2 Col jin el yul skꞌabꞌ ebꞌ chi unen spenail. Col jin el tet ebꞌ makꞌom cam ánima.

3 Jaach jin Diosal, ey ebꞌ ánima caw jelan, chi smaj ebꞌ bꞌey chin eqꞌui, chi yoche ebꞌ chin smakꞌ camoj, man yu oj jin penail, cꞌam tzet chi wute ebꞌ.

4 Cꞌam tzet chi wute ebꞌ, tucꞌal chi yoche ebꞌ chi yakꞌ jowal wetoj. Cꞌam tzet chi wute ebꞌ. Asan tucꞌaltaꞌ chi yoche ebꞌ chi yakꞌ jowal wetoj. Yu jun tuꞌ xin, il jintej, colwaan wetoj.

5 Jaach Jehová jin Diosal, yaaw jaach yibꞌan masanil, cu Diosal jaach jaon Israel jon tiꞌ. Titan, catuꞌ cha waon oc syaꞌilal ebꞌ conobꞌ tiꞌ. Cꞌam ojabꞌ chi cus ja cꞌul yin ebꞌ penawom chi jowi oc win.

6 Chi jul ebꞌ win yet chi kꞌejbꞌi eyoj, chi el yaw ebꞌ jaxca noꞌ txꞌiꞌ, catuꞌ chi ecꞌ joyoyoj ebꞌ yinlaj conobꞌ.

7 Chi el som stiꞌ ebꞌ yet chi ecꞌ ebꞌ. Chi yalon pena kꞌane ebꞌ jaxca tiꞌ: Cꞌam mac chi cu abꞌeni, ẍi ebꞌ.

8 Jal jaach Jehová jin Diosal, tucꞌal chach tzee yin ebꞌ. Tucꞌal chach bꞌuchwa yin wan conobꞌ tuꞌ.

9 Jaach jin Diosal, jaꞌ ja win chin colon jin bꞌa, yutol jaach ey jaach oc wipomaloj, catuꞌ ey jaach oc weneloj.

10 Jaꞌ Jehová chin camcꞌulneni, jaꞌ bꞌabꞌel stoo jin sattaj bꞌey chin eqꞌui. Oj yakꞌ wil yeyqꞌuey ebꞌ chi jowi oc win.

11 Jaach jin Diosal, cꞌam ojabꞌ cha makꞌ cam ebꞌ, yet watxꞌ cꞌam ojabꞌ chi too qꞌueycꞌulal syaꞌilal oj yil ebꞌ conobꞌ tiꞌ. Asan tol cha wakꞌ eyqꞌuey ebꞌ, catuꞌ cha sajlemnen cantoj ebꞌ.

12 Jaꞌ skꞌane ebꞌ chi yalaꞌ, jaꞌ chi oc penailoj ebꞌ. Eyqꞌuey ojabꞌ ebꞌ yu smeynebꞌail cꞌal yu lekꞌtiꞌal kꞌane chi yal ebꞌ tuꞌ.

13 Qꞌueycan el ebꞌ yetoj sjowal ja cꞌul. ¿Tzet to wal yu, yuxan iquis cꞌal ecꞌ ebꞌ? Jaach jin Diosal, abꞌle ojabꞌ ja kꞌaneal masantaꞌcꞌal bꞌey chi lawi apni jun yul yibꞌankꞌinal tiꞌ, yutol Yaaw jaach cu xol jaon yicꞌaal jon Jacob tiꞌ.

14-15 Jaꞌ yet akꞌbꞌalil chi jul ebꞌ, catuꞌ chi el yaw ebꞌ jaxca noꞌ txꞌiꞌ, chi ecꞌ joyoyoj ebꞌ yinlaj conobꞌ seyon sloꞌbꞌe, chi awi ebꞌ jaxca yojli noꞌ txꞌiꞌ, yutol cꞌam chi yabꞌ scꞌul sloꞌbꞌe ebꞌ.

16 Jal jin jain tiꞌ, oj jaach jin bꞌitne yet skꞌinibꞌalil. Yin bꞌitalil oj yun walon el ja camcꞌulal, yutol chi skeꞌ masanil ja wu. Ilaꞌ tol ey jaach oc weneloj. Jaach chin ja colel xol jin yaꞌilal masanil tiempo, yutol caw ey ja camcꞌulal.

17 Jaach jin Diosal jin teynemal jaach. Oj wal watxꞌ kꞌane ey jaach yin bꞌital. Ilaꞌ tol jin Colomal jaach toni. Jaach jin Diosal, caw chin ja camcꞌulne cꞌal.