2 Yin masanil jin cꞌul chi walon jin watxꞌ kꞌane tet Jehová, man oj toj qꞌueycꞌulal swatxꞌcꞌulal Naj chi yakꞌ ey jin.

3 Jaꞌ Naj chi akꞌon tan masanil jin penail. Jaꞌ chi akꞌon waꞌxoj jin cꞌul xol masanil syaꞌilal.

4 Jaꞌ Naj chin colon el yul skꞌabꞌ camich. Jaꞌ chin camcꞌulneni, chi okꞌ scꞌul Naj win.

5 Jaꞌ Naj chi akꞌon masanil tzetyetal watxꞌ ey jin, catuꞌ chin oc achꞌeal yu, jaxca noꞌ mimej chii.

6 Jaꞌ Jehová chi waꞌnen oc yin sjichanil yet chi etnele junoj mactxequel yu yet animail.

7 Jaꞌ Jehová jix xꞌox sbꞌeybꞌal cꞌal jantaj tzet qꞌueyubꞌtaj jix yun tet Moisés yetoj pax ey jon jaon conobꞌ Israel jon tiꞌ.

8 Caw watxꞌ snaꞌbꞌal Jehová, caw chi okꞌ scꞌul kin. Man comonoj chi tit sjowal, yutol caw ey scamcꞌulal.

9 Man kocꞌtaj cꞌal chi stit sjowal, cꞌam chi chichon oc scꞌul kin.

10 Ma yakꞌ cu toolane cu penail, cꞌal cu mul, jaxca smooalil.

11 Yel xacꞌal miman scamcꞌulal yin ebꞌ jijem chi yute sbꞌa tet, jaxca wal snaatil yeatoj satcan yibꞌan txꞌotxꞌ txꞌotxꞌ tiꞌ.

12 Naat jix yiꞌcan el cu penail Naj cu cꞌatan, jaxca snaatil bꞌey chi aol cꞌu, masantaꞌcꞌal bꞌey chi too cꞌu.

13 Jaxca chi yun yokꞌ scꞌul junoj mame yin yuninal, queytuꞌ chi yun yokꞌ scꞌul Jehová yin ebꞌ jijem chi yute sbꞌa tet.

14 Yotaj Naj tzet jix yun cu waꞌxi, yotaj sicꞌlebꞌil tol pojoj jon.

15 Jaꞌ cu kꞌinal jaon ánima jon tiꞌ, laan jaxca skꞌinal an ita, yet chi aol an, chi xumacli an;

16 jaxa yet chi jul sjowal kaꞌeꞌ yin an, jaxa stajel an tuꞌ. Cꞌam mactxequel chi abꞌen tzet jix yuntoj an.

17 Jal scamcꞌulal Jehová xin, cꞌam slawubꞌal ta tol jijem cꞌal chi kute cu bꞌa tet. Jaꞌ swatxꞌcꞌulal ey cꞌal ecꞌ yetoj ebꞌ kicꞌaal yet bꞌakꞌin, yutol chi cꞌal yun tzet albꞌilcan yu,

18 catuꞌ cꞌam chi bꞌejlecan ebꞌ jijem chi yute sbꞌa tet Naj.

19 Jaꞌ Jehová jix swaꞌne sdespacho bꞌey satcan, catuꞌ chi yakꞌon yaawil yibꞌan masanil.

20 Jex yángel Jehová jijem che yute je bꞌa tet, Alwej je watxꞌ kꞌane tet Jehová, jex tol jijem jex yin tzet chi yalaꞌ.

21 Je masanil jex che yakꞌ servil Jehová bꞌey satcan, alwej je watxꞌ kꞌane tet, yutol jijem jex je yunen tzet chi yalaꞌ.

22 Masanil tzet waꞌnebꞌil yu Jehová, yal ojabꞌ watxꞌ kꞌane tet.

¡Yin masanil jin cꞌul oj walon jin watxꞌ kꞌane tet Naj!