Scamichal Naj Is-bóset
4
Jaꞌ yet jix yabꞌen naj Is-bóset, scꞌaal naj Saúl, tol jix cam naj Abner bꞌey Hebrón, jix pax xacꞌal yip naj yu xiwcꞌulal; caw jix xiw cꞌal pax a masanil ebꞌ yet Israelal. 2 Ey cawan ebꞌ yakꞌomal servil naj Is-bóset tuꞌ, yaaw yeoc ebꞌ xol jun bꞌulan ebꞌ soldado elkꞌom. Ey jun chi yij Baaná, jal junxa xin, chi yij Recab. Jaꞌ ebꞌ tuꞌ scꞌaal naj Rimón, a conobꞌ Beerot xol ebꞌ yicꞌaal Benjamín. (Jaꞌ yicꞌaal ebꞌ ánima caan bꞌey Beerot tuꞌ, chi al-lei tol yicꞌaal Benjamín ebꞌ, yuxan jaꞌ jun conobꞌ tuꞌ, chi yij yet Benjamín. 3 Jaꞌ ebꞌ ánima tuꞌ ecꞌnaj bꞌey Beerot tinaniꞌ, jal ebꞌ ánima eyxa ecꞌ bꞌey Beerot yet yalantoj, jix too scol sbꞌa ebꞌ bꞌey conobꞌ Guitaim, jaꞌton tituꞌ jix caey ecꞌ ebꞌ yin ecꞌabꞌwom animail, masantaꞌcꞌal tinaniꞌ.)4 (Jaꞌ naj Jonatán scꞌaal Saúl ey jun scꞌaal chi yij Mefi-bóset. Jaꞌ naj tuꞌ man watxꞌoj yajan scaabꞌil. Jaꞌ yet joebꞌxa abꞌil skꞌinal naj Mefi-bóset tuꞌ, jix jul skꞌaneal bꞌey Jezreel tol xax cam naj Saúl yetoj naj Jonatán, yuxan jix ijle a naj Mefi-bóset tuꞌ yu jun ix chi ilon chꞌibꞌoj, yet chi ela ebꞌ yaloni. Yutol jix yakꞌ yip ebꞌ yelaoj, jix sbꞌejon ey ix, queytuꞌ jix yun yetex can el yajan naj.)
5 Jaꞌ naj Recab yetoj cꞌal naj Baaná tuꞌ, jix too ebꞌ bꞌey sna naj Is-bóset. Lalan wal yakꞌon sjowal yajan cꞌu yet chuman cꞌu yet jix apni oc ebꞌ naj, tol lalan swey naj sat xꞌat. 6 Jal ix chi teyne stiꞌ spuertail na tuꞌ, cꞌuxan cꞌal eytoj ix xuo el skꞌail tiriw, jaxa jix yunne jix tit pax sweyan ix tituꞌ, jaꞌ yet jun txolan tuꞌ jix octoj naj Recab yetoj yuẍtaj bꞌey chi wey naj Is-bóset, cꞌam cꞌal junoj mactxequel jix ilon ebꞌ. 7 Jaꞌ yet jix octoj ebꞌ yul na tuꞌ, jix yilon ebꞌ tol telan a naj Is-bóset wey sat xꞌat. Queytuꞌ jix yun smakꞌon cam ebꞌ, jix stzokꞌon el sjolom ebꞌ, jix yiꞌontoj ebꞌ. Masanil akꞌbꞌal jix bꞌey ebꞌ bꞌey chi too sbꞌeal conobꞌ Arabá, 8 yet chi too yakꞌon ebꞌ tet naj rey David; jatuꞌ eyecꞌ naj bꞌey Hebrón. Jix yalon ebꞌ tet naj jaxca tiꞌ:
—Jaach rey, jix kiꞌtej sjolom naj Is-bóset naj scꞌaal Saúl, naj chi jowi oc ja win, naj chi yoche tol chach smakꞌ camoj. Yuxan jaꞌ tinaniꞌ, jix el yin scꞌul Jehová yakꞌon ey jaach yin ja waon ecꞌ spaj yin Saúl cꞌal yin ebꞌ yicꞌaal naj, ẍi ebꞌ.
9 Jix takꞌwi naj rey David tet ebꞌ jaxca tiꞌ:
—Jaꞌ Jehová Naj jix jin colon el tet masanil jin bꞌiscꞌulal jaꞌ chi waoc yin testigoal je yin, 10 tol jaꞌ yet jix jul jun naj a Siclag yet chi jul yalon naj ey jin yu scamichal Saúl, yu jun tuꞌ tol oj jin tzala a yaloni, jaꞌ jun tuꞌ jix wakꞌ mitxꞌle eyoj, jix makꞌle camoj. Jaꞌton wal spajtzebꞌal jix wakꞌ tet, yu jul yalon jun kꞌane naj tuꞌ ey jin. 11 Yu jun tuꞌ xin, queytuꞌ oj jex wute cꞌal pax jaex tiꞌ. Caw pena jex jaex tiꞌ, yutol jix je makꞌ cam jun winaj tol cꞌam spenail yet lalan swey naj sat xꞌat bꞌey yul sna. Yu cꞌal jun tuꞌ, yuxan oj jin pajtze scamichal naj tuꞌ ey jex. Junelne oj wakꞌ qꞌueyle el je bꞌina ecꞌ bꞌey yul yibꞌankꞌinal tiꞌ, ẍi naj tet ebꞌ.
12 Jix lawi tuꞌ xin, jix ẍejon ebꞌ soldado naj rey tol chi makꞌle cam ebꞌ, jix tzokꞌle el skꞌabꞌ ebꞌ cꞌal yajan ebꞌ, catuꞌ jix a locan smimanil ebꞌ bꞌey chi apni oc yaman jaꞌ jaꞌ bꞌey Hebrón. Jix lawi tuꞌ xin, jix yiꞌontoj sjolom Is-bóset ebꞌ soldado, jix too smujon eytoj ebꞌ bꞌey mujan naj Abner, bꞌey Hebrón.