3 Jaꞌ yet jix apni oc naj David yetoj ebꞌ soldado tuꞌ, jix yiloni tol xax tzꞌaꞌey conobꞌ tuꞌ, jix iꞌletoj yistil ebꞌ naj yu ebꞌ, cꞌal yuninal ebꞌ yin presowomal. 4 Yu jun tuꞌ xin, caw jix a yaw ebꞌ naj yokꞌ sicꞌlebꞌil, masantaꞌcꞌal jix pax yip scꞌul ebꞌ yu okꞌil. 5 Jix iꞌletoj ebꞌ ix yistil naj David yu ebꞌ Amalecita yin presowomal, jaꞌton ix Ahinóam a Jezreel, cꞌal ix Abigail ix yistil naj camom Nabal, a Carmel. 6 Caw wal eyoc naj David yin bꞌiscꞌulal yutol ian xacꞌal chi kꞌojle cam naj yu ebꞌ soldado tuꞌ. Masanil ebꞌ jix yakꞌ caabꞌcꞌulal yu masanil tzet jix utele yuninal ebꞌ tuꞌ. Asan xin, jaꞌ naj David tuꞌ, jix yaoc snaꞌbꞌal yin Jehová sDiosal.

7 Jix lawi tuꞌ xin, jix yalon David tet naj yakꞌomal xaambꞌal chi yij Abiatar, naj scꞌaal Ahimélec:

—Chi wal ey jaach an, tol cha wiꞌtej jun an ja camiẍ chaleco ey jin an, ẍi naj.

Catuꞌ jix yiꞌontej an chaleco naj Abiatar tet David tuꞌ. 8 Catuꞌ jix skꞌanlen David tet Jehová jaxca tiꞌ:

—¿Chim wal jin tzajlo yintaj jun bꞌulan ebꞌ elkꞌom tuꞌ? ¿Oj mi wal michꞌcha ebꞌ naj wu an? ẍi David.

Jix takꞌwi Jehová jaxca tiꞌ:

—Asiꞌ, ocan tzajan yintaj ebꞌ, oj michꞌcha ebꞌ ja wu, catuꞌ oj ja wiꞌon can ecꞌ masanil ebꞌ jix iꞌletoj preso yu ebꞌ tuꞌ, ẍi Dios.

9 Jaꞌ yet jun txolan tuꞌ, jix too tzajan naj David yintaj ebꞌ yetoj 600 ebꞌ soldado iꞌbꞌil oc yu; jix apni oc ebꞌ bꞌey jun jobꞌe chi ecꞌ eytoj bꞌey Besor. 10 Jaꞌ tituꞌ jix cꞌuumbꞌi a 200 ebꞌ soldado tuꞌ, ma xa skeꞌ kꞌaxbꞌo ecꞌtoj ebꞌ tituꞌ; jal junxa 400 ebꞌ xin, jix too cꞌal ebꞌ yetoj David. 11 Jix lawi tuꞌ, jix ẍaꞌlen sbꞌa ebꞌ yetoj jun naj a Egipto yul bꞌe, jaxa yiꞌontoj ebꞌ tet naj David, jix yakꞌon sloꞌbꞌe ebꞌ cꞌal jaꞌ yuqꞌueꞌ. 12 Jix yakꞌon cꞌal pax jun patxan teꞌ tajin higo waꞌnebꞌil jaxca paat, yetoj cꞌal pax caabꞌ jenan an tajin uva. Jaꞌ yet jix lawi slow naj a Egipto tuꞌ, jix oc yip naj jix yabꞌe, yutol oxebꞌxa cꞌu oxebꞌxa akꞌbꞌal, cꞌam naj chi lowi, cꞌal yuqꞌuen jaꞌ. 13 Jix lawi tuꞌ xin, jix skꞌanlen David tet naj jaxca tiꞌ:

—¿Mactxequel ja patrón? ¿Bꞌeytuꞌ caan oc jaach? ẍi naj.

Jix takꞌwi jun a Egipto tuꞌ tet naj jaxca tiꞌ:

—Jain tiꞌ a Egipto jin an, yakꞌomal servil weoc bꞌey jun naj Amalecita, asan xin, tol jix jin yaꞌbꞌi eyoj, yuxan caabꞌi tax jix jin bꞌejlecan yu naj an. 14 Yutol jix bꞌet kakꞌ lawoj el conobꞌ Négueb bꞌey sconobꞌ ebꞌ Quereteos, yetoj bꞌey yet ebꞌ Judá, cꞌal bꞌey ebꞌ yet Caleb. Jix yalon cꞌal pax oj, tol jix cu nuscantoj conobꞌ Siclag, ẍi jun yakꞌomal servil tuꞌ.

15 —¿Chim skeꞌ chin ja wiꞌtoj bꞌey jun bꞌulan ebꞌ elkꞌom tuꞌ? ẍi naj David tet.

Jix takꞌwi jun naj a Egipto tuꞌ, jix yalon jaxca tiꞌ:

—Chi skeꞌ jaach wiꞌontoj ta cha wakꞌcan ja tiꞌ sattaj Dios tol cꞌam chin ja makꞌ camoj, catuꞌ cꞌam chin ja waoc yul skꞌabꞌ jin patrón tuꞌ, ẍi naj.

