2 Jajxa xin, txꞌoj chi yun je waꞌnen yeoc junoj jowal. Jaex che yetne cantoj ebꞌ ánima, catuꞌ chi etex cantoj masanil tzet watxꞌ yul je conobꞌ tiꞌ.

3 Jaꞌ ebꞌ penawom, eyxa cꞌaltaꞌ oc spenail tuꞌ yin ebꞌ yet cꞌamto chi ali ebꞌ yin xutx. Jaꞌ ebꞌ naꞌom a kꞌane, yin tax cꞌal yalubꞌal ebꞌ, chi scuyon sbꞌa ebꞌ yin lekꞌtiꞌal.

4 Laan ebꞌ jaxca svenenoal stiꞌ noꞌ labꞌa. Laan ebꞌ jaxca noꞌ mimej labꞌa cꞌam chi sucbꞌi, caw jow noꞌ sicꞌlebꞌil.

5 Cꞌam chi yabꞌ noꞌ tzet chi yal ebꞌ chi sucbꞌanen noꞌ, ebꞌ tol jelan smonten noꞌ.

6 Jaach jin Diosal, iꞌel yip ebꞌ penawom jaxca chi yun smakꞌle eltej yee noꞌ bꞌalam yu ebꞌ ánima.

7 Qꞌuey ojabꞌ a ebꞌ jaxca chi yun sqꞌueya jaꞌ jaꞌ chi maltoj. Jaꞌ yet chi julwa ebꞌ, cꞌam ojabꞌ xaam sjulbꞌal ebꞌ tuꞌ.

8 Uli ojabꞌ cantoj ebꞌ jaxca chi yun yulitoj noꞌ xotx yul sjoyal. Jaxca ojabꞌ chi yun yecꞌ el junoj unin cꞌam chi yil niꞌoj sajilkꞌinal, quey ojabꞌ tuꞌ chi yun cantoj ebꞌ.

9 Jaxca ojabꞌ teꞌ tajin qꞌuix chi yambꞌale octoj xol kꞌakꞌ yalan xi, tol chi taney skꞌakꞌal yet cꞌamto chi juji a txꞌotxꞌ xi, quey ojabꞌ tuꞌ chi yun yiꞌle el ebꞌ penawom tuꞌ yu Dios yet iquisto ecꞌ ebꞌ.

10 Jaꞌ mactxequel jijem tet Dios oj ton tzalabꞌoj scꞌul ebꞌ yet chi ecꞌ spaj tet ebꞌ penawom, yet oj sbꞌonontoj yajan ebꞌ xol ẍiqꞌuil ebꞌ penawom.

11 Queyton wal tuꞌ oj yun yalon ebꞌ jaxca tiꞌ: ¡Watxꞌ ket, ta jijem jon! Ey ton wal jun Dios chi naꞌon oc yin ebꞌ ánima caan bꞌey yul yibꞌankꞌinal tiꞌ.