Jaꞌ jun libro tiꞌ jix tzꞌibꞌelecan yet abꞌil 1043 a.C. Chi naꞌlei tol jaꞌ naj Samuel, jix tzꞌibꞌencan bꞌey txꞌotxꞌ Canaán.

Jaꞌ jun libro tiꞌ, chi yaltej skꞌaneal ebꞌ Israel yet jix camtoj naj Josué, jaꞌton jun syaawil ebꞌ jix ijbꞌani. Jaꞌ yet jun tiempoal tuꞌ, junne yeoc ebꞌ. Jix lawi tuꞌ xin, catuꞌ jix poꞌochatoj ebꞌ, cꞌamxa pax yeloc apnoj syaawil ebꞌ yul sat. Caw naatil jix yakꞌ jowal ebꞌ yetoj wan conobꞌ ey scawilal, ey pax bꞌey chi yakꞌle jowal ebꞌ yetoj yet conobꞌ tuꞌ. Ey wan ebꞌ Cananeo ey can ecꞌ yul sconobꞌ ebꞌ, yutol ma tzaji ebꞌ Israel tuꞌ yujten el ebꞌ. Caw ey jowal xol ebꞌ. Txololi cꞌal yecꞌ ebꞌ chi yakꞌ yaawil xol ebꞌ, asanne ebꞌ jelan chi yute yaloni, yu tzet chi yun ebꞌ. Jaꞌ wan syaawil ebꞌ tuꞌ, jaꞌton ebꞌ Juez chi bꞌina sbꞌi yul jun libro tiꞌ. Jaꞌton ebꞌ tiꞌ: Ix Débora, naj Barac, naj Gedeón, naj Sansón. Caw kocꞌtaj cꞌal chi qꞌuexle oc ebꞌ yaaw tuꞌ xol ebꞌ.

Jaꞌ Dios ma sbꞌejcan ebꞌ sconobꞌ yin junelne. Jaꞌ yu swatxꞌ bꞌeybꞌal ebꞌ tuꞌ, yuxan chi ẍaꞌ swatxꞌcꞌulal Dios ebꞌ. Ta pena tzet chi sbꞌeybꞌalne ebꞌ xin, jaꞌ chi iꞌontej syaꞌilal yibꞌan ebꞌ. Caxcꞌal jaxca tuꞌ jix yute cꞌal sbꞌeybꞌal ebꞌ, jix col-le cꞌal ebꞌ yu Jehová, asantane tol chi snaꞌ sbꞌa scꞌul ebꞌ, catuꞌ chi yaon oc snaꞌbꞌal ebꞌ yin Dios.