2 Ocan tꞌanan win, pajtze jin txa. Xol wal jin yaꞌilal chi walon jin bꞌa ey jaach.

3 Caw chin bꞌilwi yu xiwcꞌulal yu ebꞌ chi jowi oc win. Chi el yaw ebꞌ yet chin yujten ecꞌ ebꞌ.

Miman jin yaꞌilal jix yaoc ebꞌ wibꞌan. Yetoj wal sjowal scꞌul ebꞌ chin yujten ecꞌoj.

4 Chi yabꞌ syaꞌil jin pixan yu ebꞌ. Caw chi jul xacꞌal smey camich wibꞌan.

5 Jix jul jun miman xiwcꞌulal win. Ipan jin bꞌilwi a yu xiwcꞌulal.

6 Chin naꞌon jaxca tiꞌ: Toloj wal ey jin xicꞌ jaxca noꞌ uch, chim jin too jenenoj, catuꞌ chin eecꞌ yin tzalacꞌulal.

7 Naat mi chin too jenenoj. Jaxam la bꞌey txꞌotxꞌ cusiltaj txꞌotxꞌ chin caey ecꞌoj.

8 Jaxam la tituꞌ chin too jin col jin bꞌa, jaxca chi yun cu colon cu bꞌa tet junoj cajxuchum kaꞌeꞌ nabꞌ, jin chi.

9 Jaach jin Diosal, qꞌueycan el ebꞌ penawom, uchcantoj skꞌane ebꞌ chi yalaꞌ. Yutol asan jowal cꞌal etne ánima chi yun ebꞌ bꞌey conobꞌ.

10 Cꞌualil cꞌal akꞌbꞌalil chi ecꞌ joyoyoj ebꞌ yinlaj smuroal conobꞌ. Caw ey smey yul conobꞌ yu ebꞌ, ey naꞌo a kꞌane cꞌal elkꞌan. Jix etex el conobꞌ yu ebꞌ.

11 Comon xacꞌal chi yun spenail ebꞌ yul-laj calle, jaxa cꞌal lekꞌtiꞌal cꞌal etnebꞌail chi al-le bꞌey txombꞌal.

12 Ta comon ánima cꞌal ebꞌ chin etneni, chim la techa wu. Ta jaꞌ ebꞌ chi chichon oc scꞌul win chin uten jaxca tuꞌ, chim webꞌa el jin bꞌa tet ebꞌ.

13 Jajxa xin, jaꞌ ebꞌ jin watxꞌil ánima chin etneni.

14 Junne chi yun stoo ebꞌ wetoj bꞌey snail scalubꞌal Dios, jix michꞌcha kꞌane ku yin wamigonen jin bꞌa yetoj ebꞌ, junne jix cu ecꞌ xol ánima.

15 Tit ojabꞌ lemna camich yin ebꞌ chi jowi oc win. Iquis ojabꞌ ebꞌ, catuꞌ chi too can ebꞌ yul sjolanil smujbꞌanil ebꞌ camom. Yutol asanne spenail eyecꞌ yin snaꞌbꞌal ebꞌ, cꞌal yul sna ebꞌ.

16 Jal jin jain tiꞌ, asan tet Jehová Dios, oj wal jin bꞌa. Jaꞌ Naj oj jin colon eloj.

17 Yin okꞌilal oj yun walon jin bꞌa tet Jehová yet skꞌinibꞌalil, yet yeycꞌualil, cꞌal yet akꞌbꞌalil, jaxa Naj oj abꞌen tzet oj walaꞌ.

18 Jaꞌ Dios oj jin colon el xol jowal. Man oj jin chaꞌle oc yul skꞌabꞌ camich yu Naj, caxcꞌal miman sbꞌisil ebꞌ chi jowi oc win.

19 Jaꞌ Dios, yaaw yin tobꞌalkꞌinal. Jaꞌ oj abꞌen tzet oj walaꞌ, catuꞌ oj spajtzen tet ebꞌ. Yutol cꞌam chi sqꞌuex sbꞌeybꞌal ebꞌ, tam wal chi xiw ebꞌ tet Dios.

20 Jaꞌ ebꞌ wucꞌlebꞌ tuꞌ, comon cꞌal chi yaoc skꞌabꞌ ebꞌ win, cꞌam chi sjije yunen bꞌey jix yakꞌ stiꞌ ebꞌ yin woc swatxꞌil animaoj.

21 Cꞌununi xacꞌal yoc skꞌane ebꞌ jaxca scꞌuunal noꞌ mantequilla, jacꞌal pax jowal chi yoche ebꞌ. Chi yakꞌbꞌalne skꞌane ebꞌ cꞌununi xacꞌal jaxca aceite, ti tol jaxca wal yeelal yee chꞌen espada jaxca tuꞌ yeloc apnoj skꞌane ebꞌ chi yalaꞌ.

22 Masanil tzet cha naꞌ, aoc yul skꞌabꞌ Jehová, jaꞌ Naj oj colwa ja wetoj. Jaꞌ mac jijem chi yute sbꞌa tet, cꞌam bꞌakꞌin oj chaꞌle eyqꞌueyoj.

23 Jaach jin Diosal, jaꞌ ebꞌ makꞌom cam ánima yetoj ebꞌ naꞌom a kꞌane, eyman oj cam ebꞌ, man oj naatbꞌoj skꞌinal ebꞌ. Jaach ton oj ja watoj ebꞌ bꞌey sjolanil smujbꞌanil ebꞌ camom. Jaxa jin jain tiꞌ, ey jaach cꞌal oc yipoj jin cꞌul.