¡Kalwej yu diosalil tet Dios, yutol watxꞌ ton Naj!

2 ¿Mactxequel oj tzaji yalon el jantaj tzet qꞌueyubꞌtaj chi yun Jehová? ¿Mactxequel oj skeꞌ sbꞌitni tet jaxca wal smooalil?

3 Tzalacꞌulal yet ebꞌ chi jijen ẍejbꞌanil Dios, catuꞌ chi sbꞌeybꞌalnen sjichanil ebꞌ.

4 Jaach Jehová jin Diosal, chin ja naꞌtej yet oj ja wakꞌon ja watxꞌcꞌulal yibꞌan ja conobꞌ tiꞌ. Naꞌ jin cꞌaltej yet oj jaach jul jin ja colon eloj,

5 yet oj wilon ja watxꞌcꞌulal yetoj ebꞌ wet conobꞌ sicꞌbꞌil el ja wu tiꞌ, yet oj jin tzala yetoj ebꞌ sicꞌlebꞌil.

6 Laan jix yun yoc cu penail yetoj ebꞌ cu mam icham jon. Jix cu pitne cu bꞌa ey jaach, caw pena jix el kunen jon.

7 Jaꞌ yet jix ecꞌle ebꞌ cu mam icham bꞌey txꞌotxꞌ Egipto, cꞌam yeloc apnoj jantaj tzet jix ja txꞌox tet ebꞌ. Jix too qꞌueycꞌulal ja camcꞌulal yu ebꞌ. Jaꞌ bꞌey stiꞌ jaꞌ Cajin Mar jix oc spitalil ebꞌ ey jaach.

8 Yu cꞌal ja camcꞌulal yin ebꞌ, yuxan jix ja colcan eltej ebꞌ, jix ja txꞌoxon el ja wipalil, yet watxꞌ cꞌam tzet chi al-le yin ja kꞌane.

9 Jix jaꞌ mitxꞌoc tucan jaꞌ Cajin Mar, jix tajtoj txꞌotxꞌ yet jix oc tucan jaꞌ ja wu. Jix kꞌaxbꞌon ecꞌtoj ebꞌ ja conobꞌ snan yul jaꞌ mar tuꞌ, jaxca tol tajin txꞌotxꞌ bꞌey jix ecꞌtoj ebꞌ.

10 Queyton tuꞌ jix yun ja colon can el ebꞌ yul skꞌabꞌ scajat ebꞌ, jaꞌton wan chi chichon oc scꞌul yin ebꞌ.

11 Jaꞌ jaꞌ mar tuꞌ jix qꞌueyon can el ebꞌ chi jowi oc yin ebꞌ tuꞌ; cꞌamxa junoj ebꞌ jix skeꞌ scolon sbꞌa.

12 Yu jun tzet jix yil ebꞌ ánima tuꞌ, yuxan jix yaoc ebꞌ yin scꞌul jantaj tzet albꞌilcan ja wu; catuꞌ jix yalon watxꞌ kꞌane ebꞌ yin bꞌital ey jaach.

13 Jaxa jix yunne, yin eymanil jix yun stoo qꞌueycꞌulal tzet jix ja txꞌox yil ebꞌ tuꞌ. Ma yechbꞌane ebꞌ tzet cha naꞌ yin ebꞌ.

14 Jaxa bꞌey txꞌotxꞌ cusiltaj txꞌotxꞌ tuꞌ, jix xꞌemtej sjowal ja cꞌul ebꞌ. Yu wal spekꞌal ebꞌ, yuxan jix jaach yakꞌ porobꞌal ebꞌ.

15 Jix ton ja wakꞌ tzet chi yoche ebꞌ; asan xin, jix ja watej jun yaꞌbꞌil xol ebꞌ yet chi cam ebꞌ yu.

16 Jaꞌ yet eyecꞌ ebꞌ bꞌey bꞌulan ey ebꞌ tuꞌ, caw jix chichon oc scꞌul ebꞌ ja win, caw pena jix snaꞌ ebꞌ yin Moisés cꞌal yin Aarón, tol sicꞌbꞌil el ja wu.

