2 Jaꞌ sajkꞌinal chach pichoni. Jix ja jenbꞌatoj satcan jaxca junoj kꞌap na.

3 Jix ja waꞌne ey ja na yibꞌan jaꞌ jaꞌ. Jaꞌ asun chi oc ja carruajeoj, chach bꞌeyecꞌ xol kaꞌeꞌ.

4 Jaꞌ kaꞌeꞌ chi oc ja chejabꞌoj, jaxa xaj kꞌakꞌ chach akꞌon servil.

5 Jix ja waꞌne can oc txꞌotxꞌ txꞌotxꞌ tiꞌ yibꞌan sbꞌatxlubꞌal yet watxꞌ cꞌam bꞌakꞌin chi elcan bꞌey eeyoj.

6 Jaꞌ jaꞌ mar jix oc can joyan yin txꞌotxꞌ txꞌotxꞌ tiꞌ, jaxca tol spichil txꞌotxꞌ yeocoj. Jix majchele can ey jaꞌ jaꞌ yu txꞌotxꞌ mimej wonan.

7 Jix ja tenchanen jaꞌ, jix ela jaꞌ ey jaach; eyman jix toocan jaꞌ yet jix yabꞌen yoc yul ja nukꞌ jaxca sbꞌilwi cꞌu.

8 Jix ecꞌ el jaꞌ sjolomlaj wonan, jix toocan jaꞌ bꞌey jobꞌelaj; jaꞌ bꞌey jix ja txꞌox cantoj jaꞌ, jatuꞌ jix cancan jaꞌ.

9 Jix ja waon can ey smoonal jaꞌ, yet watxꞌ cꞌam chi ecꞌtej jaꞌ bꞌey yul moon tuꞌ, yet watxꞌ cꞌamxa chi majchele ey txꞌotxꞌ txꞌotxꞌ tiꞌ yu jaꞌ junelxa.

10 Jaach jix ja walaꞌ yuxan ey jaꞌ snukꞌ jaꞌ, yetoj jaꞌ mimej jaꞌ chi ecꞌ el snanlaj mimej wonan.

11 Jaꞌton jaꞌ chi yucꞌ noꞌ xol-laj teꞌal noꞌ; chi oc tucan stajin tiꞌal noꞌ xol-laj teꞌal bꞌuru yu jaꞌ.

12 Jaꞌ bꞌey stiꞌlaj jaꞌ miman jaꞌ chi swaꞌnen oc sweyubꞌ noꞌ tzꞌiquin; chi okꞌ noꞌ skꞌabꞌlaj teꞌ teꞌ.

13 Jata cꞌal bꞌey satcan ey ja na, cha waon eytej nabꞌ yibꞌan txꞌotxꞌ mimej wonanlaj; catuꞌ chi satni masanil awo ey sat txꞌotxꞌ txꞌotxꞌ tiꞌ.

14 Cha wakꞌon chꞌibꞌ an cꞌultaj yet watxꞌ chi low noꞌ noꞌ, cha wakꞌon pax chꞌibꞌ sat masanil awo, catuꞌ chi yakꞌon cu loꞌbꞌe txꞌotxꞌ txꞌotxꞌ tiꞌ jon.

