Jaꞌ Tzet Jix Snaꞌ Naj Rey David Yin Teꞌ Scaẍail Swa Kꞌane Jehová
13
Jix lawi tuꞌ, jix kꞌanabꞌ naj rey David tet masanil ebꞌ syaawil junjun bꞌulan ebꞌ soldado tet ebꞌ yet yaawilal. 2 Jix yalon naj rey David jaxca tiꞌ: Jex wet conobꞌ, ta chi ẍaꞌ je cꞌul jaex tiꞌ, catuꞌ chi ẍaꞌon cꞌal pax scꞌul Jehová cu Diosal, chi kawte masanil ebꞌ ket conobꞌ bꞌey chi ina cu conobꞌwej tiꞌ, ebꞌ tol eyto can bꞌey wan conobꞌlaj tuꞌ; yetoj cꞌal pax masanil ebꞌ yakꞌomal xaambꞌal cꞌal ebꞌ Levita tol eyecꞌ bꞌey sconobꞌ, yetoj cꞌal bꞌey chi low sjobꞌbꞌeal noꞌ ebꞌ. Junne chi kute cu naꞌbꞌal yetoj ebꞌ, 3 yet watxꞌ chi too kiꞌtej teꞌ Scaẍail Swa Kꞌane Jehová cu Diosal, yutol jatax cꞌal yul stiempoal naj Saúl jix toocan qꞌueycꞌulal teꞌ ku je yetoj, ẍi naj rey David tet ebꞌ. 4 Masanil ebꞌ conobꞌ, caw jix ẍaꞌ scꞌul ebꞌ tol chi yun jaxca tuꞌ, yutol watxꞌ jun naꞌbꞌale tuꞌ jix yabꞌ ebꞌ.Yet Jix Iꞌletej Teꞌ Scaẍail Swa Kꞌane Dios Bꞌey Quiriat-jearim
5 Jix lawi tuꞌ, jix yambꞌale oc masanil ebꞌ conobꞌ Israel yu naj rey David, masantaꞌcꞌal bꞌey chi lawi apni oc smoonal jun conobꞌ tuꞌ, chi tit tacꞌal ebꞌ bꞌey jaꞌ Sihor bꞌey smoonal txꞌotxꞌ Egipto, cꞌal bꞌey Amat, yet chi iꞌletej teꞌ Scaẍail Swa Kꞌane Dios bꞌey Quiriat-jearim. 6 Masanil ebꞌ Israel jaꞌjun yetoj, jix aapnoj bꞌey Quiriat-jearim, jacꞌal jun tuꞌ chi yij cꞌal pax sbꞌi Baalá yul yet Judá, yet watxꞌ jix iꞌletej teꞌ Scaẍail Swa Kꞌane Jehová Dios tituꞌ, jaꞌton Naj chi yakꞌ yaawil xol ebꞌ querubín. 7 Jix yaon atoj teꞌ caẍa ebꞌ tuꞌ yibꞌan jun teꞌ acꞌ carreta, catuꞌ jix yiꞌon eltej ebꞌ yul sna naj Abinadab. Jaꞌ naj Uzá cꞌal naj Ahió, jaꞌ ebꞌ jix iꞌon bꞌey teꞌ carreta tuꞌ. 8 Jaꞌ yet lalan sbꞌey ebꞌ xin, jaꞌ naj rey David yetoj masanil ebꞌ yet Israelal, bꞌabꞌel stoo ebꞌ sattaj teꞌ carreta tuꞌ, caw chi tzala ebꞌ sattaj Dios. Yetoj masanil yip ebꞌ chi a tꞌujna ebꞌ sbꞌeyi, chi bꞌitni ebꞌ yetoj arpa, salterio, panderos, wan chꞌen patxquiltaj chꞌen, cꞌal xuꞌle trompeta yu ebꞌ. 9 Jaꞌ yet jix apni oc ebꞌ bꞌey stecꞌbꞌal tiriw naj Quidón, ja naj Uzá tuꞌ jix too oc mitxꞌan naj yin teꞌ caẍa tuꞌ, yutol ian jix telcꞌotoj noꞌ wacax tokꞌnen oc teꞌ carreta tuꞌ. 10 Yu jun tuꞌ, yuxan caw jix tit sjowal Jehová yin naj Uzá tuꞌ, yutol jix oc mitxꞌna skꞌabꞌ naj yin teꞌ caẍa tuꞌ. Jaꞌ tituꞌ jix akꞌle xacꞌal cam naj Uzá tuꞌ yu Jehová.
11 Yu tuꞌ xin, jix tit sjowal naj rey David, yutol yin cꞌal eymanil jix yun stit sjowal scꞌul Jehová yin naj Uzá, yutol jix cꞌamxa cꞌal naj. Yu jun tuꞌ, yuxan jix yakꞌ yij can sbꞌi jun txꞌotxꞌ tuꞌ Perez-uzá;a jaꞌ jun bꞌie tuꞌ chi bꞌina tocꞌal sbꞌi tinaniꞌ. 12 Jaꞌ yet jun cꞌual tuꞌ, caw jix xiw naj rey David tet Dios, jix yalon jaxca tiꞌ: ¿Tzet to wal oj yun wiꞌontoj teꞌ Scaẍail Swa Kꞌane Dios bꞌey caan jin tuꞌ? ẍi naj. 13 Ma xa yiꞌtej teꞌ caẍa tuꞌ bꞌey sconobꞌ David, yutol jix yalaꞌ tol chi cancan teꞌ bꞌey sna naj Obed-edom. Jaꞌ jun winaj tuꞌ a conobꞌ Gat. 14 Oxebꞌ xꞌaaw jix can teꞌ Scaẍail Swa Kꞌane Jehová bꞌey sna naj Obed-edom tuꞌ. Caw jix yakꞌ syaaxilal Jehová yibꞌan yetoj yistil cꞌal yuninal, cꞌal yibꞌan masanil stzettaj yetal ey tet naj.