3 Jaxa jix yun xin, jix cam naj Elimélec, yichamil ix Noemí tuꞌ, catuꞌ jix cancan ix xꞌojli yetoj cawan yuneꞌ. 4 Yin xa cꞌuancꞌulalil jix nupi ebꞌ naj yetoj ebꞌ ix Moabita. Ey jun ix chi yij sbꞌi Orfá, jal junxa ix, Rut sbꞌi ix. 5 Laonebꞌxa abꞌil scaey ecꞌ ebꞌ tituꞌ, catuꞌ jix cam naj Mahlón yetoj cꞌal naj Quilión, jaꞌ yet tuꞌ jix can ix Noemí xꞌojli, cꞌamxa junoj yuneꞌ, catuꞌ cꞌamxa pax yichamil.

6 Jaꞌ yet tuꞌ, jix yabꞌen ix Noemí tol jix yakꞌ syaaxilal Dios yibꞌan ebꞌ conobꞌ Israel, yutol cꞌamxa wail. 7 Yu jun tuꞌ xin, yuxan jix yaoc ix yin scꞌul tol chi paxtoj ix bꞌey Judá, catuꞌ oj yiꞌontoj cawan yalibꞌ ix yetoj. 8 Jaꞌ yet eyoc ebꞌ yul bꞌe, jix yalon ix Noemí tet ebꞌ cawan yalibꞌ tuꞌ jaxca tiꞌ:

—Jaꞌ tinaniꞌ paxanwejtoj bꞌey sna je mam je txutx. Jaꞌ Dios oj oc cꞌal je yetoj. Jaꞌ oj pajtzen je watxꞌcꞌulal tet je yichamil, cꞌal ey jin. 9 Jaꞌ ojabꞌ cꞌal swatxꞌcꞌulal Dios chi oc je yetoj, catuꞌ oj jex nupoj junelxa, catuꞌ oj jex oc cꞌal yin tzalacꞌulal bꞌey je na, ẍi ix tet ebꞌ.

Catuꞌ jix stzꞌubꞌon el stiꞌ yalibꞌ ix Noemí tuꞌ, yet chi stakꞌele can sbꞌa ebꞌ, catuꞌ jix michꞌcha scꞌul ebꞌ ix yokꞌ sicꞌlebꞌil. 10 Catuꞌ jix yalon ebꞌ ix jaxca tiꞌ:

—Cꞌam chi cu can jaon tiꞌ jon, oj cu toj cꞌal ja wetoj bꞌey ja conobꞌ tuꞌ, ẍi ebꞌ ix alibꞌe tuꞌ.

11 Catuꞌ jix yalon cꞌal ix Noemí tet ebꞌ ix:

—Jex txo walibꞌ, paxanwejtoj bꞌey je na. ¿Tzet to wal yu, yuxan chex oc cꞌal tzajan wintaj an? Tumi oj to aloj wanojxa wuneꞌ catuꞌ oj oc je yichamiloj.^a 12 Yu jun tuꞌ, yuxan paxanwejtoj bꞌey sna je mam je txutx. Jal jin jain tiꞌ, caw ixnam jin xa, tumi oj to wal oj jin nupoj junelxa yet jun akꞌbꞌal tiꞌ, catuꞌ chi ali wuneꞌ. 13 ¿Tumi oj to je yechbꞌane chꞌibꞌaoj, catuꞌ chex nupi yetoj ebꞌ? ¿Tumi yu cꞌal oj je yechbꞌane, catuꞌ manxa oj jex nupoj? Caw cꞌamaj jex walibꞌ, man oj eloc jaxca tuꞌ. Caxcꞌal yaꞌtaj je yeocoj, jal jin jain tiꞌ, jaxca tiꞌ chi el yin scꞌul Dios chi elol jun miman cuscꞌulal tiꞌ wibꞌan an, ẍi ix Noemí tet ebꞌ ix yalibꞌ tuꞌ.

14 Catuꞌ jix cꞌoli yokꞌa ebꞌ ix junelxa. Jaꞌ yet tuꞌ jix stakꞌele can sbꞌa ix Orfá yetoj yalibꞌ, jix tzꞌubꞌle can el stiꞌ ix yu, catuꞌ jix paxtoj ix. Jal pax ix Rut tuꞌ xin, jix cancan ix yetoj yalibꞌ tuꞌ yutol cꞌam chi yoche ix chi paxtoj. 15 Jix yalon ix Noemí tet ix jaxca tiꞌ:

—Ilaꞌ ix ja wet alibꞌeal jix paxtoj ix bꞌey ebꞌ yet conobꞌ cꞌal bꞌey sdiosal. Asiꞌ, paxantoj jaach tiꞌ yetoj ix, ẍi ix Noemí tuꞌ.

16 Catuꞌ jix takꞌwi ix Rut:

—Manche ja wal jaxca tuꞌ ey jin, yin tol chach jin bꞌejcanoj, oj jin toj cꞌal ja wetoj yal cꞌal bꞌeytuꞌ oj jaach caey ecꞌoj, oj jin caey cꞌal ecꞌ ja wetoj, jaꞌ ja conobꞌ oj oc jin conobꞌoj, jaꞌ ja Diosal, jaꞌ oj oc pax jin Diosaloj. 17 Jaꞌ bꞌey oj jaach camoj, jaꞌ tituꞌ oj jin cam pax oj, jaꞌ tituꞌ oj jin mujleoj. Yakꞌ ojabꞌ syaꞌilal Dios win sicꞌlebꞌil, asan ojabꞌ camich chi poꞌon ey cu nan ja wetoj, ẍi ix.

18 Jaꞌ yet jix yilon oc ix Noemí tol caw bꞌejan scꞌul ix Rut stoo yetoj ix, cꞌamxa tzet jix yal tet ix. 19 Catuꞌ jix too ebꞌ scawanil, masantaꞌcꞌal jix apni oc ebꞌ bꞌey Belén.

Jaꞌ yet lalan yapni oc ix Rut cꞌal ix Noemí bꞌey Belén tuꞌ, caw jix qꞌueya scꞌul masanil ebꞌ a conobꞌ tuꞌ yin ebꞌ ix. Jaꞌ ebꞌ ix ix chi yalon yin ebꞌ cawan jaxca tiꞌ:

—¿Yel mi jaꞌ ix Noemí tiꞌ? ẍi ebꞌ.

20 Catuꞌ jix takꞌwi ix Noemí jaxca tiꞌ:

—Cꞌamxa che yal Noemí,^b win an, yutol Mará,^c xa jin bꞌi, yutol jaꞌ Dios, Naj chi cꞌal skeꞌ yu masanil jaꞌ jix akꞌon jun syaꞌtajil tiꞌ wibꞌan an. 21 Jaꞌ yet jix jin too titiꞌ an, ey syaaxilal yul jin kꞌabꞌ, jaxa pax yet chin meltzo an, caw cuscꞌulal xacꞌal iꞌbꞌil oc wu, yutol jaxca tuꞌ chi el yin scꞌul Dios chi elocoj. ¿Tzet to wal yu, yuxan che yakꞌ cꞌal wij Noemí? Yutol caw ey syaꞌtajil jix jul wibꞌan yu Dios, ẍi ix.

22 Jaxca ton tuꞌ jix yun spaxtoj ix Noemí bꞌey Belén, yetoj yalibꞌ Rut, ix a Moab. Jaꞌ yet tuꞌ lalan wal ẍaꞌon el yich skꞌuple a ixim cebada yet jix apni oc ebꞌ ix tituꞌ.