16 Queytuꞌ jix yun yiꞌletoj naj David tuꞌ yu bꞌey eyecꞌ ebꞌ elkꞌom tuꞌ. Sajleminaj xacꞌal ye ey ebꞌ tituꞌ, lalan slow ebꞌ cꞌal yuqꞌuen jaꞌ ebꞌ, eyoc kꞌin yu ebꞌ, yu tzet jix bꞌet yelkꞌanetej ebꞌ xol ebꞌ Filisteo cꞌal bꞌey yul yet Judá. 17 Queytuꞌ jix yun yoc naj David yakꞌon jowal yetoj ebꞌ yet jix sajbꞌi eloj masantaꞌcꞌal yet yeycꞌualil. Masanil jix yakꞌ lawoj, asanxane 400 ebꞌ achꞌe winaj jix oc yibꞌan noꞌ camello, jix elcan a ebꞌ.

18 Jix yiꞌon can ecꞌ masanil tzetyetal jix yelkꞌanetoj ebꞌ Amalecita tuꞌ, queytuꞌ jix yun yiꞌon can ecꞌ ebꞌ yistil naj David scawanil. 19 Cꞌamxa junoj ánima jix yiꞌtoj ebꞌ Amalecita tuꞌ, yutol pilan cꞌal jix yiꞌcan ecꞌ naj David, ebꞌ winaj, ebꞌ ix ix, cꞌal ebꞌ unin. Yetoj cꞌal pax masanil tzet jix yiꞌtoj ebꞌ, pilan jix yiꞌcan ecꞌoj. 20 Jix yiꞌon cꞌal pax can ecꞌ naj David noꞌ meꞌ, noꞌ wacax; yu jun tuꞌ, yuxan jaꞌ ebꞌ joynen oc noꞌ noꞌ tuꞌ jix yal ebꞌ jaxca tiꞌ: Ilaꞌ wal tzet jix yiꞌcan ecꞌ naj David tiꞌ la, ẍi ebꞌ.

21 Jaꞌ yet jix jul naj David bꞌey ey can junxa 200 ebꞌ soldado jix cꞌuumbꞌi can a tuꞌ, ma xa skeꞌ stoo ebꞌ yetoj, yutol jix can ebꞌ bꞌey jun jobꞌe bꞌey txꞌotxꞌ Besor, jix jul chaꞌle naj David yu ebꞌ, yetoj cꞌal ebꞌ jix bꞌetecꞌ yetoj. Jaxa yet jix apni oc naj David scꞌatan ebꞌ, jix akꞌle scawil scꞌul ebꞌ yu naj yin tzalacꞌulal. 22 Ey ebꞌ pena snaꞌbꞌal jaꞌjun yetoj naj David tuꞌ, jix yalon ebꞌ naj, tol jaꞌ ebꞌ ma bꞌetecꞌ yin jowal tuꞌ, man smoo oj chi akꞌle tzetyetal jix bꞌet iꞌle can ecꞌ tuꞌ, asan yistil ebꞌ, cꞌal yuninal ebꞌ chi akꞌle tet, catuꞌ chi too ebꞌ, ẍi ebꞌ naj jix bꞌetecꞌ tuꞌ.

23 Jaxa pax naj David xin, jix alon tet ebꞌ jaxca tiꞌ:

—Manche je yute jaxca tuꞌ, yutol jaꞌ Jehová jix akꞌon ey jon. Jaꞌ Naj jix cu teyneni. Jaꞌcꞌal pax jix aon oc wan elkꞌom tuꞌ yul cu kꞌabꞌ. 24 ¿Tumi ey mactxequel oj ẍaꞌ yabꞌ jun je naꞌbꞌal tuꞌ? Jaxca ket jaon jix cu bꞌetecꞌ yin jowal tuꞌ, quey cꞌal pax tuꞌ yet ebꞌ jix cancan teynen cu mitxꞌkꞌabꞌ tiꞌ, yuxan laan cꞌal, chi yun yiꞌon yet junjun, ẍi naj.

25 (Jatax cꞌal yet tuꞌ, jix oc can jun tiꞌ yin leyal xol ebꞌ Israel masantaꞌcꞌal tinaniꞌ.)

26 Jaꞌ yet jix apni oc naj David bꞌey conobꞌ Siclag, jix yatoj ẍejabꞌ bꞌey ebꞌ icham winaj yeoc yul yet Judá, jaꞌton ebꞌ swatxꞌil ánima, jix yaontoj niꞌoj tzetyetal jix bꞌet yiꞌcan ecꞌ tuꞌ tet ebꞌ, yuxan jix yal ebꞌ yakꞌomal servil David tet ebꞌ jaxca tiꞌ: Ti ey niꞌan tzetyetal jix bꞌet wiꞌ can ecꞌ tet ebꞌ chi jowi oc yin Jehová tiꞌ, ẍi naj David, ẍi ebꞌ.

27 Jix yatoj wan saꞌbꞌeal tuꞌ tet ebꞌ caan bꞌey Betel, bꞌey Ramot, yet Négueb, bꞌey Jatir, 28 bꞌey Aroer, bꞌey Sifmot, bꞌey Estemoa, 29 cꞌal bꞌey Racal, yetoj cꞌal pax tet ebꞌ yicꞌaal Jerahmeel, bꞌey ebꞌ a Quenita, 30 cꞌal bꞌey Hormá, bꞌey Corasán, bꞌey Atac, 31 bꞌey Hebrón, yetoj cꞌal bꞌey masanil wan conobꞌ bꞌey jix ecꞌabꞌtoj naj David yetoj ebꞌ soldado.