Jaꞌton ebꞌ tuꞌ yican to sbꞌa ebꞌ yetoj naj Saúl yin ebꞌ yicꞌaal Benjamín. 3 Jaꞌ naj Ahiézer, yaaw yeoc naj. Jaꞌ jun yuẍtaj chi yij Joás, scaabꞌ yaaw yeocoj, scꞌaal naj Semaá ebꞌ scawanil, a conobꞌ Guibeá ebꞌ. Jaꞌ naj Jeziel yetoj naj Pélet, scꞌaal Azmávet ebꞌ. Beracá yetoj naj Jehú, a conobꞌ Anatot. 4 Naj Ismaías a conobꞌ Gabaón, jaꞌton jun tiꞌ eyoc stzꞌajiloj ebꞌ 30 jelan yakꞌon jowal tuꞌ, yaaw cꞌal pax yeoc xol ebꞌ: Jaꞌton Jeremías, Jahaziel, Johanán, Jozabad a conobꞌ Guederá, 5 Eluzai, Jerimot, Bealías, Semarías, Sefatías a Haruf. 6 Elcaná, Isías, Azarel, Joézer, yetoj naj Jasobeam, yicꞌaal Coré ebꞌ, 7 naj Joelá yetoj naj Zebadías, scꞌaal Jeroham a conobꞌ Guedor.

8 Ey cꞌal pax wan ebꞌ yicꞌaal Gad jix ecꞌle ebꞌ yin soldado oj naj rey Saúl, jix oc ebꞌ yetoj naj rey David yet eyecꞌ naj bꞌey chꞌen nachꞌen bꞌey txꞌotxꞌ cusiltaj txꞌotxꞌ. Jaꞌ ebꞌ tuꞌ caw jelan ebꞌ, cuywinaj ebꞌ yin akꞌo jowal, iꞌbꞌil oc smajbꞌal sat julbꞌal ebꞌ, cꞌal chꞌen lanza. Caw jow ebꞌ jaxca noꞌ león. Jelan sbꞌey ebꞌ bꞌey txꞌotxꞌ tzalquiltaj txꞌotxꞌ jaxca noꞌ scꞌultajil che. 9-13 Jaꞌton sbꞌi ebꞌ yin xolilal tiꞌ, jatacꞌalaꞌ jantaj yeoc yopiso yibꞌan junjun ebꞌ, jaꞌton: Éser, Abdías, Eliab, Mismaná, Jeremías, Atai, Eliel, Johanán, Elzabad, Jeremías cꞌal Macbanai. 14 Jaꞌ xol ebꞌ yicꞌaal Gad tiꞌ yaaw yeoc ebꞌ xol ebꞌ soldado, jaꞌ junoj ebꞌ yeynajil xol ebꞌ, chi skeꞌ yijbꞌan junoj 100 soldado, jaꞌ junoj miman yeoc xol ebꞌ, chi skeꞌ yijbꞌan junoj mil soldado. 15 Jaꞌton wan tiꞌ, jix kꞌaxbꞌo ecꞌtoj yul jaꞌ Jordán yet sbꞌabꞌel xꞌaaw yul abꞌil, jaꞌton yet caw miman jaꞌ, yet jix malel jaꞌ yul sbꞌe. Jaꞌ ebꞌ ánima caan bꞌey spananil scꞌaxepal ecꞌtoj jaꞌ tuꞌ, pilan jix ujtele el ebꞌ yu ebꞌ.

16 Ey cꞌal pax wanxa ebꞌ yicꞌaal Benjamín, cꞌal ebꞌ yicꞌaal Judá jix too bꞌey eyecꞌ naj David bꞌey chꞌen nachꞌen tuꞌ. 17 Jix chaꞌle apnoj ebꞌ yu naj David, jix yalon naj tet ebꞌ jaxca tiꞌ: Ta yin watxꞌcꞌulal chi yun je jul jaex tiꞌ jin cꞌatan yu je colwa wetoj an, chex jin chaꞌ jul yin masanil jin cꞌul; ta tol chex jul yu jin je yaon oc yul skꞌabꞌ ebꞌ jin cajat an xin, caxcꞌal cꞌam junoj tzetyetal pena jix el wuneni, jaꞌ ojabꞌ cu Diosal yetoj ebꞌ kichmam jaꞌ oj yil sbꞌa je yetoj, cꞌal yaon oc syaꞌilal je yibꞌan, ẍi naj tet ebꞌ.

