2 Bꞌitnojonwej tet Naj, kalwej el jantaj tzet qꞌueyubꞌtaj jix yunne.

3 Tzalajonwej yin Jehová, ey ojabꞌ tzalacꞌulal yin ebꞌ chi oc yin eyilal tet.

4 Cu kꞌanwej scolwal Jehová, kiꞌwej ey cu bꞌa tet Naj.

5-6 Jaon yicꞌaal jon Abraham, naj ẍejabꞌ Jehová, jaon yicꞌaal jon Jacob sicꞌbꞌil jon el yu, cu naꞌwejtej jantaj tzet qꞌueyubꞌtaj jix yunne, yetoj cꞌal chejbꞌanile albꞌilcan yu.

7 Jaꞌ Jehová cu Diosal, jaꞌ chi yakꞌ yaawil yibꞌan masanil txꞌotxꞌ txꞌotxꞌ tiꞌ.

8 Chi cꞌal yakꞌ eloc bꞌey jix yakꞌ can stiꞌ. Yin xa smilal sbꞌisil yicꞌaal ebꞌ ánima, bꞌey chi yakꞌ eloc tzet yalnaj canoj.

9 Jix yakꞌ eloc bꞌey jix yakꞌ can stiꞌ tet Abraham, cꞌal bꞌey jix yakꞌ can stiꞌ tet Isaac.

10 Jix eloc bꞌey jix yakꞌ can stiꞌ tet Jacob naj kichmam jaon conobꞌ Israel jon tiꞌ, jix yaon can oc yin leyalil.

11 Jix yalon Naj jaxca tiꞌ: Oj wakꞌ txꞌotxꞌ txꞌotxꞌ yet Canaán ey jex an, yet chi oc txꞌotxꞌ je majuloj, ẍi Dios.

12 Jaywanne ebꞌ cu mam icham yet tuꞌ, yutol ecꞌabꞌwom cꞌal yeoc ebꞌ bꞌey txꞌotxꞌ txꞌotxꞌ tuꞌ.

13 Tucꞌal jix caey ecꞌ ebꞌ junoj tiempoal bꞌey junjun conobꞌ, cꞌal bꞌey chi ina yakꞌon yaawil ebꞌ eyoc yin reyal.

14 Jaꞌ Dios ma yal scꞌul jix etnele ebꞌ sconobꞌ tuꞌ, yuxan jix tenchanele ebꞌ rey tuꞌ, jix yalon tet ebꞌ jaxca tiꞌ:

15 Cꞌam ojabꞌ che yetne ebꞌ jin conobꞌ tol sicꞌbꞌil el wu, cꞌam ojabꞌ che yetne ebꞌ jin chejabꞌ, ẍi Dios tet ebꞌ.

16 Jaꞌ Dios jix aontej jun miman wail bꞌey jun txꞌotxꞌ tuꞌ, pilan jix yiꞌcan ecꞌ masanil tzet chi sloꞌ ebꞌ.

17 Asan xin, ey jun achꞌe winaj chi yij José, jaꞌ jix bꞌabꞌi chejletoj sattaj ebꞌ yu Dios, jun jix txonletoj yu ebꞌ yuẍtaj yin yakꞌomal servilal.

18 Jix yasitoj yajan naj yu chꞌen cadena, jix kꞌal-le oc chꞌen cadena yin snukꞌ naj,

19 masantaꞌcꞌal jix yun tzet jix yal can el naj José tuꞌ, catuꞌ jix xꞌoxon Jehová tol yel ton tzet jix yalaꞌ.

20 Jaꞌ naj rey eyoc yin yaawil bꞌey jun miman conobꞌ tuꞌ, jaꞌ jix jajon eltej José yul preso.

21 Jix ale oc naj José yin yilomaloj sna naj rey tuꞌ, cꞌal yakꞌon yaawil naj yibꞌan jantaj bꞌey chi ina yakꞌon yaawil naj rey tuꞌ.

22 Jix cuywa naj xol ebꞌ yaaw yet chi akꞌle snaꞌbꞌal ebꞌ, catuꞌ jix akꞌle can snaꞌbꞌal ebꞌ icham winaj yu José.

23 Jaꞌ yet jix ecꞌ cꞌal niꞌoj tiempo xin, catuꞌ jix apni oc ebꞌ Israel, jaꞌton Jacob, jix apni oc bꞌey txꞌotxꞌ Egipto, jaꞌ tituꞌ jix caey ecꞌ bꞌey txꞌotxꞌ xꞌotxꞌ ebꞌ yicꞌaal naj Cam.

24 Jaꞌ Dios jix akꞌon chꞌibꞌ sbꞌisil yicꞌaal ebꞌ; yel xacꞌal jelan jix eloc ebꞌ yintaj ebꞌ a Egipto tuꞌ.

25 Jaꞌ Dios jix qꞌuexon snaꞌbꞌal ebꞌ a Egipto yet chi etnele ebꞌ Israel tuꞌ yu ebꞌ, catuꞌ jix etnele cꞌal pax ebꞌ ẍejabꞌ Dios yu ebꞌ.

