan masanil. Jaꞌ yul ja kꞌabꞌ ey masanil ja wipalil. Jaach chi skeꞌ ja wakꞌon cꞌal pax mimanbꞌilal cꞌal ipeal tet masanil. 13 Yuxan chi kal yu diosal, cꞌal kalon cu watxꞌ kꞌane ey jaach, jaach cu Diosal, yutol miman yeloc apnoj ja bꞌi. 14 Caw yel, jain tiꞌ yetoj cꞌal ebꞌ wet conobꞌ tiꞌ, cꞌam niꞌoj tzet chi skeꞌ cu saꞌon ey jaach. Yutol masanil tzetyetal chi tit ey jaach tuꞌ, yuxan jantaj tzet chi cu chaꞌ ey jaach, jaꞌ chi skeꞌ kakꞌoni. 15 Yutol ecꞌabꞌwom cꞌal chi yun kecꞌ ja sattaj. Laan jon cꞌal jaxca jix yun yecꞌle ebꞌ kichmam jon. Jaꞌ kiquisal bꞌey yibꞌan sat txꞌotxꞌ txꞌotxꞌ tiꞌ, laan cꞌal jaxca enele, catuꞌ man naatiloj chi cu ecꞌ jon.
16 Yu tuꞌ xin, jaach cu Diosal, ja wet yeoc masanil wan bꞌeomal tiꞌ. Jaꞌ ey jaach chi tit masanil wan tzetyetal chi cu yambꞌa ocoj, yu cu waꞌnen a junoj templo yu kiꞌon a can ja bꞌi. 17 Jaach jin Diosal, wotaj jain tiꞌ tol ja wil masanil naꞌbꞌale, catuꞌ chach tzala yetoj ebꞌ chi bꞌeybꞌalne sjichanil. Yu jun tuꞌ, yuxan yetoj masanil jin naꞌbꞌal chi yun wakꞌon wan tiꞌ yul ja kꞌabꞌ. Jaꞌ tinaniꞌ, chi tzala jin cꞌul wilon ocoj, tol masanil ebꞌ ja conobꞌ yaman ecꞌ titiꞌ, yetoj wal masanil scꞌul ebꞌ chi yakꞌon yofrenda ebꞌ ey jaach. 18 Jaach Jehová cu Diosal, yetoj Abraham, yetoj Isaac cꞌal yetoj Israel, jaꞌton ebꞌ kichmam tuꞌ jon. Akꞌ cꞌal yip snaꞌbꞌal ebꞌ ja conobꞌ tiꞌ, tol ojabꞌ chi sjijen ebꞌ ey jaach, catuꞌ chi yaon oc scꞌul ebꞌ ja win. 19 Chi woche tol cha wakꞌ snaꞌbꞌal naj jin cꞌaal Salomón tiꞌ, yet chi sjijen masanil ja chejbꞌanil yin masanil scꞌul, yetoj cꞌal jantaj ja ley, catuꞌ chi sbꞌeybꞌalneni, yet oj skeꞌ swaꞌnen a jun miman templo jix jin yambꞌa can oc masanil wan tzetyetal tiꞌ, ẍi naj rey David.
20 Jix lawi tuꞌ, jix yalon pax naj rey David tet ebꞌ conobꞌ jaxca tiꞌ: Jaꞌ tinaniꞌ jex wet conobꞌ, kalwej watxꞌ kꞌane tet Jehová cu Diosal. Yuxan jix yal watxꞌ kꞌane masanil ebꞌ conobꞌ tet Jehová sDiosal yichmam ebꞌ. Jix ey kaan ebꞌ cꞌal yey noan ebꞌ sattaj Dios yet eyecꞌ ebꞌ sattaj naj rey. 21 Jaxa yet junxa cꞌual xin, jix yakꞌon tzꞌaꞌ xaambꞌal sattaj Jehová: Jix yakꞌ jun mil noꞌ achꞌe wacax, yetoj jun mil noꞌ icham meꞌ, cꞌal jun mil noꞌ achꞌe meꞌ, yetoj yal uva chi akꞌle cꞌaltaꞌ yetoj junjun tujan xaambꞌal. Caw ecꞌal xaambꞌal jix waꞌxi yet chi akꞌle yu masanil ebꞌ Israel. 22 Jaꞌ yet jun cꞌual tuꞌ, jix low ebꞌ cꞌal yuqꞌuen jaꞌ ebꞌ yin tzalacꞌulal sattaj Jehová. Jix lawi tuꞌ, jix yalon ebꞌ junelxa yin naj Salomón, scꞌaal David, tol chi oc naj yin reyal. Sattaj Jehová, jix bꞌonle atoj aceite olivo yin sjolom naj yin yoc can sreyaloj ebꞌ conobꞌ Israel. Catuꞌ jix yaon cꞌal pax atoj aceite olivo ebꞌ yibꞌan sjolom naj Sadoc, yet chi oc can naj yin sat yakꞌomal xaambꞌal. 23 Queytuꞌ jix yun yoc can naj Salomón yin reyal sqꞌuexeloj smam yu Jehová. Caw watxꞌ jix eloc naj yin yopiso tuꞌ. Masanil ebꞌ conobꞌ Israel caw jix sjije ebꞌ tet naj. 24 Masanil ebꞌ yaaw yeocoj, cꞌal ebꞌ soldado caw jelan yin jowal, yetoj cꞌal wanxa ebꞌ scꞌaal naj rey David, jix yakꞌ stiꞌ ebꞌ sjijen tet naj rey Salomón. 25 Jix iꞌle a can naj Salomón yu Jehová sattaj ebꞌ conobꞌ Israel, jix yakꞌ akꞌle bꞌina naj yin yopiso yu. Cꞌam junoj sreyal Israel yet yalantoj tol queytuꞌ jix yun sbꞌina jaxca tuꞌ.
Scamichal Naj Rey David
26-27 Cawinaj abꞌil jix yakꞌ reyal naj David scꞌaal Jesé, yibꞌan conobꞌ Israel; ey jujebꞌ abꞌil jix yakꞌ reyal bꞌey conobꞌ Hebrón, ey cꞌal pax 33 abꞌil jix yakꞌ reyal bꞌey Jerusalén. 28 Yin watxꞌcꞌulal jix yun scam naj yet caw icham winajxa naj, caw bꞌeom naj, caw miman yeloc apnoj. Jaꞌ jun scꞌaal chi yij Salomón jix oc can sqꞌuexeloj yin reyal.
29 Jaꞌ skꞌaneal naj rey David tiꞌ, yet tax yichbꞌanil masantaꞌcꞌal yet slawubꞌal, jatuꞌ tzꞌibꞌebꞌilcan bꞌey yul an juun yet naj Samuel, naj Natán, cꞌal naj Gad, ẍejabꞌ Dios. 30 Jaꞌ tituꞌ tzꞌibꞌebꞌilcan masanil tzet jix yun yin yopiso, cꞌal sbꞌinabꞌilal, cꞌal masanil tzettaj yetal jix ecꞌtoj yibꞌan, cꞌal yibꞌan conobꞌ Israel, yetoj cꞌal yibꞌan wanxa conobꞌ.