3 Jix lawi tuꞌ, jix syambꞌan oc masanil ebꞌ yet Israelal bꞌey Jerusalén, yet chi iꞌletej teꞌ Scaẍail Swa Kꞌane Jehová bꞌey jun lugar jix swaꞌnele yu naj rey David. 4 Jix syambꞌan cꞌal pax oc masanil ebꞌ yicꞌaal Aarón cꞌal ebꞌ Levita. 5 Jaꞌ xol ebꞌ yicꞌaal Quehat jix yamcha oc 120 ebꞌ; jaꞌ naj Uriel yaaw yeoc xol ebꞌ yican tuꞌ. 6 Jaꞌ ebꞌ yicꞌaal naj Merarí, ey 220 ebꞌ. Jaꞌ naj Asaías eyoc yaawil xol ebꞌ. 7 Jaꞌ xol ebꞌ yicꞌaal Guersón, jix yamcha oc 130 ebꞌ. Ja naj Joel eyoc yaawil xol ebꞌ. 8 Jaꞌ xol ebꞌ yicꞌaal Elisafán, ey 200 ebꞌ jix yamcha ocoj: Jaꞌ naj Semaías eyoc yaawil xol ebꞌ. 9 Jaꞌ xol ebꞌ yicꞌaal naj Hebrón, jix yamcha oc 80 ebꞌ. Jaꞌ naj Eliel jaꞌ eyoc yaawil xol ebꞌ. 10 Jaꞌ xol ebꞌ yicꞌaal Uziel, ey 112 ebꞌ jix yamchai; jaꞌ naj Aminadab eyoc yaawil xol ebꞌ.

11 Jix lawi tuꞌ, jix awtele ebꞌ naj yakꞌomal xaambꞌal yu naj rey David, jaꞌton naj Sadoc cꞌal Abiatar, yetoj cꞌal ebꞌ Levita, jaꞌton Uriel, Asaías, Joel, Semaías, Eliel yetoj naj Aminadab. 12 Jix yalon naj tet ebꞌ jaxca tiꞌ: Jaex Levita jex tiꞌ, tol yaaw je yeoc xol masanil ebꞌ je yican, yuxan waꞌnewej je bꞌa je masanil yetoj ebꞌ je yican jatacꞌalaꞌ yalon ley, yet watxꞌ chi skeꞌ je yiꞌontej teꞌ Scaẍail Swa Kꞌane Jehová cu Diosal jaon Israel jon tiꞌ bꞌey jun lugar tuxa jix jin waꞌne. 13 Yutol man jaex oj, jix je yiꞌtej teꞌ caẍa tuꞌ yet sbꞌabꞌelal, yu cꞌal jun tuꞌ yuxan jix akꞌle cam junoj ebꞌ ketbꞌi yu Jehová cu Diosal, yutol ma cam cu kꞌanlewej kabꞌe tzet watxꞌ chi kunwej, ẍi naj.

14 Yu tuꞌ xin, jix sajbꞌanen sbꞌa ebꞌ jatacꞌalaꞌ yalon ley, yet watxꞌ chi skeꞌ yiꞌontej teꞌ Scaẍail Swa Kꞌane Jehová sDiosal Israel ebꞌ. 15 Jix sbꞌatxontej ebꞌ yetoj sjolom xicꞌ yetoj teꞌ sbꞌatxbꞌanil, jaxca jix yun yalon can naj Moisés yu Jehová.

16 Jix yalon cꞌal pax naj rey David tet ebꞌ yaaw yeoc xol ebꞌ Levita, tol jaꞌ xol yicꞌaal ebꞌ tuꞌ, chi sicꞌle el ebꞌ chi bꞌitni yin tzalacꞌulal, yetoj wan mitxꞌkꞌabꞌe, jaꞌton chꞌen salterio, arpa cꞌal wan chꞌen patxquiltaj chꞌen chi tenlei. 17-21 Jaꞌ xol yicꞌaal ebꞌ Leví jix sicꞌle el ebꞌ chi tenon wan chꞌen patxquiltaj chꞌen, jaꞌton: Naj Hemán scꞌaal Joel, yetoj naj Asaf scꞌaal Berequías, yetoj Etán scꞌaal Cusaías. Yicꞌaal Merarí ebꞌ naj tuꞌ.

