Jaꞌ An Libro
JUECES
Jix Oc Jowal Yetoj Ebꞌ Cananeo, Ebꞌ Judá Cꞌal Ebꞌ Yet Simeón
1
Jaꞌ yet jix camtoj naj Josué xin, masanil ebꞌ conobꞌ jix skꞌanle ebꞌ tet Jehová: ¿Bꞌeytet junoj icꞌaaleal cu xol tiꞌ chi bꞌabꞌi yakꞌ jowal yetoj ebꞌ Cananeo tiꞌ? 2 Jix takꞌwi Jehová tet ebꞌ jaxca tiꞌ: Tol jaꞌ ebꞌ yet Judá chi bꞌabꞌi yakꞌ jowal yetoj ebꞌ. Jain oj wakꞌ txꞌotxꞌ txꞌotxꞌ tiꞌ tet ebꞌ. 3 Yu jun tuꞌ xin, yuxan jaꞌ ebꞌ yicꞌaal Judá jix yawte yuẍtaj ebꞌ, jaꞌton ebꞌ yicꞌaal Simeón, yet chi sjunbꞌane sbꞌa ebꞌ, yin yiꞌon ecꞌ txꞌotxꞌ txꞌotxꞌ tuꞌ ebꞌ, tol tꞌinan chi cancan tet Judá tuꞌ, oj lawoj tuꞌ, catuꞌ chi swa inen pax ecꞌ txꞌotxꞌ txꞌotxꞌ tol chi cancan tet Simeón. Jaꞌ xol ebꞌ yicꞌaal Simeón tuꞌ, jix ẍaꞌ scꞌul ebꞌ sjunbꞌanen sbꞌa yetoj ebꞌ yicꞌaal Judá. 4-5 Queytuꞌ jix yun stoo ebꞌ scaabꞌ tujanil yet chi yakꞌon jowal yin ebꞌ Cananeo, cꞌal yin ebꞌ Ferezeo, yutol jaꞌ Jehová jix aon oc ebꞌ yul skꞌabꞌ ebꞌ. Jaꞌ bꞌey Bézec jix eyqꞌuey 10,000 ebꞌ yu ebꞌ naj. Jaꞌ xol ebꞌ tuꞌ eyoc naj Adonisédec. 6 Caxcꞌal mi jix ela naj Adonisédec tuꞌ, jix ujtele naj yu ebꞌ Israel, masantaꞌcꞌal jix michꞌcha naj yu ebꞌ, jix tzokꞌle el xutxal yiximal skꞌabꞌ, cꞌal xutxal yiximal yajan naj yu ebꞌ. 7 Yu tuꞌ xin, jix yalon naj Adonisédec tuꞌ jaxca tiꞌ: Jaꞌ yet yalantoj, jix jin tzokꞌel xutxal yiximal skꞌabꞌ, cꞌal xutxal yiximal yajan 70 ebꞌ rey, catuꞌ jix sicꞌon a skꞌail jin loꞌbꞌe ebꞌ yalan jin meẍa. Yuxan jaxa tinaniꞌ, jaꞌ Dios chin uten jaxca jix wute ebꞌ tuꞌ an, ẍi naj. Jix lawi tuꞌ, catuꞌ jix iꞌletoj naj bꞌey conobꞌ Jerusalén, jaꞌ tituꞌ jix cami.Jix Eyqꞌuey Conobꞌ Jerusalén Cꞌal Hebrón
8 Jaꞌ ebꞌ yicꞌaal Judá jix oc ebꞌ yakꞌ jowal yin conobꞌ Jerusalén. Jix lawi tuꞌ catuꞌ jix yiꞌon can oc jun conobꞌ tuꞌ ebꞌ, jix stzokꞌon cam masanil ánima ebꞌ, jix yakꞌon tzꞌaꞌ jun conobꞌ tuꞌ ebꞌ. 9 Jix lawi tuꞌ, jix oc pax ebꞌ yakꞌon jowal yin ebꞌ Cananeo, jaꞌton ebꞌ caan bꞌey tzalquiltaj txꞌotxꞌ bꞌey yul yet Négueb, yetoj cꞌal bꞌey acꞌal-laj yeqꞌui. 10 Jix oc cꞌal pax yakꞌon jowal ebꞌ yin ebꞌ Cananeo bꞌey conobꞌ Hebrón, jacꞌal oc chi yij pax sbꞌi Quiriat-arbá yet peyxa, catuꞌ jix makꞌle cam naj Sesay, cꞌal Ahimán yetoj cꞌal Talmai yu ebꞌ.
