2 Jaꞌ ebꞌ scꞌaal naj David jix ali yet eyecꞌ bꞌey Hebrón, jaꞌton ebꞌ tiꞌ: Jaꞌ naj bꞌabꞌel, jaꞌton Amnón yuneꞌ ix Ahinóam, ix a Jezreel. 3 Jaꞌ naj yet scaabꞌ, jaꞌton naj Quilab, yuneꞌ ix Abigail, ix yistil can naj camom Nabal a conobꞌ Carmel. Jaꞌ jun yet yox, jaꞌton naj Absalón yuneꞌ ix Maacá, scutzꞌin Talmai, sreyal Guesur. 4 Jaꞌ naj yet scan, jaꞌton Adonías yuneꞌ ix Haguit. Jaꞌ naj yet sjoꞌ, jaꞌton Sefatías, yuneꞌ ix Abital. 5 Jaꞌ naj yet swaj, jaꞌton Itream, yuneꞌ ix Eglá jaꞌton junxa ebꞌ ix yistil naj David. Jaꞌton ebꞌ scꞌaal naj jix ali yet eyecꞌ naj bꞌey Hebrón.

6 Jaꞌ yet lalan yoc jowal xol ebꞌ yican David yetoj ebꞌ yican Saúl, jaꞌ naj Abner junjun cꞌal cꞌu chi yiꞌ cꞌal yip yopiso yibꞌan ebꞌ yet Saúl. 7 Jaꞌ naj camom Saúl tuꞌ, ey jun ix scaabꞌ yistil naj, Rispá sbꞌi ix, scutzꞌin naj chi yij Aiá. Ey jun cꞌual jix yal naj Is-bóset tet naj Abner jaxca tiꞌ:

—¿Tzet yuxan jix jaach wey yetoj ix scaabꞌ yistil naj camom jin mam?^a

8 Jaꞌ yet jix yalon Is-bóset naj tet jaxca tuꞌ, caw jix tit sjowal naj Abner tuꞌ; yuxan jix yal naj jaxca tiꞌ:

—¿Tumi cꞌam niꞌoj weloc apnoj yul ja sat jaxca junoj noꞌ txꞌiꞌ, tumi lalan waon oc jin bꞌa yetoj ebꞌ yet Judá cha wilaꞌ? Jain tiꞌ caw watxꞌ cꞌal jix wute jin bꞌa tet Saúl, naj camom ja mam, cꞌal tet masanil ebꞌ yican cꞌal tet ebꞌ swatxꞌil ánima, jacꞌalaꞌ ma jaach waoc yul skꞌabꞌ naj David, ¿jaach cha wal tinaniꞌ tol jix oc jin mul yetoj jun ix ix tuꞌ? 9 Tit ojabꞌ sjowal scꞌul Jehová wibꞌan ta tol cꞌam chi waoc jin bꞌa yetoj David yet chi yunen bꞌey jix yakꞌ can stiꞌ tet. 10 Tol yalnaj canoj tol chi iꞌle ecꞌ yopiso Saúl cꞌal tet ebꞌ yicꞌaal, jaxa tet naj David chi cancan jun opiso tuꞌ, yet watxꞌ jaꞌ naj chi oc sreyaloj conobꞌ Israel, cꞌal bꞌey Judá, chi tit tacꞌal bꞌey conobꞌ Dan masantaꞌcꞌal bꞌey conobꞌ Beerseba, ẍi naj Abner.

11 Caw wal ma xa skeꞌ spajtzen naj Is-bóset junojxa bꞌelan kꞌane tet naj Abner tuꞌ, yutol caw chi xiw naj.

12 Jix lawi tuꞌ xin, jix yaontoj wan ẍejabꞌ naj Abner bꞌey naj David yet chi yalon ebꞌ jaxca tiꞌ: Tumi man jain oj ey wopiso yibꞌan jun nación tiꞌ. Jaꞌ tinaniꞌ kakꞌ junoj cu wa kꞌane ja wetoj, yet chi oc masanil ebꞌ ket conobꞌ tiꞌ ja wetoj, ẍi naj.

13 Jix takꞌwi naj David, jix yalon jaxca tiꞌ: Chi ẍaꞌ jin cꞌul jaxca ja walon tuꞌ, ta tol chi cu waꞌne junoj cu wa kꞌane ja wetoj, asan xin, ey jun kꞌane sowalil chi wakꞌ ja wotajne eloj: Cꞌam chach jul jin sattaj, ta tol cꞌam cha wiꞌtej ix wistil, jaꞌton ix Mical scutzꞌin naj Saúl, ẍi naj David. 14 Jix lawi tuꞌ, jix yaon cꞌal pax toj ẍejabꞌ naj David bꞌey naj Is-bóset, jix yalon jaxca tiꞌ: Tol cha wiꞌtej ix Mical, ix wistil, jaꞌton ix wiꞌlenaj jin bꞌa yetoj, yutol wakꞌnaj jun cien sjolom swinajil ebꞌ Filisteo, yu stooloj ix tet naj ja mam.