18 Jix lawi tuꞌ xin, jaꞌ naj Amasai syaawil ebꞌ soldado caw jelan, jix oc Yespíritu Dios yin naj, yuxan jix a yaw naj, jix yalon jaxca tiꞌ:

Yuxan jix chaꞌle ebꞌ yu naj David, catuꞌ jix akꞌle yopiso ebꞌ xol ebꞌ syaawil soldado tuꞌ yu naj.

19 Ey pax wanxa ebꞌ soldado yicꞌaal Manasés, jaꞌton ebꞌ jix ecꞌle soldado oj naj Saúl, jix oc ebꞌ yetoj David yet jun tiempoal yet ian jix too yetoj ebꞌ Filisteo tol lalanxa stoo yakꞌon jowal yin naj Saúl tuꞌ. Ma ẍaꞌ ebꞌ tol chi too naj David scolwa yetoj ebꞌ Filisteo tuꞌ, yutol jaꞌ yet jix syambꞌa oc sbꞌa wan syaawil ebꞌ Filisteo tuꞌ, jix chejle pax naj yu ebꞌ bꞌey Siclag. Jix yalon ebꞌ jaxca tiꞌ: Ey tala bꞌey cu makꞌle cam ecꞌaloj jon yu naj, catuꞌ chi yaon oc sbꞌa yetoj jun yet yaawil chi yij Saúl tuꞌ, ẍi ebꞌ naj. 20 Jaꞌ ebꞌ naj yicꞌaal Manasés jix oc ebꞌ yetoj David tuꞌ, yet lalanxa yapni oc bꞌey Siclag: Jaꞌton Adná, Josabad, Jediael, Micael, Josabad, Elihú, cꞌal Siletai, yaaw yeoc ebꞌ xol junjun mil ebꞌ soldado xol ebꞌ yicꞌaal Manasés. 21 Jaꞌton wan tiꞌ jix colwa yetoj naj David yet jix yakꞌon jowal yetoj jun bꞌulan ebꞌ soldado tol elkꞌom tuꞌ, yutol masanil ebꞌ caw jelan yakꞌon jowal ebꞌ. Jix yaoc sbꞌa ebꞌ yin syaawilal xol ebꞌ soldado naj David tuꞌ. 22 Junjun cꞌal cꞌu chi apni oc stzꞌajil ebꞌ soldado naj David, masantaꞌcꞌal jix yamcha jun miman bꞌulan ebꞌ tol caw jelan yakꞌon jowal.

