2 Cꞌam cꞌal chi sbꞌej jin yujten ecꞌ ebꞌ jin cajat, yutol caw ecꞌal ebꞌ. Chi yoche xacꞌal ebꞌ chi yakꞌ jowal wetoj.

3 Jaꞌ yet chi jul jin xiwcꞌulal, chach waoc yipoj jin cꞌul.

4 Jaach jin Diosal, chach waoc yipoj jin cꞌul, catuꞌ chi walon watxꞌ kꞌane ey jaach. Chach waoc yipoj jin cꞌul, catuꞌ cꞌam chin xiwi. Yu jun tuꞌ, ¿cꞌam bꞌakꞌin oj jin xiw yu tzet chi snaꞌ ebꞌ ánima jin yetneni?

5 Cꞌam cꞌal chi sbꞌej yalon pena kꞌane ebꞌ win. Asan cꞌal tzet chi yun wetex eloj, asanne chi snaꞌ ebꞌ.

6 Chi syambꞌa sbꞌa ebꞌ catuꞌ chi yewbꞌa el sbꞌa ebꞌ yet chin smakꞌon ebꞌ. Chi snaꞌ ebꞌ bꞌakꞌin chin yakꞌ camoj.

7 ¿Tumi oj to skeꞌ scolon el sbꞌa ebꞌ xol spenail tuꞌ? Jaach jin Diosal, akꞌ eyqꞌuey ebꞌ conobꞌlaj tuꞌ yu sjowal ja cꞌul.

8 Ja wotaj jayelxa chin el ecꞌoj. Ja wotaj jantaj yal jin sat chi eli. ¿Tumi man tzꞌibꞌebꞌiloj can ja wu yul an ja libro?

9 Jaꞌ ebꞌ jin cajat oj el ebꞌ ey jin yet oj jin kꞌanon ja colwal. Jain tiꞌ wotaj tol ey jaach ecꞌ wetoj.

10 Jaach Jehová jin Diosal, chach waoc yipoj jin cꞌul, catuꞌ chi walon jin watxꞌ kꞌane yu tzet albꞌilcan ja wu.

11 Jaach jin Diosal, chach waoc yipoj jin cꞌul, catuꞌ cꞌam chin xiwi. ¿Cꞌam bꞌakꞌin oj jin xiw yu tzet chi snaꞌ ebꞌ ánima jin yetneni?

12 Jaach jin Diosal, oj jin jije wunen bꞌey chi wakꞌcan jin tiꞌ ey jaach, yin walon yu diosalil ey jaach.

13 Yutol jix jin ja colel tet camich, jix jin ja colel yin tol ma jin eyqꞌueyoj. Yu jun tuꞌ, yuxan chin bꞌeyecꞌ ja sattaj xol ja sajkꞌinal, yajbꞌan iquis jin ecꞌoj.