2 Cꞌam ojabꞌ chach el txꞌuman ey jin yet ey jin oc xol bꞌiscꞌulal. El ojabꞌ yin ja cꞌul tol cha wabꞌ jin txa; yin ojabꞌ eymanil chach takꞌwi ey jin yet chin kꞌanon ja colwal.

3 Ilaꞌ tol lalan slawi ey jin kꞌinal, jaxca chi yun sqꞌueya mucꞌ; lalan stzꞌaꞌtoj jin bꞌajil chi wabꞌe, jaxca tol eyoc stzakꞌakꞌ yin.

4 Cꞌamxa yip jin cꞌul; jaxca wal an tajin cꞌultaj. Cꞌamxa chi tit jin wail.

5 Tuxa jix tajoc lakꞌan jin tzꞌuumal yin jin bꞌajil yutol caw chi cꞌuyuyi yel waw yu okꞌil.

6 Laan jin yetoj junoj noꞌ tonton chi el yaw xol-laj teꞌ, ma jaxca junoj noꞌ toton chi okꞌ bꞌey txꞌotxꞌ cusiltaj txꞌotxꞌ bꞌey cꞌam ánima.

7 Cꞌam chi oc jin weyan. Laan jin jaxca noꞌ tzꞌiquin chi ecꞌ xꞌojli bꞌey solomlaj na.

8 Jaꞌ ebꞌ chi jowi oc win, caw chi xꞌem cus jin cꞌul ebꞌ. Chin yakꞌ bꞌina ebꞌ yet chi yalon bꞌuchwal kꞌane ebꞌ.

9 Jaxca tol stikꞌakꞌil taan jin loꞌbꞌe chin loꞌ; chi calchatoj yal jin sat xol jaꞌ jaꞌ chi wuqꞌue,

10 yu cꞌal ja kꞌakꞌalcꞌulal, cꞌal sjowal ja cꞌul win. Jix jin ja wiꞌon a catuꞌ jix jin ja kꞌojon eyoj.

11 Jaxca junoj enele lalanxa sqꞌueyaoj, queytuꞌ yeoc jin kꞌinal. Lalan jin tajcan el jaxca an cꞌultaj chi wabꞌe.

12 Jal jaach, jaach tiꞌ, yaaw jaach. Tol oj jaach naꞌle cꞌaltej.

13 Aan waanoj, cus ojabꞌ ja cꞌul yin wonan Sión; tuxa jix jul stiempoal yokꞌ ja cꞌul yin.

14 Jaon ja chejabꞌ jon tiꞌ, ey cu camcꞌulal yin chꞌen chꞌen yet Sión, yuxan chi cus cu cꞌul yu jix etex cantoj.

15 Masanil mimej conobꞌ, cꞌal ebꞌ naj rey bꞌey yul yibꞌankꞌinal tiꞌ, oj xiw ebꞌ yu ja mimanbꞌilal, cꞌal ja tzejejial jaach jin Diosal.

16 Jaꞌ yet oj caꞌ waꞌnele a Sión, oj txeclo a ja tzejejial.

17 Oj ja chaꞌ ja wabꞌ xa ebꞌ cꞌam mac chi colwa yetoj, man oj ja tenchane ebꞌ yet oj yalon sbꞌa ebꞌ ey jaach.

18 Tzꞌibꞌcha ojabꞌ can jun tiꞌ yul juun, yet watxꞌ, jaꞌ ebꞌ cꞌamto chi ali, oj yal swatxꞌ kꞌane ebꞌ tet Jehová.

19 Jaꞌ Jehová tꞌanan eytej bꞌey scalubꞌal bꞌey satcan, chi yil eytej txꞌotxꞌ txꞌotxꞌ tiꞌ,

20 yet chi swaꞌne yeoc scuscꞌulal ebꞌ presowom. Cꞌal scolcha can el ebꞌ eyoc yul skꞌabꞌ camich,

21 yet watxꞌ chi al-le el skꞌaneal bꞌey Sión, catuꞌ chi al-le watxꞌ kꞌane yin Dios bꞌey Jerusalén,

22 yet oj jul masanil ebꞌ conobꞌlaj yu jul yiꞌon ey sbꞌa tet Naj.

23 Jaꞌ yet achꞌe winaj jin to, jix ja wiꞌon el wip, jix ja kꞌotxbꞌane jin kꞌinal.

24 Jix walon ey jaach jaxca tiꞌ: Jaach jin Diosal, cꞌam ojabꞌ cha wiꞌel jin kꞌinal yet eyto wip.

¡Yutol jaꞌ ja kꞌinal jaach tiꞌ, cꞌam slawubꞌal!

25 Jatax yet yichbꞌanil jix ja waꞌne ey yich txꞌotxꞌ txꞌotxꞌ tiꞌ, catuꞌ jaach caw jix ja waꞌne satcan.

26 Jaꞌ wan tuꞌ oj qꞌueycan el masanil; jal jaach xin, ey jaach cꞌaltaꞌ ecꞌoj. Jaꞌ wan tuꞌ oj ichambꞌoj jaxca chi yun yichambꞌi an pichile; yutol oj ja qꞌuexcan eloj, jaxca chi yun sqꞌuexon el spichil ebꞌ ánima, catuꞌ chi skꞌojon can el ebꞌ.

27 Jal jaach xin, ey jaach cꞌaltaꞌ ecꞌoj, cꞌam bꞌakꞌin oj lawoj ja kꞌinal.

28 Jaꞌ ebꞌ kuninal jaon ja chejabꞌ jon tiꞌ, tzalacꞌulal oj eecꞌ ebꞌ ja sattaj; yu ja colwal yuxan cꞌam tzet oj iꞌon ebꞌ.