2 Jaꞌ yet skꞌinibꞌto, chi oc ian jin bꞌitni ey jaach yetoj arpa, cꞌal yetoj salterio.

3 Jaach jin Diosal, oj jaach jin bꞌitne yin bꞌital xol masanil ánima bꞌey wanojxa mimej conobꞌ.

4 Jaꞌ ja camcꞌulal, yel xacꞌal miman yeoc yintaj satcan. Cꞌam bꞌakꞌin chi qꞌuexlabꞌi tzet cha walaꞌ.

5 ¡Jaach jin Diosal, txeclo ojabꞌ ja mimanbꞌilal bꞌey satcan! ¡Txeclo ojabꞌ a ja wipalil bꞌey masanil yul yibꞌankꞌinal tiꞌ!

6 Jaon camcꞌulnebꞌil jon ja wu tiꞌ, colwaan ketoj yet chi cu colcha el jon, colon el yetoj ja wipal. Takꞌwan ey jon yet chi kalon cu bꞌa ey jaach.

7 Jaach jin Diosal, jaꞌ yet ey jaach ecꞌ bꞌey ja calubꞌal, jix ja walon jaxca tiꞌ: Oj tzala jin cꞌul yet oj jin kocꞌ poꞌonen can ecꞌ txꞌotxꞌ Siquem, cꞌal txꞌotxꞌ spananil Sucot.

8 Jaxa txꞌotxꞌ Galaad cꞌal txꞌotxꞌ Manasés, wet yeoc txꞌotxꞌ. Jaꞌ Efraín, jaxca tol jin chꞌen kꞌoxcꞌom yeoc yin jin jolom; jaxa Judá, jaxca svarail wopiso yeocoj.

9 Jaxa Moab, jaxca palangana bꞌey chin txꞌael jin kꞌabꞌ. Jaxa yibꞌan Edom oj wa cantoj jin xanabꞌ. Yin tzalacꞌulal oj jin awoj yutol jix eyqꞌuey ebꞌ Filisteo wu, ẍi Dios.

10 Jaach jin Diosal, ¿Mac chi skeꞌ jin yiꞌontoj bꞌey conobꞌ tol eyoc smuroal yinlaj? ¿Mac chin iꞌontoj bꞌey Edom?

11 Jaach cu Diosal, tol jix jon ja wintajne can eloj. Cꞌamxa chi yal ja cꞌul chach too yetoj ebꞌ cu soldado yin jowal.

12 Ocan ketoj jon xin, colon el tet ebꞌ cu cajat jon. Ta jaꞌ ebꞌ ket animail chi colwa ketoj jon, ma cꞌaltaꞌ cu colcha el yu ebꞌ jon.

13 Jaꞌ yetoj ja colwal jaach jin Diosal, yuxan oj skeꞌ kakꞌon eyqꞌuey jowal jon. Jaach oj ja tecꞌ can ey ebꞌ chi jowi oc kin jon.