2 Jaꞌ ebꞌ chi alon pena kꞌane win, cꞌal ebꞌ naꞌom a kꞌane, man yeloj chi yal ebꞌ.

3 Jaꞌ ebꞌ chi chichon scꞌul win, caw chi ecꞌ joyoyoj ebꞌ win, chi yoche ebꞌ ey tzet chin yute, jal jin cꞌam niꞌoj tzet chi wute ebꞌ.

4 Jaꞌ spajtzebꞌal jin camcꞌulal chi wakꞌ tet ebꞌ, tol chi chichon oc scꞌul ebꞌ win, jal jin jain tiꞌ xin, ipan cꞌal jin txali yu ebꞌ.

5 Jaꞌ jin watxꞌcꞌulal chi wakꞌ tet ebꞌ, spenail cꞌal jix yun spajtzen ebꞌ ey jin; jaxa spaj jin camcꞌulal yin ebꞌ, tol chin yetne ebꞌ.

6 Jaꞌ ojabꞌ junoj naj pena snaꞌbꞌal cha waoc yin juezal xol ebꞌ; jaꞌ ojabꞌ pax junoj yalomal oc stiꞌ naj, chi meltzo oc yin.

7 Jaxa yet oj naꞌle oc yin spenail tuꞌ; jaꞌ ojabꞌ yet chi yalon sbꞌa tol ojabꞌ chi can yibꞌan yu jun chi colon el tuꞌ.

8 Cꞌotxbꞌane skꞌinal, txꞌoj ojabꞌxa mactxequel chi oc can sqꞌuexeloj yin yopiso.

9 Jaxa ebꞌ yuninal, mebꞌa unin ojabꞌ chi yun cantoj ebꞌ, jaxa yistil cꞌamxa ojabꞌ yichamil.

10 Jaꞌ ebꞌ yuninal, ecꞌ ojabꞌ skꞌan slow sbꞌa ebꞌ stiꞌlaj na; ujtele ojabꞌ ecꞌ ebꞌ bꞌey uchbꞌil can ey sna ebꞌ tuꞌ.

11 Iꞌle ojabꞌ cantoj masanil stzetyetal ebꞌ yu naj akꞌnen tumin yin maanil tet ebꞌ, jaxa ojabꞌ ebꞌ txꞌoj animail chi iꞌon can oc smulnail ebꞌ.

12 Cꞌam ojabꞌ mactxequel chi okꞌ scꞌul yin naj, tam wal tet ebꞌ yuninal tol cannaj can yin mebꞌa uninal.

13 Cꞌam ojabꞌ bꞌakꞌin chi bꞌinale ebꞌ yicꞌaal, joꞌole ojabꞌ qꞌuey sbꞌi yin junelne.

14 Naꞌle ojabꞌtej spenail smam icham yu Jehová, catuꞌ cꞌam ojabꞌ bꞌakꞌin chi joꞌole qꞌuey spenail xutx.

15 Naꞌan ojabꞌ cꞌal spenail tuꞌ yul sat Jehová, catuꞌ cꞌam ojabꞌxa chi bꞌinale ecꞌ sbꞌi sat txꞌotxꞌ txꞌotxꞌ tiꞌ.

16 Yutol cꞌam bꞌey jix okꞌ scꞌul yin yet animail. Jaꞌ tiꞌ yet, tol jix etnele ebꞌ mebꞌa yu, cꞌal ebꞌ yeynajil ánima, cꞌal ebꞌ eyoc yin bꞌiscꞌulal, masantaꞌcꞌal jix makꞌle cam ebꞌ yu.

17 Tutun jaꞌ spenail jix yoche ocoj, yuxan smoo chi intajnele can eloj. Ma yal scꞌul jix yun swatxꞌilal; cꞌam ojabꞌ bꞌakꞌin chi ẍaꞌ ja watxꞌcꞌulal.

18 Jaꞌ pena kꞌane chi yalaꞌ, jaꞌ ojabꞌ chi majchen eyoj, jaxca ojabꞌ tol spichil yeocoj, oc ojabꞌtoj spenail tuꞌ yul scꞌul cꞌal yul-laj sbꞌajil jaxca jaꞌ, ma jaxca aceite.

19 Majchele ojabꞌ el yu pena kꞌane tuꞌ, jaxca chi yun cu majchen ey cu bꞌa yetoj pichile, tobꞌalkꞌinal ojabꞌ chi oc sutꞌan yin jaxca kꞌalile.

20 Quey ojabꞌ tuꞌ chi yun spajtzen Jehová yin ebꞌ chi jowi oc win, jaꞌton ebꞌ chi alon jin kꞌumal.

21 Jaach Jehová jin Diosal, yun ojabꞌ tzet jix ja wal can ey jin, catuꞌ chin ja colon el yetoj ja camcꞌulal.

22 Yutol caw okꞌbꞌalcꞌule weocoj, chi cus jin cꞌul.

23 Lalan jin qꞌueycan el jaxca enele yet chi ey cꞌu, lalan wijletoj yu kaꞌeꞌ jaxca noꞌ kochiꞌ noꞌ.

24 Lalanxa sbꞌilwi a sjolom jin penec yutol cꞌamxa chin lowi. Lalan jin bꞌajbꞌitoj yutol cꞌamxa chin lowi.

25 Tzeebꞌetaj jin xacꞌal yu ebꞌ ánima. Jaꞌ yet chin yilon ebꞌ, chi bꞌuchwa ebꞌ win.

26 Jaach Jehová jin Diosal, colwaan wetoj, col jin el yetoj ja camcꞌulal.

27 Jaach Jehová jin Diosal, yotajne ojabꞌ el ebꞌ ánima tol jaach jix ja wute jaxca tuꞌ.

28 Caxcꞌal mi jantaj spenail chi skꞌantej ebꞌ wibꞌan, cꞌam cꞌal yeloc apnoj wan tzet chi yal ebꞌ tuꞌ, asantane tol jaach cha wal watxꞌ kꞌane win. El ojabꞌ sqꞌuixwil ebꞌ, jal jin jain ja chejabꞌ jin tiꞌ tol chi tzala jin cꞌul.

29 Qꞌuixwoj ojabꞌ can a ebꞌ chi jowi oc win, oc ojabꞌ can potan jun qꞌuixwilal tuꞌ yin ebꞌ jaxca junoj an xotile.

30 Jal jin jain tiꞌ, oj wal yu diosalil ey jaach. Oj wal watxꞌ kꞌane ey jaach snan xol masanil ebꞌ ánima.

31 Yutol chach colwa yetoj ebꞌ mebꞌa, catuꞌ cha colon el ebꞌ chi ale oc yul skꞌabꞌ camich.