15 Cꞌal vino chi akꞌon tzalabꞌoj cu cꞌul, cꞌal aceite chi akꞌon kopcha el cu sat, cꞌal ixim ixim chi aon oc kip.

16 Chi yaaxbꞌi el masanil teꞌ teꞌ yu nabꞌ, cꞌal masanil teꞌ kꞌuteꞌ jix ja waw bꞌey txꞌotxꞌ Líbano.

17 Jaꞌ tituꞌ chi swaꞌne sweyubꞌ noꞌ kocꞌ tzꞌiquin, cꞌal noꞌ julom pescado, jatuꞌ chi wey noꞌ ẍumuclaj teꞌ ta.

18 Jaꞌ bꞌey satlaj mimej wonan ey noꞌ xol-laj teꞌal chiw, jaxa yul-laj chꞌen nachꞌen ey noꞌ txitx.

19 Jix ja waꞌnen can xꞌaaw, yet chi oc yin bꞌisbꞌaleal; yotaj cꞌu janicꞌ oj scꞌubꞌa el sbꞌa.

20 Cha wakꞌon jul kꞌejkꞌinal yet akꞌbꞌalil, jaxa yeltej noꞌ xol-laj teꞌal noꞌ lowoj.

21 Chi okꞌ noꞌ bꞌalam yu ẍiꞌbꞌe, chi skꞌanon loꞌbꞌe noꞌ ey jaach.

22 Jaxa yet chi aol cꞌu xin, chi too yewbꞌa el sbꞌa noꞌ; jaxa bꞌey snachꞌen noꞌ chi ey cupan noꞌ sweyi.

23 Jaxa ebꞌ ánima chi eltej, catuꞌ chi too ebꞌ bꞌey smulnail; jatuꞌ chi mulna ebꞌ yet chi ecꞌ cꞌu.

24 Jaach Jehová jin Diosal, cꞌamxa chi bꞌischa jantaj tzet jix ja waꞌne; yetoj ja jelanil jix ja waꞌne a masanil tzetyetal. Caw jix noel sat txꞌotxꞌ txꞌotxꞌ tiꞌ yu jantaj tzet jix ja waꞌne canoj.

25 Jaꞌ jaꞌ mar caw miman sat jaꞌ, naat ta chi apni jaꞌ. Jaꞌ xol jaꞌ tuꞌ cꞌamxa chi bꞌischa jantaj noꞌ noꞌ ey yul jaꞌ, ey noꞌ mimej, ey noꞌ yaliẍ.

26 Jaꞌ yibꞌan jaꞌ tuꞌ chi ecꞌabꞌ teꞌ barco; jatuꞌ ey noꞌ mimej Leviatán jix ja waꞌne, catuꞌ chi ecꞌ noꞌ yul jaꞌ mar.

27 Masanil junjun tujan noꞌ noꞌ tuꞌ, tꞌanan jaach cꞌal oc yin noꞌ, yutol jaach cha wakꞌ sloꞌbꞌe noꞌ yet ey swail noꞌ.

28 Jaach cha wakꞌ sloꞌbꞌe noꞌ masanil; caw bꞌejan yel ja wu, yet watxꞌ chi low noꞌ sicꞌlebꞌil.

29 Ta cha wiꞌel ja sat yin noꞌ, chi xiwa noꞌ, cꞌamxa chi yiꞌ skaꞌeꞌ noꞌ, chi cam noꞌ, catuꞌ chi oc can noꞌ yin pojojal.

30 Ta cha wakꞌ cꞌal yiquisal noꞌ xin, chi jobꞌcha noꞌ, queyton tuꞌ chi yun swaꞌxi a yili txꞌotxꞌ txꞌotxꞌ tiꞌ junelxa.

31 Jaach jin Diosal, ey ojabꞌ ja tzejejial. Caw chi tzala ja cꞌul yu jantaj tzet jix ja waꞌne.

32 Jaꞌ yet chach oc tꞌanan yin txꞌotxꞌ txꞌotxꞌ tiꞌ, eyman chi bꞌilwi a txꞌotxꞌ; chi el smucꞌal txꞌotxꞌ mimej wonan yet chach oc mitxꞌan yin txꞌotxꞌ.

33 Yajbꞌan iquis jin to ecꞌoj, oj jin bꞌitnoj ey jaach, yutol jin Diosal jaach. Oj wal jin watxꞌ kꞌane tet Naj, yajbꞌan chi skeꞌ wiꞌon jin kaꞌeꞌ.

34 Toloj wal cha wakꞌ tzalabꞌoj ja cꞌul yin wan jin naꞌbꞌal tiꞌ; asanne ja win chi wiꞌ jin tzalacꞌulal.

35 Qꞌuey ojabꞌ can el ebꞌ penawom bꞌey sat txꞌotxꞌ txꞌotxꞌ tiꞌ, cꞌal ebꞌ chach intajne can eloj.

¡Jain tiꞌ, yin masanil jin cꞌul oj wal watxꞌ kꞌane tet Jehová! Al-le ojabꞌ watxꞌ kꞌane tet Naj xin.