Jaꞌ Tzet Jix Swaꞌne Naj Rey David Bꞌey Jerusalén
14
Jaꞌ naj Hiram sreyal conobꞌ Tiro jix yatej yakꞌomal servil bꞌey naj rey David. Jix too ebꞌ waꞌnem na yetoj, cꞌal ebꞌ josom teꞌ; jix yiꞌontej teꞌ kꞌuteꞌ ebꞌ yu swaꞌxubꞌal spalacio naj rey David tuꞌ. 2 Queytuꞌ jix yun snaꞌcha el yu naj rey David, tol jaꞌ Jehová jix aon oc naj yin reyal xol conobꞌ Israel. Caw jix iꞌle a can naj yin yopiso yu Jehová, yutol caw ey scamcꞌulal yin sconobꞌ.Wanxa Ebꞌ Scꞌaal Naj Rey David
3 Jaꞌ naj rey David eyto cꞌal wanxa yistil naj jix yiꞌ bꞌey Jerusalén, yuxan eyto cꞌal scꞌaal cꞌal scutzꞌin naj jix ali yetoj ebꞌ ix. 4 Ebꞌ scꞌaal jix ali bꞌey Jerusalén, jaꞌton ebꞌ chi yij sbꞌi jaxca tiꞌ: Samúa, Sobab, Natán, Salomón, 5 Ibhar, Elisúa, Elpélet, 6 Nógah, Néfeg, Jafía, 7 Elisamá, Eliadá cꞌal Elifélet.
Jix Eyqꞌuey Ebꞌ Filisteo Yu Naj Rey David
8 Jaꞌ yet jix yabꞌen ebꞌ Filisteo tol jix oc naj David yin reyal bꞌey masanil yul yet Israel, jix oc ian ebꞌ seyon tzet chi yun yeyqꞌuey naj, yin eymanil jix yabꞌoc naj, yuxan jix eltoj naj yakꞌ jowal yetoj ebꞌ. 9 Jix apni oc ebꞌ Filisteo tuꞌ bꞌey spananil sjobꞌeal yet Refaim yin yetnen ánima ebꞌ. 10 Yu jun tuꞌ, yuxan jix skꞌanle naj rey David tet Jehová jaxca tiꞌ:
—¿Chim skeꞌ wakꞌon jowal yetoj ebꞌ Filisteo tiꞌ an? ¿Oj mi ja waoc ebꞌ yul jin kꞌabꞌ? ẍi naj.
Catuꞌ jix takꞌwi Jehová tet jaxca tiꞌ:
—Chi skeꞌ cha wakꞌ jowal yetoj ebꞌ, yutol jain oj jin colwa ja wetoj, yuxan oj skeꞌ ja wakꞌon eyqꞌuey ebꞌ.
11 Queytuꞌ jix yun yatoj naj rey David bꞌey txꞌotxꞌ chi yij Baal-perasim. Jaꞌ tituꞌ jix eyqꞌuey ebꞌ Filisteo yu naj. Catuꞌ jix yalon naj rey David jaxca tiꞌ: Jaxca wal chi yun sjajon sbꞌe junoj jaꞌ elom jaꞌ, queytuꞌ jix yun sjajon bꞌe Jehová ey jin bꞌey xol ebꞌ jin cajat tuꞌ, ẍi naj. Yu jun tuꞌ, yuxan Baal-perasim,a jix yij can sbꞌi jun txꞌotxꞌ yu naj. 12 Jix sbꞌejoncan sdiosal ebꞌ Filisteo tuꞌ, yuxan jix yal naj rey David tol chi nusle can tzꞌaꞌoj.
13 Jal pax ebꞌ Filisteo tuꞌ jix meltzo pax ebꞌ junelxa bꞌey spananil sjobꞌeal yet Refaim tuꞌ. 14 Yu tuꞌ xin, jix skꞌanlen pax naj rey David tet Dios junelxa, jix yalon Dios tet naj jaxca tiꞌ:
—Jaꞌ tinaniꞌ cꞌam ojabꞌ chach oc sattaj ebꞌ yet cha wakꞌon jowal tuꞌ, tol ojabꞌ chach oc joyan yin ebꞌ, catuꞌ cha wakꞌon jowal yin ebꞌ bꞌey scawilal bꞌey ey teꞌ bálsamo. 15 Jaꞌ yet oj ja wabꞌeni, jaxca tol ey junoj mactxequel chi ecꞌ bꞌey ẍumuc teꞌ teꞌ tuꞌ, chi skeꞌ ja wakꞌon jowal yin ebꞌ. Jaꞌ jun tuꞌ chi yal yeloc apnoj tol jain bꞌabꞌel jin ja sattaj yet chi wakꞌon cam ebꞌ soldado Filisteo, ẍi Jehová.
16 Jaxca jix yun yalon Dios, queytuꞌ jix yute naj David. Yuxan jix lawi el ebꞌ soldado Filisteo tuꞌ, jix ẍaꞌel yich bꞌey Gabaón masantaꞌcꞌal jix apni oc bꞌey Guézer. 17 Queytuꞌ jix yun ya can naj rey David yin yopiso bꞌey masanil nacionlaj. Jaꞌ Jehová jix oc cꞌal yetoj naj, yuxan jix xiw masanil ebꞌ nación tet naj rey David.