17 Yu jun tuꞌ xin, yuxan jix sjaj sbꞌa txꞌotxꞌ txꞌotxꞌ, catuꞌ jix bꞌukꞌle eytoj naj Datán cꞌal Abiram yu txꞌotxꞌ yetoj cꞌal ebꞌ jaꞌjun yetoj ebꞌ.

18 Jix tit jun kꞌakꞌ xol ebꞌ masanil, pilan jix tzꞌaꞌtoj ebꞌ chi unen spenail tuꞌ.

19 Jaꞌ bꞌey wonan Horeb^a jix swaꞌne jun yechel wacax tol oro xacꞌal eloj, catuꞌ jix yiꞌon ey sbꞌa ebꞌ tet jun echele tuꞌ.

20 Queyton tuꞌ jix yun jaach sbꞌejoncan ebꞌ, jaxa tet yechel jun wacax loꞌom cꞌultaj jix yiꞌey sbꞌa ebꞌ.

21 Jix jaach too qꞌueycꞌulal yu ebꞌ, caxcꞌal mi jix ja txꞌox ja wipal yet jix ja wiꞌon eltej ebꞌ bꞌey txꞌotxꞌ Egipto.

22 Jaꞌ bꞌey smajul txꞌotxꞌ ebꞌ yicꞌaal naj Cam, caw qꞌueyubꞌtaj tzet jix ja wunne, caw eyxa smey tzet jix ja wun yin jaꞌ Cajin Mar.

23 Jix ja naꞌoni tol chi qꞌueyle el ebꞌ, jaxa naj Moisés tol sicꞌbꞌil el ja wu, jix oc tean ja win, yuxan jix ecꞌtoj sjowal ja cꞌul yin ebꞌ, yuxan ma xa qꞌueyle el ebꞌ ja wu.

24 Jaꞌ yet jix bꞌey cꞌaltoj, jix yakꞌ caabꞌcꞌulal ebꞌ yin jun txꞌotxꞌ txꞌotxꞌ watxꞌ yili, ma yaoc ebꞌ yin scꞌul jantaj tzet albꞌilcan ja wu.

25 Jaꞌ yul skꞌap na ebꞌ, jaꞌ tituꞌ jix yal pena kꞌane ebꞌ ja win; ma cꞌal sjije ebꞌ tzet jix ja walaꞌ.

26 Yuxan jix ja wakꞌcan ja tiꞌ yin ebꞌ jaxca tiꞌ: Jix ja waloni tol oj cam ebꞌ bꞌey txꞌotxꞌ cusiltaj txꞌotxꞌ,

27 catuꞌ oj akꞌle cam yicꞌaal ebꞌ, catuꞌ oj sajlem cantoj ebꞌ bꞌey txꞌoj conobꞌal.

28 Jix yiꞌon ey sbꞌa ebꞌ tet jun comon dios chi yij Baal-peor, catuꞌ jix ẍiꞌon noꞌ xaambꞌal ebꞌ, wan chi akꞌle tet comon dios tol camnaj eloj.

29 Jaꞌ yetoj spena bꞌeybꞌal ebꞌ tuꞌ, jix xꞌemtej sjowal ja cꞌul ebꞌ, catuꞌ jix jul camich xol ebꞌ.

30 Ey jun winaj chi yij Finees, jaꞌ jix makꞌon cam jun ey spenail tuꞌ, queytuꞌ jix yun yoc tucan camich xol ebꞌ.

31 Yu jun tzet jix yun jun winaj tuꞌ, jix oc swatxꞌiloj ebꞌ, cꞌam bꞌakꞌin oj toj qꞌueycꞌulal ja wu, yetoj pax yicꞌaal naj yet bꞌakꞌin.

