16
Jaꞌ tituꞌ jix ale octoj teꞌ Scaẍail Swa Kꞌane Dios bꞌey yul jun kꞌap na jix akꞌle waꞌxoj yu naj rey David, tol yet cꞌaltaꞌ jix yun swaꞌxi. Jix lawi tuꞌ, jix yakꞌon tzꞌaꞌ xaambꞌal cꞌal xaambꞌal yet watxꞌcꞌulal yetoj Dios. 2 Jaꞌ yet jix lawi tuꞌ, jix yalon watxꞌ kꞌane naj rey David yibꞌan masanil ebꞌ conobꞌ yin sbꞌi Jehová. 3 Jix yakꞌon junjun ixim pan yetoj junjun jabꞌan noꞌ chiꞌbꞌe, yetoj wan teꞌ sat tajin uva tet junjun ebꞌ ánima tuꞌ.4 Jix ale can oc yopiso ebꞌ Levita yu naj rey David, yet chi akꞌwi servil ebꞌ sattaj teꞌ Scaẍail Swa Kꞌane Jehová, jaꞌton ebꞌ tuꞌ sowalil chi alon yu diosalil, cꞌal yalon watxꞌ kꞌane ebꞌ tet Jehová sDiosal conobꞌ Israel yin bꞌital. 5 Jaꞌ mactxequel chi ijbꞌan bꞌitnoj ebꞌ, jaꞌton naj Asaf; jaꞌ naj yet scaabꞌ, jaꞌton naj Zacarías. Chi lawi tuꞌ, chi tit cꞌal pax naj Jeiel, Semiramot, Jehiel, Matatías, Eliab, Benaías, Obed-edom, cꞌal Jeiel. Jaꞌton ebꞌ tuꞌ ey smitxꞌkꞌabꞌ chi skꞌanbꞌalne yet chi oc bꞌit, ey salterio ebꞌ, ey cꞌal pax yarpa ebꞌ. Jaꞌ naj Asaf xin, jaꞌ chi tenon chꞌen patxquiltaj chꞌen. 6 Jaꞌ pax ebꞌ yakꞌomal xaambꞌal, jaꞌton Benaías, cꞌal Jahaziel, jaꞌ ebꞌ tuꞌ chi xuon cꞌal trompeta sattaj teꞌ Scaẍail Swa Kꞌane Dios.
Bꞌit Yu Alo Yu Diosalil Yu Naj Rey David
7 Jaꞌ yet jun cꞌu tuꞌ, sbꞌabꞌelto jix yal naj rey David tet naj Asaf, cꞌal ebꞌ yican to sbꞌa yetoj, tol yin ojabꞌ bꞌital chi yun yalon ebꞌ yu diosalil, tet Jehová:
8 ¡Kalwej yu diosalil tet Jehová! ¡Kalwej el skꞌaneal Naj! ¡Kalwej tet masanil conobꞌ tzet jix yunne!
9 Cu bꞌitnewej bꞌit yu kiꞌon a can sbꞌi Jehová. Kalwej el masanil tzet qꞌueyubꞌtaj yili tzetyetal jix swaꞌne.
10 Tzalajonwej, yutol yet jon xa Naj; ey ojabꞌ cu tzalacꞌulal yet chi kakꞌon eyilal tet.
11 Cu jitzwej oc cu bꞌa scꞌatan Jehová, kiꞌwej cꞌal ey cu bꞌa tet Naj.
12-13 Jaon tol yicꞌaal jon Jacob ẍejabꞌ jin Dios, cu naꞌwejtej jantaj tzet qꞌueyubꞌtaj jix el yunen Naj, yetoj cꞌal ẍejbꞌanil albꞌilcan yu.