Jix sicꞌle cꞌal pax oc ebꞌ Levita yin scolwa yaon oc teꞌ arpa yaliẍ yoc yul snukꞌ, jaꞌton naj Zacarías, Jaaziel, Semiramot, Jehiel, Uní, Eliab, Maaseías cꞌal naj Benaías. Jix sicꞌle cꞌal pax el wanxa ebꞌ Levita yu scolwa ebꞌ yaon oc teꞌ arpa miman yul snukꞌ, jaꞌton naj Matatías, Elifelehu, Mecneías, Azazías yetoj cꞌal ebꞌ chi tenon arpa, jaꞌton naj Obed-edom yetoj naj Jehiel. 22 Jaꞌ naj Quenanías yaaw yeoc xol ebꞌ Levita chi ijbꞌan bꞌit, yutol caw jelan sbꞌitni naj. 23-24 Jal pax ebꞌ chi teynen teꞌ Scaẍail Swa Kꞌane Dios, jaꞌton naj Berequías, naj Elcaná, jal ebꞌ yakꞌomal xaambꞌal, jaꞌton: Sebanías, Josafat, Natanael, Amasai, Zacarías, Benaías cꞌal Eliézer. Jaꞌton ebꞌ tuꞌ chi xuon chꞌen trompeta sattaj teꞌ Scaẍail Swa Kꞌane Dios, yetoj naj Obed-edom yetoj naj Jehías chi teynen pax teꞌ Scaẍail Swa Kꞌane Dios.

25 Jal naj rey David, yetoj masanil ebꞌ icham winaj yeoc yul conobꞌ Israel, cꞌal ebꞌ yaaw yeoc xol junjun miman bꞌulan ebꞌ soldado, caw tzalacꞌulal yeoc ebꞌ yet jix bꞌet yiꞌon teꞌ Scaẍail Swa Kꞌane Jehová ebꞌ bꞌey sna naj Obed-edom. 26 Jix colwa cꞌal Dios yetoj ebꞌ Levita yet jix yiꞌontej teꞌ caẍa tuꞌ ebꞌ, yuxan jix yakꞌ jujcꞌon noꞌ icham wacax ebꞌ, yetoj jujcꞌon noꞌ icham meꞌ yin xaambꞌal. 27 Jaꞌ an pichile lino tol caw watxꞌ yili, jaꞌ an eyoc yu naj rey David; quey pax tuꞌ yet ebꞌ Levita chi iꞌontej teꞌ caẍa tuꞌ, yetoj cꞌal pax yet ebꞌ chi bꞌitni, cꞌal yet naj Quenanías chi ijbꞌan ebꞌ. Ey cꞌal pax oc jun an chaleco yu naj rey David tol lino cꞌal eloj. 28 Masanil ebꞌ Israel jix el yaw ebꞌ yu tzalacꞌulal yet jix iꞌletej teꞌ scaẍa Jehová, jix xuꞌle cꞌal pax noꞌ yucꞌaꞌ meꞌ, cꞌal trompeta jix stenon cꞌal pax wan chꞌen patxquiltaj chꞌen ebꞌ, chꞌen salterio cꞌal teꞌ arpa.

29 Jaꞌ yet jix apni oc teꞌ Scaẍail Swa Kꞌane Jehová bꞌey conobꞌ yet David, jaꞌ ix Mical ix yistil naj David, jaꞌton ix scutzꞌin naj Saúl, jix eltoj tꞌanan ix bꞌey swentanail sna. Jaꞌ yet jix yilontoj ix tol jaꞌ naj rey David, caw chi a julna naj yet chi canalwi yu tzalacꞌulal, pena xacꞌal jix yute sbꞌa naj jix yil ix, yuxan caw cꞌam swatxꞌil naj yul sat ix.