Jix Eyqꞌuey Conobꞌ Debir Yu Naj Otoniel
11 Jix lawi tuꞌ, catuꞌ jix oc pax yakꞌon jowal ebꞌ yin conobꞌ Debir, jacꞌal oc chi yij sbꞌi Quiriat-séfer yet peyxa. 12 Jaꞌ naj Caleb jix yakꞌ stiꞌ naj, ta tol ey junoj mactxequel chi akꞌon eyqꞌuey conobꞌ Debir, chi yakꞌ ix scutzꞌin naj yistiloj junoj mac chi eyqꞌuey jun conobꞌ tuꞌ yu. 13 Jix eyqꞌuey jun conobꞌ tuꞌ yu naj Otoniel, scꞌaal Quenaz; jaꞌ naj Quenaz tuꞌ tzunan unin yeoc naj yintaj naj Caleb, yuxan jix yakꞌ naj Caleb tuꞌ scutzꞌin yistiloj naj Otoniel. 14 Jaꞌ yet lalan stoo ix yetoj naj Otoniel tuꞌ, jix yalon naj tet ix tol chi skꞌan xꞌotxꞌ ix tet smam. Jaꞌ yet jix yilon naj Caleb tol chi eytej ix Acsa yibꞌan noꞌ sbꞌuru tuꞌ, jix skꞌanlen naj tet ix jaxca tiꞌ:
—¿Tzet chach ioni? ẍi naj tet ix.
15 Jix takꞌwi ix tet smam jaxca tiꞌ:
—Tol chin kꞌan ey jaach an, tol cha wakꞌ jin txꞌotxꞌ bꞌey ey jaꞌ snukꞌ jaꞌ chi aol sat txꞌotxꞌ, yutol jaꞌ txꞌotxꞌ jix wakꞌ ey jin bꞌey Négueb, caw tajin sat txꞌotxꞌ, ẍi ix tet smam.
Yu jun tuꞌ, jix yakꞌon junxa txꞌotxꞌ txꞌotxꞌ naj Caleb tuꞌ bꞌey chi aol jaꞌ snukꞌ jaꞌ sat txꞌotxꞌ bꞌey yibꞌan atoj tuꞌ, cꞌal bꞌey yalan eytej tuꞌ.
Jantaj Wan Tzetyetal Jix Eyqꞌuey Yu Ebꞌ Yicꞌaal Judá Cꞌal Yu Ebꞌ Yet Benjamín
16 Jaꞌ xol ebꞌ yicꞌaal Hobab, naj Quenita, jaꞌton sniꞌ naj Moisés jix el ebꞌ bꞌey xꞌotxꞌal teꞌ palma, yetoj cꞌal ebꞌ yicꞌaal Judá, jix too caey ebꞌ yetoj ebꞌ ánima bꞌey txꞌotxꞌ cusiltaj txꞌotxꞌ yul yet Judá bꞌey Négueb, scawilal conobꞌ Arad. 17 Queytuꞌ jix yun stoo ebꞌ yicꞌaal Judá, yetoj ebꞌ yet Simeón, jix oc ebꞌ yakꞌon jowal yin ebꞌ Cananeo caan bꞌey Sefat. Junelne jix yakꞌ lawoj el jun conobꞌ tuꞌ ebