Txa Yet Chi Kꞌanle Scolwal Dios
Jaꞌ sbꞌit naj David yet jix ela tet naj rey Saúl yet jix too yewbꞌan el sbꞌa bꞌey chꞌen nachꞌen.
57
Jaach jin Diosal, okꞌ ojabꞌ ja cꞌul win,jaꞌ ja win chin col jin bꞌa. Chi woche chin col jin bꞌa ja win, jaxca chi yun scolon sbꞌa noꞌ yuneꞌ caẍlan yalan xicꞌ xutx, masantaꞌcꞌal chi ecꞌ el jun syaꞌilal tiꞌ wibꞌan.
2 Jaach jin Diosal, caw miman ja weloc apnoj, yutol chach colwa wetoj yin masanil.
3 Jaꞌ yu ja camcꞌulal win, chi cꞌal yun tzet cha walaꞌ, yuxan oj ja waeytej jin colbꞌanil bꞌey satcan tuꞌ. Jaxa jin ja colon el yul skꞌabꞌ ebꞌ chin etneni.
4 Joyan oc ebꞌ chi jowi oc win jaxca junoj noꞌ bꞌalam, telan jin ey xol ebꞌ yet chin qꞌueyle el yu ebꞌ. Caw laan yeoc ebꞌ jaxca chꞌen lanza cꞌal julbꞌal. Jaꞌ skꞌane ebꞌ, laan jaxca chꞌen espada caw eel yee.
5 Jaach jin Diosal, iꞌle ojabꞌ a can ja bꞌi bꞌey satcan. Txꞌoxle ojabꞌ ja mimanbꞌilal bꞌey masanil sat txꞌotxꞌ txꞌotxꞌ tiꞌ.
6 Jaꞌ ebꞌ chi jowi oc win, jix yaey yaal ebꞌ jin sattaj, caw chi xiwa jin pixan, catuꞌ jix swaꞌnen jun jolan ebꞌ yul jin bꞌe; jacꞌal oc ebꞌ jix eyqꞌuey yul jun yaal tuꞌ.
7 Jaach jin Diosal, bꞌejan jin cꞌul, yuxan chi woche chin bꞌitni ey jaach yetoj watxꞌ kꞌane.
8 Jaꞌ yet chi sajbꞌi el junjun cꞌu yet chi el jin weyan, oj jin bꞌitnoj ey jaach yetoj arpa cꞌal salterio.
9 Oj jaach jin bꞌitne snan xol ebꞌ conobꞌlaj cꞌal xol mimej nacionlaj.
10 Jaꞌ ja camcꞌulal miman ton yeocoj, chi apni tacꞌal oc bꞌey satcan. Yutol chi yun cꞌal tzet cha walaꞌ.
11 Jaach jin Diosal, iꞌle ojabꞌ a can ja bꞌi yibꞌan satcan. Txꞌoxle ojabꞌ ja mimanbꞌilal bꞌey masanil txꞌotxꞌ txꞌotxꞌ tiꞌ.