2 Jaon tol colbꞌil jon xa yu Naj, kalwej eloj tol jix cu col-le el yul skꞌabꞌ ebꞌ cu cajat,

3 jaꞌ Naj jix cu yambꞌantej yul-laj wan conobꞌ bꞌey chi aol cꞌu, cꞌal bꞌey chi too cꞌu yetoj cꞌal bꞌey norte cꞌal bꞌey sur.

4 Ey ebꞌ ket conobꞌ jix qꞌueyecꞌ bꞌey txꞌotxꞌ cusiltaj txꞌotxꞌ, cꞌam junoj bꞌe jix ilcha yu ebꞌ, tam wal junoj conobꞌ bꞌey chi skeꞌ scaey ecꞌ ebꞌ.

5 Caw jix tit swail ebꞌ, jix tit pax stajin tiꞌal ebꞌ, lalanxa scam ebꞌ chi yabꞌe.

6 Jaꞌ yu syaꞌilal ebꞌ tuꞌ, yuxan jix yal sbꞌa ebꞌ tet Jehová, jaxa Naj jix colon el ebꞌ xol syaꞌilal tuꞌ.

7 Jix lawi tuꞌ, jix iꞌletoj ebꞌ bꞌey sbꞌeal jun conobꞌ bꞌey chi skeꞌ scaey ebꞌ.

8 Yuxan kalwej yu diosalil tet Jehová yu scamcꞌulal kin, cꞌal yu scolwal tol qꞌueyubꞌtaj yili chi yun kin jaon ánima jon tiꞌ.

9 Jaꞌ Naj chi iꞌon el stajin tiꞌal mac chi taj stiꞌ, catuꞌ chi akꞌle sloꞌbꞌe ebꞌ ey swail.

10 Ey mactxequel tol eyecꞌ bꞌey kꞌej jolinaj yili, bꞌey sbꞌeal camich, preso yeoc ebꞌ yu cuscꞌulal. Jaxca tol pixbꞌil ebꞌ yetoj chꞌen cadena,

11 yutol cꞌam chi sjije ebꞌ tzet jix yal Dios, catuꞌ chi yintajne el ebꞌ tzet naꞌbꞌil yu Naj Tol Jaxa Cꞌal Ocoj.

12 Jix ale oc ebꞌ yin mulnail caw yaꞌtaj. Chi telcꞌo ebꞌ, cꞌam mactxequel chi iꞌon a waan ebꞌ.

13 Jaꞌ yu syaꞌilal ebꞌ tuꞌ, yuxan jix yal sbꞌa ebꞌ tet Jehová, jix col-le el ebꞌ xol syaꞌilal tuꞌ yu Naj.

14 Jix iꞌle eltej ebꞌ xol kꞌejkꞌinal yu Dios, catuꞌ jix iꞌle el chꞌen cadena eyoc yin ebꞌ.

15 Yuxan yal ojabꞌ ebꞌ yu diosalil tet Jehová, yu scamcꞌulal cꞌal yu scolwal tol qꞌueyubꞌtaj chi xꞌox kil jaon ánima jon tiꞌ.

16 Yutol jaꞌ Naj chi makꞌon wejchatoj chꞌen puerta bronce cꞌal eloj, catuꞌ chi sjechon cantoj wan chꞌen eyoc yipomaloj smajil na tuꞌ.

17 Ey mactxequel yaꞌey yu spitalil cꞌal yu spenail, caw chi yabꞌ syaꞌil ebꞌ yu spenail chi yun ebꞌ tuꞌ.

18 Cꞌamxa chi yal scꞌul ebꞌ chi lowi, yutol eyxa oc ebꞌ yul skꞌabꞌ camich chi yabꞌe.

19 Jaꞌ yu syaꞌilal ebꞌ tuꞌ, yuxan jix yal sbꞌa ebꞌ tet Jehová, jix col-le el ebꞌ xol syaꞌilal tuꞌ yu Naj.

20 Jix yalon Naj tol chi waꞌxi scꞌul ebꞌ. Yuxan jix col-le ebꞌ yul skꞌabꞌ camich yu Naj.

21 Yuxan kalwej yu diosalil tet Jehová yu scamcꞌulal, cꞌal yu scolwal tol qꞌueyubꞌtaj yili tzet chi yun scolwa kin jaon ánima jon tiꞌ.

22 Kalwej cu watxꞌ kꞌane tet Naj. Jaꞌ jun tuꞌ, jaxca tol cu xaambꞌal chi kakꞌ tet Naj yu kalon yu diosalil tet, cꞌal cu tzalacꞌulal yet chi kalon el skꞌaneal jantaj tzet jix yun Naj ku.