23 Jaꞌton ebꞌ soldado caw jelan yakꞌon jowal tuꞌ, jix syambꞌa oc sbꞌa ebꞌ yetoj naj rey David bꞌey Hebrón, yu yale oc naj yin reyal sqꞌuexeloj ebꞌ yicꞌaal Saúl, jatacꞌalaꞌ jix yun yalon Jehová. 24 Jaꞌ yin ebꞌ yicꞌaal Judá ey 6,800 ebꞌ winaj iꞌbꞌil oc smajbꞌal sat lanza, iꞌbꞌil cꞌal pax oc slanza ebꞌ, caw listo yeoc ebꞌ yakꞌon jowal. 25 Jaꞌ xol ebꞌ yicꞌaal Simeón, ey 7,100 ebꞌ soldado caw jelan, iꞌbꞌil oc smitxꞌkꞌabꞌ yet jowal ebꞌ. 26 Jaꞌ xol ebꞌ yicꞌaal Leví tuꞌ, ey 4,600 ebꞌ. 27 Ey pax 3,700 ebꞌ yicꞌaal Aarón; jaꞌ naj Joiadá eyoc yaawilal xol ebꞌ. 28 Jaꞌ naj Sadoc, caw achꞌe tol jelan yakꞌon jowal, ey 22 ebꞌ yican, yaaw yeoc xol ebꞌ jaꞌjun yetoj tuꞌ. 29 Jaꞌ xol ebꞌ yicꞌaal Benjamín, jaꞌton ebꞌ yican Saúl, ey 3,000 ebꞌ winaj jix yaoc sbꞌa yetoj naj David. Jal jantaj to ebꞌ yet Benjamín jix toocan ebꞌ yetoj yicꞌaal Saúl masantaꞌcꞌal yet jun cꞌual jix oc David sreyaloj masanil conobꞌ Israel. 30 Jaꞌ xol ebꞌ yicꞌaal Efraín, ey 20,800 ebꞌ soldado caw jelan yakꞌon jowal, tol bꞌinabꞌil xol ebꞌ yican. 31 Jaꞌ xol ebꞌ nan tujan yicꞌaal Manasés, ey 18,000 ebꞌ winaj jix sicꞌletoj yet chi too ale can oc naj David yin reyal. 32 Jal ebꞌ yicꞌaal Isacar xin, jix jul 200 ebꞌ yaaw yetoj masanil ebꞌ soldado eyoc yalan ẍejbꞌanil ebꞌ. Jaꞌ ebꞌ tuꞌ, chi naꞌcha el yu ebꞌ tzetyetal smoo chi yun Israel, cꞌal bꞌakꞌin chi yun ebꞌ. 33 Jaꞌ xol ebꞌ yicꞌaal Zabulón, ey 50,000 ebꞌ soldado tol smoo stoo yin jowal, yetoj masanil tujan mitxꞌkꞌabꞌe yet jowal, tol bꞌejan scꞌul ebꞌ scolwa yetoj naj David. 34 Jaꞌ xol ebꞌ yicꞌaal Neftalí, ey 1,000 ebꞌ yaaw yeocoj, yetoj 37,000 ebꞌ soldado yetbꞌi oc slanza cꞌal majbꞌal sat julbꞌal. 35 Jaꞌ xol ebꞌ yicꞌaal Dan, ey 28,600 ebꞌ soldado. 36 Jaꞌ xol ebꞌ yicꞌaal Aser, ey 40,000 ebꞌ soldado tol smoo stoo yin jowal. 37 Jaꞌ ebꞌ ey bꞌey junxa skꞌaxepal ecꞌtoj jaꞌ Jordán, ey 120,000 ebꞌ soldado yin yicꞌaal Rubén, cꞌal yin ebꞌ yet Gad yetoj cꞌal yin ebꞌ yet nan tujan yicꞌaal Manasés. Jaꞌ wan tuꞌ caw tzꞌajan yeoc smitxꞌkꞌabꞌ ebꞌ yet jowal.

38 Jaꞌ masanil wan soldado tuꞌ, yin xacꞌal xolilal jix yun stoo ebꞌ bꞌey Hebrón, yet jix oc can naj David yin sreyaloj conobꞌ Israel; yetoj cꞌal wanxa yet Israelal ebꞌ, laan xacꞌal jix yute snaꞌbꞌal ebꞌ masanil. 39 Oxebꞌ cꞌual jix eecꞌ ebꞌ tituꞌ yetoj naj David, jix low ebꞌ, cꞌal yuqꞌuen jaꞌ ebꞌ, yutol jaꞌ wan yet conobꞌ ebꞌ tuꞌ jix waꞌnen jantaj loꞌbꞌe tuꞌ. 40 Jaꞌ ebꞌ caan bꞌey scawilal tuꞌ, yetoj cꞌal pax ebꞌ caan bꞌey naat, jaxca ebꞌ yet Isacar, ebꞌ yet Zabulón, cꞌal ebꞌ yet Neftalí, jaꞌ ebꞌ jix iꞌontej loꞌbꞌe yibꞌan noꞌ bꞌuru, noꞌ camello, noꞌ mula yetoj cꞌal noꞌ wacax. Caw ecꞌal tujan loꞌbꞌe jix yiꞌtej ebꞌ, jaxca ixim jarina, cꞌal teꞌ tajin higo, yal uva, aceite olivo, noꞌ icham wacax cꞌal noꞌ meꞌ: Caw ecꞌal tujan loꞌbꞌe jix yiꞌtej ebꞌ, yutol caw ey mimej tzalacꞌulal bꞌey conobꞌ Israel tuꞌ.