32 Jacꞌalaꞌ bꞌey jaꞌ jaꞌ yet Meribá jix xꞌemtej sjowal ja cꞌul ebꞌ; yu cꞌal jun tuꞌ, yuxan man watxꞌoj jix yun yilon oc naj Moisés.

33 Jix txꞌemle tac scꞌul naj Moisés yu ebꞌ, yuxan comon xacꞌal jix yute kꞌanabꞌ sbꞌa.

34 Ma qꞌueyle el wan conobꞌ tuꞌ yu ebꞌ Israel, jaꞌton wan conobꞌ tol jix ja walaꞌ tol tꞌinan chi cami.

35 Jaꞌ jun jix yun ebꞌ, tol jix sjunbꞌane sbꞌa ebꞌ yetoj wan txꞌoj conobꞌal, jaxa sbꞌeybꞌal ebꞌ ánima tuꞌ jix sbꞌeybꞌalne ebꞌ.

36 Catuꞌ jix yiꞌon ey sbꞌa ebꞌ tet sdiosal wan txꞌoj conobꞌal tuꞌ. Jaꞌton wal yu wan tuꞌ, yuxan jix etex el ebꞌ.

37 Jix yakꞌon scꞌaal cꞌal scutzꞌin ebꞌ yin xaambꞌalil tet ebꞌ demonio.

38 Jix maltoj ẍiqꞌuil ebꞌ unin cꞌam spenail yu ebꞌ, jaꞌton ẍiqꞌuil scꞌaal ebꞌ, cꞌal scutzꞌin ebꞌ. Jix yakꞌon xaambꞌal ebꞌ tet sdiosal ebꞌ a Canaán, jix etex cantoj txꞌotxꞌ txꞌotxꞌ yu ẍiqꞌuil ebꞌ tuꞌ.

39 Jix yetnetoj sbꞌa ebꞌ yu spena bꞌeybꞌal tuꞌ; jix oc ebꞌ yin amulal.

40 Jix xꞌemtej sjowal ja cꞌul ebꞌ, catuꞌ jix ja waloni tol manxa ja conobꞌoj ebꞌ.

41 Jix ja bꞌejcan oc ebꞌ yul skꞌabꞌ ebꞌ txꞌoj conobꞌal, catuꞌ jix cancan ebꞌ yul skꞌabꞌ scajat tuꞌ.

42 Jix cancan ebꞌ yalan yu ebꞌ scajat; jix eyqꞌuey ebꞌ yul skꞌabꞌ ebꞌ.

43 Caw ecꞌal el jix jaach colwa yetoj ebꞌ, ma cꞌal snaꞌ niꞌoj ebꞌ tzet naꞌbꞌil ja wu yin ebꞌ; tol jix yakꞌ cꞌal ip ebꞌ stoo yin spenail.

44 Jaxa yet eyoc ebꞌ xol syaꞌilal, jix ja wabꞌen tzet jix yal ebꞌ yin xa.

45 Jix ja naꞌtej bꞌey jix ja wakꞌcan ja tiꞌ tet ebꞌ, queytuꞌ jix yun ja qꞌuexon ja naꞌbꞌal yin ebꞌ, yutol caw miman ja camcꞌulal yin ebꞌ.

46 Jix swaꞌne oc snaꞌbꞌal ebꞌ scajat ebꞌ tuꞌ, yet watxꞌ, watxꞌ xa chi yute snaꞌbꞌal ebꞌ yin ebꞌ.

47 Jaach jin Diosal, colon eloj. Iꞌon eltej bꞌey wan nacionlaj tiꞌ, yet watxꞌ chi kal cu watxꞌ kꞌane ey jaach, yet watxꞌ yin tzalacꞌulal chach cu bꞌitne.

48 ¡Al-le ojabꞌ watxꞌ kꞌane tet Jehová cu Diosal jaon Israel jon tiꞌ! Yun ojabꞌi, ẍi ojabꞌ masanil ebꞌ.

¡Al-le ojabꞌ watxꞌ kꞌane tet Jehová!