Txa Yet Chi Kꞌanle Scolwal Dios
Jaꞌ jun sbꞌit naj David tiꞌ, cuybꞌanile yet jix oc jowal yetoj ebꞌ Sirio a Naharaim, cꞌal ebꞌ a Sobá, catuꞌ jix makꞌle cam jun 12,000 ebꞌ soldado a Edom bꞌey sjobꞌeal atzꞌam atzꞌam yu naj Joab.
60
Jaach cu Diosal, yetoj wal sjowal ja cꞌuljix jon ja bꞌejcan yet chi cu akꞌle eyqꞌuey jon. Jaꞌ tinaniꞌ xin, akꞌ kip junelxa jon.
2 Jix ton ja wakꞌ bꞌilwoj txꞌotxꞌ txꞌotxꞌ tiꞌ, jix jatcantoj txꞌotxꞌ. Jaxa tinaniꞌ xin, majche el sjatilal txꞌotxꞌ tuꞌ, yet watxꞌ, cꞌamxa chi il-le yin sjatilal txꞌotxꞌ tuꞌ.
3 Caw miman ton syaꞌilal jix ja txꞌox kil jaon ja conobꞌ jon tiꞌ; jaxca tol jix ja wakꞌ vino ey jon tol jix joybꞌi cu sat yu.
4 Jix ja wakꞌon jun txꞌoxbꞌanile tet ebꞌ ey yeloc apnoj yul ja sat, yet watxꞌ cꞌam chi michꞌcha ebꞌ yu sjulbꞌal wan scajat ebꞌ tuꞌ.
5 Yu tuꞌ xin, takꞌwan ey jin, colon el yetoj ja wipalil, yutol chi cꞌal skeꞌ ja wu. Colel ebꞌ ánima tol camcꞌulnebꞌil ja wu.
6 Jaꞌ Dios jix takꞌwi eytej bꞌey scalubꞌal, jix yalon jaxca tiꞌ: Oj tzala a jin cꞌul yet oj jin kocꞌ poꞌonentoj txꞌotxꞌ Siquem, cꞌal yacꞌalil txꞌotxꞌ Sucot.
7 Jaxa txꞌotxꞌ Galaad cꞌal txꞌotxꞌ Manasés, wet yeoc txꞌotxꞌ. Jaꞌ Efraín, jaxca tol jin chꞌen kꞌoxcꞌom yeoc yin jin jolom; jaxa Judá, jaxca jin kꞌojoch yet wopiso yeocoj.
8 Jaxa Moab laan jaxca chꞌen palangana bꞌey chin txꞌael jin kꞌabꞌ. Jaxa yibꞌan Edom oj wa cantoj jin xanabꞌ. Yin tzalacꞌulal oj jin awoj, yutol jix eyqꞌuey ebꞌ Filisteo wu, ẍi Dios.
9 Jaach jin Diosal, ¿mac chi skeꞌ jin yiꞌontoj bꞌey conobꞌ tol eyoc smuroal yinlaj? ¿Mac chin iꞌontoj bꞌey Edom?
10 Ilaꞌ wal xin, jaach cu Diosal, tol jix jon ja wintajne can eloj. Cꞌamxa chi yal ja cꞌul chach too yetoj ebꞌ cu soldado yin jowal.
11 Ocan ketoj jon xin, colon el yul skꞌabꞌ ebꞌ cu cajat jon. Ta jaꞌ ebꞌ ket animail chi colwa ketoj jon, ma cꞌaltaꞌ cu colcha el yu ebꞌ jon.
12 Jaach jin Diosal, jaꞌ yetoj ja colwal yuxan oj skeꞌ kakꞌon eyqꞌuey jowal tuꞌ jon. Jaach oj ja tecꞌ can ey ebꞌ chi jowi oc kin jon.