15 Yuxan jix yal Is-bóset, tol chi iꞌle ecꞌ ix tet naj Paltiel, naj scꞌaal Lais, jaꞌton naj tuꞌ yichamil ix yeocoj. 16 Jaxa naj Paltiel xin, jix too tzajan naj yintaj ix, caw chi okꞌ naj, masantaꞌcꞌal jix apni oc naj bꞌey conobꞌ Bahurim. Jaꞌ tituꞌ jix yal naj Abner tet naj Paltiel jaxca tiꞌ: Kꞌojbꞌilxa ja wokꞌi paxan cantoj bꞌey ja na. Queytuꞌ jix yun smeltzo cantoj naj.

17 Jix lawi tuꞌ, yin cꞌuancꞌulalil jix yun skꞌanabꞌ naj Abner yetoj ebꞌ icham winaj yeoc yul conobꞌ Israel, jix yalon tet ebꞌ jaxca tiꞌ: Eyxa tiempoal jix cꞌoli je yaloni tol jaꞌ naj David che yoche chi oc je reyaloj. 18 Jaꞌ tinaniꞌ xin, tuxa jix aapnoj stiempoal yet chi oc naj yin reyal, yutol jix yakꞌ can stiꞌ Jehová, tol jaꞌ yu naj David tuꞌ, oj cu colon el yul skꞌabꞌ ebꞌ Filisteo, yetoj cꞌal yul skꞌabꞌ masanil wanxa ebꞌ chi jowi oc kin, ẍi naj Abner tuꞌ.

19 Jix kꞌanabꞌ cꞌal pax naj Abner yetoj masanil ebꞌ yet Benjamín, jix lawi tuꞌ xin, jix too naj bꞌey Hebrón, jix yalon naj tet David tzet jix yun yalon ebꞌ yet Israelal ebꞌ, cꞌal tzet jix yun yalon masanil ebꞌ yet Benjamín. 20 Jix lawi tuꞌ, jix jul naj Abner bꞌey Hebrón, bꞌey eyecꞌ naj David, iꞌbꞌil oc 20 ebꞌ soldado yu naj. Jix yalon naj David tol chi waꞌxi jun miman loꞌbꞌe yet chi low naj Abner yetoj cꞌal ebꞌ jaꞌjun yetoj. 21 Jix yalon naj Abner tet naj David jaxca tiꞌ:

Jaꞌ tinaniꞌ jaach rey, sowalil chi too jin yambꞌa oc masanil ebꞌ ket Israelal, yet chi swaꞌnen junoj swa kꞌane ebꞌ ja wetoj tiꞌ, queytuꞌ oj yun ja wakꞌon yaawil jaxca wal chi yoche ja cꞌul, ẍi Abner tet naj.

—Asiꞌ xin, ẍi naj David tet naj Abner. Jix lawi tuꞌ, jix yalon too sbꞌa naj Abner tet naj rey David, catuꞌ jix too naj yin tzalacꞌulal.

22 Jato wal stoo naj Abner tuꞌ, catuꞌ jix apni oc naj Joab yetoj ebꞌ soldado naj David, speto ebꞌ yin jowal. Caw miman tzetyetal iꞌbꞌil oc yu ebꞌ, jaꞌton wan tzetyetal jix yiꞌcan ecꞌ ebꞌ tet wan scajat ebꞌ tuꞌ. Jal naj Abner xin, cꞌamxa naj eyecꞌ yetoj naj David bꞌey Hebrón, yutol xax yal too sbꞌa naj yin tzalacꞌulal tet naj David. 23 Jaꞌ yet jix apni oc naj Joab yetoj masanil ebꞌ soldado jaꞌjun yetoj, jix al-le tet naj tol jaꞌ naj Abner scꞌaal Ner, jix eecꞌ yetoj naj rey, jaꞌ tinaniꞌ, tuxa jix chejle meltzo naj yu naj rey yin tzalacꞌulal. 24 Jix lawi tuꞌ, jix too naj Joab bꞌey naj rey, jix yaloni:

—¿Tzetyetal jix ja wun jaach rey? Jaꞌ naj Abner jix jaach jul ilon ecꞌoj, catuꞌ jix ja chaꞌon meltzo cꞌal naj jaxca tuꞌ. 25 ¿Tumi man ja wotaj oj jaach rey, tol jaꞌ naj Abner tuꞌ, tucꞌal chi jul yiꞌeytej ja sat naj, yajbꞌan chi yil naj tzet cha wunne cꞌal tzet yili bꞌey ey jaach ecꞌoj? ẍi naj Joab.

