2 Cu bꞌitnewej tet Jehová, kalwej watxꞌ kꞌane tet. Junjun cꞌal cꞌu chi kalon el skꞌaneal colbꞌanile chi yakꞌa.

3 Kalwej el skꞌaneal smimanbꞌilal, cꞌal masanil tzet qꞌueyubꞌtaj yili jix swaꞌne. Kalwej el tet masanil conobꞌlaj cꞌal nacionlaj.

4 Yutol caw miman yeloc apnoj Jehová, yuxan smoo chi al-le watxꞌ kꞌane tet. ¡Yel xacꞌal tol ey smey yintaj masanil wan comon dios!

5 Jaꞌ masanil comon sdiosal ebꞌ conobꞌlaj, cꞌam niꞌoj yopiso ebꞌ, yutol echele cꞌal ebꞌ. Jal pax Jehová xin, jaꞌ jix waꞌnen satcan.

6 Caw miman yeloc apnoj smimanbꞌilal, ey pax yipalil. Jaꞌ swatxꞌilal yili cꞌal yipalil chi txeclo bꞌey stemplo.

7 Jex ánima bꞌey junjun conobꞌlaj, alwej tet Jehová, tol miman yipalil cꞌal stzejejial.

8 Kalwej watxꞌ kꞌane tet Naj jaxca wal smooalil, ocanwejtoj yetoj je yofrenda bꞌey yamakꞌil stemplo Naj.

9 Kiꞌwej ey cu bꞌa yin eyilal tet Jehová bꞌey stemplo tol caw watxꞌ yili. Ey ojabꞌ xiwcꞌulal masanil ánima sattaj Naj.

10 Kalwej tet masanil nacionlaj, tol jaꞌ Jehová, Rey toni. Jaꞌ Naj jix waꞌnen yul yibꞌankꞌinal tiꞌ, yuxan cꞌam chi bꞌilwi. Jun laan chi yute yakꞌon cuenta masanil conobꞌ.

11 Tzala ojabꞌ satcan, cꞌal txꞌotxꞌ txꞌotxꞌ tiꞌ, el ojabꞌ yaw jaꞌ mar yetoj masanil tzetyetal ey yul jaꞌ.

12 Tzala ojabꞌ txꞌotxꞌ acꞌal-laj, yetoj masanil tzetyetal ey bꞌey. El ojabꞌ yaw masanil teꞌ kꞌajteꞌlaj yin tzalacꞌulal,

13 yutol oj jul Jehová. Tuxa wal chi jul Jehová yet chi jul yakꞌon Yaawil bꞌey txꞌotxꞌ txꞌotxꞌ tiꞌ; oj yakꞌ cuenta yin swatxꞌil cꞌal yin sjichanil.