14 Jaꞌ Jehová cu Diosal, yaaw yeoc yibꞌan masanil sat txꞌotxꞌ txꞌotxꞌ tiꞌ.
15 Chi eloc masanil bꞌey jix yakꞌ can stiꞌ. Jaꞌ tzet yalnaj canoj, chi yun cꞌal tzet jix yalcanoj.
16 Jaꞌton jun swa kꞌane jix swaꞌne can yetoj Abraham, yetoj cꞌal tet Isaac.
17 Jaꞌ tet Jacob jix cam yalon can jun chejbꞌanile tiꞌ, cꞌal swa kꞌane yetoj conobꞌ Israel.
18 Jix yalon jaxca tiꞌ: Oj wakꞌ txꞌotxꞌ Canaán tuꞌ ey jaach, jaxca wal ja majul txꞌotxꞌ yet ja bꞌabꞌel uninal oj yun can oc txꞌotxꞌ, ẍi tet naj.
19 Jaywanne sbꞌisil ebꞌ tuꞌ. Yutol comon cꞌal chi ecꞌabꞌ ebꞌ sat txꞌotxꞌ txꞌotxꞌ tiꞌ.
20 Ecꞌal nación bꞌey jix caey cꞌal ecꞌ ebꞌ, cꞌal yalan ẍejbꞌanil ebꞌ rey bꞌey junjun conobꞌ.
21 Jaꞌ Dios ma yal scꞌul tol jix etnele ebꞌ, yutol jix al-le tet ebꞌ rey jaxca tiꞌ:
22 Cꞌam ojabꞌ che yetne ebꞌ wakꞌomal servil sicꞌbꞌil el wu, ẍi Dios.
23 Cu bꞌitnewej tet Jehová je masanil jex caan sat txꞌotxꞌ tiꞌ. Kalwej cꞌal el junjun cꞌu tol chi cu col-le el yu Naj.
24 Kalwej eloj tol miman yeloc apnoj Naj, yetoj masanil wan qꞌueyubꞌtaj yili waꞌnebꞌil yu. Kalwej el tet masanil conobꞌ, cꞌal tet junjun nación.
25 Yutol jaꞌ Jehová yel xacꞌal miman yeloc apnoj, smoo tol chi al-le watxꞌ kꞌane yin. Yel xacꞌal ey smey Naj tet wan tzet chi al-le oc diosal.
26 Jaꞌ masanil sdiosal wanojxa conobꞌ, cꞌam niꞌoj yeloc apnoj ebꞌ; yutol jaꞌ Jehová jix waꞌnen satcan.
27 Caw miman yeloc apnoj. Caw chi tzejeji yili yetoj yipalil. Jaꞌ swatxꞌil yili tuꞌ, jaꞌ chi txꞌoxon el sjelanil bꞌey snail scalubꞌal.
28 Jex ánima bꞌey junjun conobꞌ, alwej tet Jehová tol miman yipalil, cꞌal stzejejial.
29 Ale ojabꞌ watxꞌ kꞌane tet yutol miman yeloc apnoj. Ocanwejtoj yetoj je yofrenda yul snail scalubꞌal. Ocanwejtoj yetoj je yofrenda, cꞌal yoc yin eyilal tet Jehová bꞌey scalubꞌal tol watxꞌ yili.
30 Ey ojabꞌ xiwcꞌulal masanil ebꞌ ánima sattaj Jehová, yutol jaꞌ Naj jix waꞌnen yul yibꞌankꞌinal tiꞌ, yet watxꞌ cꞌam chi bꞌilwi.
31 Tzala ojabꞌ satcan cꞌal txꞌotxꞌ txꞌotxꞌ tiꞌ. Kalwej tet masanil nación tol jaꞌ Jehová, Rey toni.
32 Ey ojabꞌ stzalacꞌulal jaꞌ mar yetoj masanil tzetyetal ey yul jaꞌ. Tzala ojabꞌ masanil txꞌotxꞌ txꞌotxꞌ bꞌey chi oc mulnail yetoj masanil tzetyetal ey sat txꞌotxꞌ.
