Jaꞌ jun libro Rut tiꞌ jix tzꞌibꞌelecan yet abꞌil 1030-1010 a.C. Cꞌam wal chi naꞌcha eloj mac jix tzꞌibꞌeni, ey mac chi aloni tol jaꞌ naj Samuel. Jaꞌ bꞌey conobꞌ Belén, jix tzꞌibꞌelecanoj.

Jaꞌ jun libro tiꞌ chi alontej skꞌaneal jun ix ix chi yij Rut, a Moab ix, jix yiꞌle sbꞌa ix yetoj jun naj a Israel. Jaꞌ yet jix camtoj yichamil ix, caw jix xꞌox swatxꞌcꞌulal ix tet yalibꞌ, catuꞌ jix yaon oc sbꞌa ix jaxca sconobꞌal yalibꞌ cꞌal yaon oc sbꞌa ix yul skꞌabꞌ sDiosal yalibꞌ tuꞌ, jaꞌton sDiosal ebꞌ Israel. Jaꞌ yu watxꞌ sbꞌeybꞌal ix tuꞌ, yuxan jix oc tꞌanan jun winaj caw bꞌeom yin ix, jaꞌton naj Booz. Jaꞌ jun winaj tuꞌ, yican to sbꞌa yetoj naj camom yichamil ix, yutol jaxca tuꞌ yalon sleyal cꞌal sbꞌeybꞌal ebꞌ ánima yet jun tiempoal tuꞌ. Yu cꞌal tol jix nupi ix yetoj jun winaj tuꞌ, yuxan xutx ixnam smam icham naj rey David yeoc ix Rut tuꞌ. Jaꞌ yin ebꞌ tuꞌ jix tit ebꞌ yichmam Jesucristo. Jaꞌ yet chi txeclo el jun ix txꞌoj conobꞌal tiꞌ yin xolilal ebꞌ smam icham Jesús, jaxca wal tol jix iꞌle a can wanxa txꞌoj conobꞌal. Txꞌoxbꞌanil yeoc ix Rut, tol jaꞌ mac chi yaoc scꞌul yin Dios, cꞌal sjijen tzet chi yal ẍejbꞌanil Dios, chi tzala yetoj. Yuxan cꞌam cꞌal sqꞌuexanil yili ebꞌ ánima yul sat Dios.