26 Jix lawi tuꞌ, jix chejletoj naj Moisés cꞌal Aarón yu Dios, jaꞌton naj sicꞌbꞌil el yu.

27 Jix akꞌle sjelanil ebꞌ yu Dios, yet chi skeꞌ xꞌoxon wan milagro ebꞌ tet ebꞌ a Egipto, jaꞌton wan qꞌueyubꞌtaj yili jix yun ebꞌ bꞌey txꞌotxꞌ xꞌotxꞌ ebꞌ yicꞌaal Cam.

28 Jaꞌ Dios jix aontej kꞌejkꞌinal bꞌey masanil yul yet Egipto, ma cꞌaltaꞌ ẍaꞌ yabꞌ ebꞌ a Egipto tzet jix yal ebꞌ.

29 Jix chicꞌbꞌi el masanil jaꞌ mimej jaꞌ, jix cam masanil noꞌ pescado ey yul jaꞌ.

30 Jix yakꞌon pitzcꞌu a noꞌ patzaꞌ bꞌey masanil yul yet Egipto, jix apni oc noꞌ bꞌey sat xꞌat naj rey.

31 Jix yalon Dios, tol chi pitzcꞌu a noꞌ yaax jaꞌ us, cꞌal noꞌ niẍtej us, jaxca xacꞌal mucꞌ jix yun sjul noꞌ yaax jaꞌ tuꞌ, jix noel masanil yul yet Egipto yu noꞌ.

32 Jix secon eytej mimej sajbꞌat bꞌey satcan sqꞌuexeloj nabꞌ; tuxa cꞌal chi nilili smakꞌwa cꞌu.

33 Jix lawi el masanil yawo ebꞌ, cꞌal teꞌ higo awbꞌil yu ebꞌ; jix lawi el jechlabꞌoj skꞌabꞌlaj teꞌ teꞌ.

34 Jix yalon Dios tol chi apni oc noꞌ kochiꞌ noꞌ. Cꞌamxa chi alcha jantaj noꞌ jix apni ocoj.

35 Jix lawi el masanil an cꞌultaj yu noꞌ; cꞌal masanil tzetyetal jix chꞌibꞌ sat txꞌotxꞌ tuꞌ, pilan jix lawi el yu noꞌ.

36 Jix makꞌle cam sbꞌabꞌel unin ebꞌ a Egipto yu Jehová. Jix cam ebꞌ bꞌabꞌel unin bꞌey junjun na.

37 Jix lawi tuꞌ xin, jix iꞌle eltej ebꞌ conobꞌ Israel yu Dios, miman chꞌen oro cꞌal chꞌen plata jix yijtej ebꞌ; cꞌam junoj mac jix tenon oc tucan ebꞌ.

38 Caw jix tzala a ebꞌ a Egipto yet jix eltej ebꞌ conobꞌ Israel tuꞌ, yutol caw chi xiw ebꞌ tet ebꞌ.

39 Jaꞌ Dios jix majchen ey ebꞌ Israel yetoj jun asun; jaxa yet akꞌbꞌalil eyoc skꞌakꞌal yet chi tzejtanele sbꞌe ebꞌ yu.

40 Jix skꞌanon chiꞌbꞌe ebꞌ tet Dios, yuxan jix aletej noꞌ ubꞌ tet ebꞌ. Jaꞌton loꞌbꞌe chi tit satcan jix akꞌon no scꞌul ebꞌ.

41 Jix jattoj jun chꞌen miman chꞌen yu Dios, jix eltej secna jaꞌ jaꞌ sat chꞌen. Jix bꞌeytoj jaꞌ jaxca junoj miman jaꞌ bꞌey txꞌotxꞌ cusiltaj txꞌotxꞌ.

42 Yutol jix snaꞌtej jantaj tzet yalnaj can tet jun ẍejabꞌ, jaꞌton Abraham.

43 Queyton tuꞌ jix yun yiꞌon eltej Dios ebꞌ sconobꞌ sicꞌbꞌil el yu, snan xol aw yet tzalacꞌulal jix yun yeltej ebꞌ conobꞌ Israel bꞌey Egipto.

44 Catuꞌ jix ale can oc xꞌotxꞌ wanxa txꞌoj conobꞌal yul skꞌabꞌ ebꞌ yu Dios, yetoj cꞌal masanil tzet awbꞌil sat txꞌotxꞌ tuꞌ yu ebꞌ ánima.

45 Queyton tuꞌ jix yun yiꞌle eltej ebꞌ conobꞌ Israel yu Dios, yet watxꞌ chi sbꞌeybꞌalne chejbꞌanile ebꞌ, cꞌal sjijen cuybꞌanile ebꞌ jaxca yalon sley Dios.

¡Al-le ojabꞌ watxꞌ kꞌane tet Jehová!