33 El ojabꞌ yaw teꞌ mimej teꞌ sattaj Jehová yu tzalacꞌulal, yutol chi jul yakꞌ yaawil Naj bꞌey sat txꞌotxꞌ tiꞌ.
34 Kalwej yu diosal tet Jehová yutol yel xacꞌal watxꞌ Naj, chi cu scamcꞌulne yin masanil tiempo.
35 Kalwej tet jaxca tiꞌ: Colon el jaach cu Diosal, tol cu Colomal jaach. Tol jaach chon ja yambꞌa ocoj, cꞌal jon ja colon el tet wan nacionlaj, yet watxꞌ chi skeꞌ kalon yu diosal ey jaach, catuꞌ chi kalon cu watxꞌ kꞌane ey jaach yin tzalacꞌulal.
36 Kalwej watxꞌ kꞌane yin Jehová, cu Diosal jaon Israel jon tiꞌ, ẍi skꞌaneal jun sbꞌit naj David tuꞌ.
Jix lawi tuꞌ jix yalon masanil ebꞌ conobꞌ jaxca tiꞌ: Yun ojabꞌi, catuꞌ jix yalon watxꞌ kꞌane ebꞌ tet Jehová.
37 Queytuꞌ jix yun yoc can naj Asaf yetoj cꞌal ebꞌ Levita jaꞌjun yetoj yu naj rey David, bꞌey jix cancan teꞌ Scaẍail Swa Kꞌane Jehová, yet chi bꞌitni cꞌal ebꞌ junjun cꞌu, jatacꞌalaꞌ tzet chi yun ebꞌ tituꞌ. 38 Jix can cꞌal pax can naj Obed-edom yetoj ebꞌ jaꞌjun yetoj, ey 68 ebꞌ yican jaꞌjun yetoj. Jaꞌ naj Obed-edom, scꞌaal Jedutún cꞌal Hosá, jaꞌ ebꞌ jix teynen can snail scalubꞌal Dios. 39 Jix can cꞌal pax naj yakꞌomal xaambꞌal chi yij Sadoc, yetoj cꞌal ebꞌ yet yakꞌomal xaambꞌal jaꞌjun yetoj, bꞌey jun Kꞌap Na tol asan Jehová ey yet, bꞌey tzalan yul yet Gabaón, 40 yet chi yakꞌon cꞌal tzꞌaꞌ xaambꞌal ebꞌ tet Jehová bꞌey jun yet xaambꞌal, yet junjun skꞌinibꞌalil, cꞌal yet yeycꞌualil, jaxca wal ye can stzꞌibꞌele wan chejbꞌanile yet Jehová, wan jix yakꞌ can tet conobꞌ Israel. 41 Jaꞌ yetoj ebꞌ yakꞌomal xaambꞌal tuꞌ jix cancan pax naj Hemán, yetoj Jedutún yetoj cꞌal jaywanxa ebꞌ jix sicꞌle el yetoj, jaꞌton ebꞌ eyoc yibꞌan tol chi bꞌitni, jix yalon ebꞌ jaxca tiꞌ: Al-le ojabꞌ watxꞌ kꞌane tet Jehová, yutol ey cꞌal scamcꞌulal Naj kin. 42 Jaꞌ ebꞌ tuꞌ, jix xuon trompeta cꞌal yaon oc chꞌen patxquiltaj chꞌen ebꞌ, yetoj cꞌal wanxa mitxꞌkꞌabꞌe yet chi oc bꞌit tet Dios. Jaxa pax ebꞌ scꞌaal naj Jedutún jix teynen stiꞌ spuertail scalubꞌal Jehová.
43 Jix lawi tuꞌ xin, jix meltzotoj masanil ebꞌ ánima bꞌey sna. Queytuꞌ jix yun smeltzo cꞌal pax naj rey David bꞌey sna. Jix yalon watxꞌ kꞌane yibꞌan masanil mactxequel caan yetoj bꞌey yul sna.