23 Ey wan ebꞌ txonwom jix ecꞌtoj ebꞌ yibꞌan jaꞌ mar, jix ecꞌ ebꞌ yetoj sbarco yibꞌan jaꞌ.

24 Jaꞌ ebꞌ tuꞌ jix yil ebꞌ tzet qꞌueyubꞌtaj jix yun Jehová.

25 Jaꞌ yet jix yalon Jehová, tol chi yakꞌ sjowal ya pomna sat jaꞌ, caw naat jix a chulna sat jaꞌ.

26 Jix iꞌle a ebꞌ yu jaꞌ, catuꞌ jix iꞌle pax ey ebꞌ, caw jix qꞌueya scꞌul ebꞌ yu smey jaꞌ.

27 Jix ecꞌ stzꞌeytzꞌon ebꞌ jaxca uqꞌuem an, tumi eyto yopiso sjelanil ebꞌ.

28 Jaꞌ yu syaꞌilal jix jul yibꞌan ebꞌ tuꞌ, yuxan jix yal sbꞌa ebꞌ tet Jehová, jix col-le el ebꞌ xol syaꞌilal yu Naj.

29 Yin eymanil jix smitxꞌon oc tucan jun cajxuchum kaꞌeꞌ tuꞌ, queyton tuꞌ jix yun yoc numan jaꞌ.

30 Jix tzala a scꞌul ebꞌ yet jix yilon yoc numna jaꞌ. Jaꞌ Dios jix iꞌontoj ebꞌ bꞌey stiꞌel jaꞌ bꞌey tꞌinan yapni oc ebꞌ.

31 Yuxan kalwej yu diosalil tet Jehová yu scamcꞌulal, cꞌal yu scolwal tol qꞌueyubꞌtaj yili chi xꞌox kin jaon ánima jon tiꞌ.

32 ¡Kiꞌwej a can sbꞌi Dios yet chi syambꞌan sbꞌa ebꞌ conobꞌ! ¡Kiꞌwej a can sbꞌi, cꞌal kalon cu watxꞌ kꞌane yet chi syambꞌan sbꞌa ebꞌ icham winaj!

33 Jaꞌ Jehová chi aon oc txꞌotxꞌ txꞌotxꞌ yin tajinal bꞌey chi ecꞌ jaꞌ mimej jaꞌ, cꞌal jaꞌ snukꞌjaꞌlaj,

34 catuꞌ chi sqꞌuexon can oc txꞌotxꞌ yaax txꞌotxꞌ yin cꞌam tzet chi chꞌibꞌ sat. Yu cꞌal spenail ebꞌ ánima caan tituꞌ, yuxan queytuꞌ chi yute.

35 Jaꞌ Naj chi qꞌuexon can oc txꞌotxꞌ tajin txꞌotxꞌ yin naabꞌ jaꞌ, cꞌal yin snukꞌjaꞌlaj.

36 Jaꞌ tituꞌ chi yakꞌ caey ecꞌ ebꞌ ánima ey swail, catuꞌ chi swaꞌnen a mimej conobꞌ ebꞌ.

37 Chi awwi uva ebꞌ sat txꞌotxꞌ, chi a latzꞌan sat yawo ebꞌ chi syambꞌa, caw miman tzet chi yiꞌ ebꞌ.

38 Jaꞌ Jehová chi yakꞌ syaaxilal tet ebꞌ, catuꞌ chi akꞌle chꞌibꞌ sbꞌisil ebꞌ, chi chꞌibꞌ pax sbꞌisil noꞌ sjobꞌbꞌeal noꞌ ebꞌ.

39 Ta chi iꞌle eytej sbꞌisil ebꞌ, yeynajil xacꞌal mi chi utele ebꞌ yu ebꞌ chi jowi oc yin ebꞌ.

40 Cꞌam yeloc apnoj ebꞌ mimej winaj yul sat Jehová, jix akꞌle qꞌueytoj ebꞌ bꞌey txꞌotxꞌ cusiltaj txꞌotxꞌ bꞌey cꞌamxa bꞌe.

41 Jaꞌ Jehová jix iꞌon el cuscꞌulal yin ebꞌ mebꞌa, catuꞌ jix akꞌle chꞌibꞌ sbꞌisil yuninal ebꞌ jaxca chi yun ẍꞌibꞌ sbꞌisil noꞌ meꞌ.

42 Jaꞌ yet oj il-le jun tiꞌ yu ebꞌ ánima watxꞌ snaꞌbꞌal, oj tzala a scꞌul ebꞌ; jaxa ebꞌ ánima pena snaꞌbꞌal xin, cꞌamxa tzet oj yal ebꞌ.

43 Jaꞌ ebꞌ jelan, snaꞌ ojabꞌ ebꞌ yin wan tiꞌ, catuꞌ naꞌcha ojabꞌ el scamcꞌulal Jehová yu ebꞌ.