Jix Cam Naj Saúl Yetoj Ebꞌ Scꞌaal
31
Jix oc ebꞌ Filisteo yakꞌon jowal yin ebꞌ Israel, catuꞌ jix ela ebꞌ tet ebꞌ Filisteo tuꞌ, caw ecꞌal ebꞌ jix cam bꞌey txꞌotxꞌ wonan chi yij Gilboa. 2 Jix oc tzajan ebꞌ naj Filisteo yintaj Saúl yetoj ebꞌ scꞌaal. Bꞌabꞌel jix cam naj Jonatán cꞌal Abinadab, yetoj cꞌal naj Malquisúa. 3 Jix lawi tuꞌ, catuꞌ jix oc xacꞌal tzajan ebꞌ yintaj naj Saúl, jix michꞌcha naj yu sjulbꞌal jun naj Filisteo, yuxan jix xiw xacꞌal a naj tet ebꞌ. 4 Yu tuꞌ xin, jix yalon naj Saúl tet jun naj inen oc smitxꞌkꞌabꞌ yet jowal jaxca tiꞌ:—Iꞌatej ja wespada tuꞌ, catuꞌ chin ja tejon camoj, yutol cꞌam chi woche chin yetne wan txꞌoj conobꞌal tiꞌ, yet chin smakꞌon cam ebꞌ, ẍi naj Saúl tuꞌ.
Jaꞌ naj inen oc wan mitxꞌkꞌabꞌe tuꞌ, ma yal scꞌul jix smakꞌ camoj. Yu jun tuꞌ, yuxan jix sbꞌejon ey nona sbꞌa Saúl yibꞌan yespada, catuꞌ jix cami. 5 Jaꞌ yet jix yilon naj jaꞌjun yetoj tuꞌ, tol jix cam naj Saúl, catuꞌ jix smakꞌon cam sbꞌa yetoj yespada jaxca jix yun smakꞌon cam sbꞌa Saúl tuꞌ. 6 Jaꞌ yet jun cꞌual tuꞌ jix cam naj Saúl yetoj ebꞌ oxwan scꞌaal, cꞌal naj yijomal ecꞌ smitxꞌkꞌabꞌ tuꞌ, yetoj cꞌal masanil ebꞌ Israel jaꞌjun yetoj. 7 Jaꞌ yet jix yabꞌen ebꞌ Israel eyecꞌ bꞌey skꞌaxepal ecꞌtoj spananil sjobꞌeal txꞌotxꞌ Jezreel, cꞌal bꞌey skꞌaxepal ecꞌtoj jaꞌ Jordán, tol jix ela ebꞌ soldado, catuꞌ jix cam naj Saúl yetoj oxwan scꞌaal, jix el cꞌal pax ebꞌ tuꞌ, jix sbꞌejoncan sna ebꞌ. Jaxa ebꞌ naj Filisteo jix apni can oc caan bꞌey sna ebꞌ tuꞌ.
8 Jaꞌ yet junxa cꞌual xin, jix too ebꞌ Filisteo yiꞌontej masanil stzetyetal ebꞌ Israel jix cam yin jowal tuꞌ, jix yilon ebꞌ tol telan cantoj smimanil naj Saúl yetoj oxwan scꞌaal bꞌey txꞌotxꞌ wonan chi yij Gilboa. 9 Eyman jix tzokꞌle el sjolom naj Saúl yu ebꞌ, jix yiꞌon ecꞌ chꞌen mitxꞌkꞌabꞌe yet jowal ebꞌ. Jix lawi tuꞌ, jix yaontoj kꞌane ebꞌ bꞌey masanil yul sconobꞌ ebꞌ Filisteo, cꞌal bꞌey stemplo jun comon sdiosal ebꞌ. 10 Jix yiꞌontoj smitxꞌkꞌabꞌ camom Saúl ebꞌ bꞌey stemplo jun comon sdiosal ebꞌ tuꞌ, jun chi yij Astarté, catuꞌ jix locbꞌale a smimanil naj Saúl yu ebꞌ, yetoj yet ebꞌ scꞌaal tuꞌ, bꞌey yin smuroal conobꞌ Bet-sán.
11 Jaꞌ yet jix yabꞌen oc ebꞌ a Jabés yul yet Galaad, tol jix locbꞌanele a smimanil naj Saúl yu ebꞌ Filisteo tituꞌ, 12 jix slatiꞌne sbꞌa ebꞌ, cꞌam cꞌal chi xiw niꞌoj ebꞌ; jun wal akꞌbꞌal jix bꞌey ebꞌ, jix apni oc ebꞌ bꞌey ey smimanil Saúl yetoj scꞌaal, jix yiꞌontoj ebꞌ bꞌey Jabés. Jaꞌ tituꞌ jix yakꞌ tzꞌaꞌ ebꞌ. 13 Jix lawi tuꞌ, jix smujon can eytoj ebꞌ bꞌey yich jun teꞌ teꞌ bꞌey Jabés tuꞌ. Jujebꞌ wal cꞌual jix yijle nocha sbꞌa ebꞌ, yu scuscꞌulal ebꞌ yin ebꞌ jix cam tuꞌ.