Scamichal Saúl Yetoj Ebꞌ Scꞌaal
10
Jix yakꞌ jowal ebꞌ Filisteo yetoj ebꞌ Israel, jix ela ebꞌ Israel tuꞌ tet ebꞌ yin jun jowal tuꞌ, caw miman ebꞌ jix cam bꞌey txꞌotxꞌ wonan chi yij Gilboa. 2 Jix tzajlo ebꞌ Filisteo yintaj naj Saúl yetoj ebꞌ scꞌaal, jaꞌton: Jonatán, Abinadab cꞌal Malquisúa. Jix makꞌle cam ebꞌ yoxwanil yu ebꞌ. 3 Queytuꞌ jix yun smichꞌcha ey naj Saúl tuꞌ yu ebꞌ, jix yasitoj naj yutol jix michꞌcha naj sjul-le yu ebꞌ. 4 Yu jun tuꞌ, yuxan jix yal naj Saúl tet naj inen oc smitxꞌkꞌabꞌ yet jowal tuꞌ jaxca tiꞌ: Iꞌatej ja wespada tuꞌ, catuꞌ cha tejon oc win an, yet watxꞌ manaj wan txꞌoj sconobꞌ tiꞌ chin makꞌon camoj, ẍi naj Saúl tuꞌ.Jaꞌ naj inen oc chꞌen smitxꞌkꞌabꞌ naj tuꞌ, ma yal scꞌul jix yute jaxca tuꞌ, yutol caw chi xiw naj yuneni, yu tuꞌ xin, jaꞌcaw naj Saúl tuꞌ jix iꞌon atej yespada, jix sbꞌejon ey pajna sbꞌa naj yibꞌan xaam chꞌen. 5 Jaꞌ yet jix yilon naj inen oc smitxꞌkꞌabꞌ naj tuꞌ tol jix cam naj, queytuꞌ jix yun sbꞌejon cꞌal pax ey pajna sbꞌa naj yibꞌan xaam yespada tuꞌ, catuꞌ jix cam naj. 6 Queytuꞌ jix yun scam naj Saúl yet jun cꞌual tuꞌ, yetoj ebꞌ oxwan scꞌaal. Cꞌamxa cꞌal junojxa yicꞌaal naj Saúl tuꞌ jix oc can yin reyal sqꞌuexeloj. 7 Jaxa yet jix yilon ebꞌ Israel caan bꞌey jun jobꞌe tuꞌ, tol jix ela ebꞌ yet Israelal ebꞌ, tol jix cam pax naj Saúl yetoj ebꞌ scꞌaal, jix ela ebꞌ, catuꞌ jix sbꞌejoncan sconobꞌ ebꞌ. Catuꞌ jix apni can oc ebꞌ Filisteo caey ecꞌ bꞌey wan sconobꞌ ebꞌ tuꞌ.
8 Jaꞌ yet junxa cꞌual, jix too ebꞌ Filisteo spoꞌon ecꞌ stzetyetal ebꞌ jix cam tuꞌ. Jix yilon ebꞌ, tol jabꞌan can ey naj Saúl yetoj ebꞌ scꞌaal, camnajxa ey ebꞌ bꞌey txꞌotxꞌ wonan Gilboa. 9 Catuꞌ jix iꞌle el spichil naj Saúl tuꞌ yu ebꞌ, wan chi skꞌan yet chi yakꞌon jowal tuꞌ, jix lawi tuꞌ, catuꞌ jix stzokꞌle el sjolom naj yu ebꞌ. Jix yalon ebꞌ tol chi al-letoj jun kꞌane tuꞌ tet masanil ánima ey bꞌey yul-laj sconobꞌ ebꞌ Filisteo tuꞌ, yet chi al-le tet ebꞌ cꞌal bꞌey waꞌnebꞌil a spat na wan comon sdiosal ebꞌ tuꞌ. 10 Jix lawi tuꞌ, jix ale octoj spichil naj Saúl chi skꞌan yin jowal tuꞌ yu ebꞌ bꞌey stemplo sdiosal ebꞌ tuꞌ, jaꞌ bꞌey stemplo jun sdiosal ebꞌ chi yij Dagón, jaꞌ tituꞌ jix locbꞌale a sjolom naj Saúl tuꞌ yu ebꞌ. 11 Jaꞌ yet jix yabꞌen ebꞌ a Jabés yul yet Galaad jun tzet jix yun ebꞌ Filisteo yetoj smimanil naj Saúl tuꞌ. 12 Jix slatiꞌne sbꞌa masanil ebꞌ winaj tol caw ey yip. Queytuꞌ jix yun stoo ebꞌ yiꞌontej smimanil Saúl yetoj cꞌal yet ebꞌ scꞌaal, jix yiꞌontoj ebꞌ bꞌey Jabés. Jaꞌ tituꞌ jix smujle smimanil ebꞌ tuꞌ yu ebꞌ bꞌey yich jun teꞌ jii. Jix lawi tuꞌ, jujebꞌ cꞌual jix yijle nocha sbꞌa ebꞌ yu cuscꞌulal.
13 Queytuꞌ jix yun scam naj Saúl tuꞌ yu spenail jix yaocoj, yutol ma sjije ẍejbꞌanil Jehová. Yetoj cꞌal pax oj, tol jaꞌ bꞌey jun ix ix chi awten spixan camom jix bꞌet skꞌanle snaꞌbꞌal naj, catuꞌ manaj tet Jehová jix skꞌanle yabꞌe. 14 Yu cꞌal jun tuꞌ yuxan jix iꞌle el skꞌinal naj yu Jehová, jaꞌ tet David naj scꞌaal Jesé, jaꞌ yibꞌan naj jix akꞌle can jun yopiso Saúl tuꞌ, yu Dios.