26 Asan cꞌal yet jix lawi skꞌanabꞌ naj Joab yetoj naj David, jix yaontoj wan ẍejabꞌ naj yet chi too seyletej naj Abner yu ebꞌ. Jata bꞌey jun jaꞌ ucꞌbꞌal jaꞌ yul yet Sirá, jix bꞌet mitxꞌletej naj Abner yu ebꞌ ẍejabꞌ naj Joab tuꞌ, caw man yotaj oj naj rey tzet chi yun ebꞌ naj tuꞌ. 27 Jaꞌ yet jix apni oc naj Abner bꞌey Hebrón, jaꞌ naj Joab jix iꞌontoj bꞌey jun pacꞌ ecꞌtoj scꞌul spuertail conobꞌ tuꞌ, yet watxꞌ chi kꞌanabꞌ yetoj xꞌojli yin caabꞌ satil. Jaꞌ tituꞌ jix stejon octoj yespada yin xaamscꞌul naj Abner, catuꞌ jix cami, yu yaon ecꞌ spaj scamichal naj Asael, yuẍtaj Joab tuꞌ tet naj Abner. 28 Jix lawi tuꞌ xin, jaꞌ yet jix yabꞌen oc naj rey David, jix yalon jaxca tiꞌ: Jaꞌ sattaj Jehová chi walon jain rey jin tiꞌ, yetoj cꞌal ebꞌ wet yaawil tiꞌ, caw cꞌam chi oc scamichal naj Abner tiꞌ cu penailoj jon, naj scꞌaal Ner. 29 Jaꞌ jun spenail tiꞌ, chi cancan yibꞌan naj Joab yetoj cꞌal yibꞌan ebꞌ yican cꞌal ebꞌ yicꞌaal. Jaꞌ xol ebꞌ tuꞌ ey ojabꞌ cꞌal mactxequel oj yabꞌ syaꞌil yu junoj yaꞌbꞌil chi elol yin smimanil, ey ojabꞌ cꞌal mactxequel oj yaꞌbꞌoj ey yu lepra, ey ojabꞌ mactxequel oj eyqꞌuey sbꞌeyi, ey ojabꞌ mactxequel oj makꞌle cam yu espada, ey ojabꞌ pax mactxequel oj cam yu wail, ẍi naj David.

30 Jaꞌ Joab yetoj naj Abisai, jaꞌ ebꞌ jix makꞌon cam naj Abner, yutol jaꞌ yet jix oc jowal bꞌey Gabaón, jaꞌ naj Abner tuꞌ jix makꞌon cam jun yuẍtaj ebꞌ naj tuꞌ.

31 Jix lawi tuꞌ xin, jix yalon naj rey David tet naj Joab yetoj cꞌal tet masanil ebꞌ jaꞌjun yetoj, tol chi stziltoj spichil ebꞌ cꞌal yaon oc an eel pichile ebꞌ, catuꞌ chi oc ebꞌ yin cuscꞌulal yu scamichal naj Abner. Jal naj rey David xin, jix oc tzajan yintaj mactxequel jix bꞌatxontoj scaẍail naj Abner tuꞌ. 32 Jix smujon can smimanil Abner ebꞌ bꞌey Hebrón. Jaꞌ tituꞌ jix okꞌ naj rey David yu naj Abner bꞌey jix mujle can tuꞌ, jix okꞌ cꞌal pax masanil ebꞌ ánima jaꞌjun yetoj naj, 33 yuxan jix sbꞌitne jun bꞌit yet cuscꞌulal naj rey David, jaxca tiꞌ:

Jal ebꞌ ánima xin, jix okꞌ masanil ebꞌ yu scamichal naj Abner.

35 Jix lawi tuꞌ, jix oc tean ebꞌ yin naj rey David tol chi low niꞌoj naj yet cꞌamto chi ey cꞌu, jaꞌ David jix yakꞌ stiꞌ sattaj Dios, jix yalon jaxca tiꞌ:

—¡Jaꞌ ojabꞌ Dios chi aon oc syaꞌilal wibꞌan an, ta tol chi wabꞌle niꞌoj loꞌbꞌe ma junojxa tzetyetal yet cꞌamto chi too cꞌu!

36 Masanil ebꞌ ánima eyecꞌ tituꞌ jix naꞌcha el jun tiꞌ yu ebꞌ, caw jix ẍaꞌ scꞌul ebꞌ, yutol jaꞌ masanil tzet chi yun naj David tuꞌ, jix ẍaꞌ cꞌal scꞌul ebꞌ masanil. 37 Jaꞌ yet jun cꞌual tuꞌ jix naꞌcha el yu masanil ebꞌ Israel tuꞌ, tol jaꞌ naj rey David cꞌam yoc yin scamichal naj Abner, scꞌaal Ner.

38 Jix lawi tuꞌ, jix yalon naj rey tet masanil ebꞌ yakꞌomal servil jaxca tiꞌ:

—Jaex tiꞌ, tol che yotajne el je masanil tol tuxa jix cam jun naj caw miman yeloc apnoj cu xol jaon Israel jon tiꞌ. 39 Yu jun tuꞌ xin, caxcꞌal jaꞌ Dios jix jin sicꞌon oc yin reyal, caw chi pax wip chi wabꞌe yu spenail jix yun ebꞌ yuneꞌ ix Seruiá tiꞌ. Jaꞌ ojabꞌ Jehová oj pajtzen tet jun jix unen jun spenail tuꞌ, ẍi naj.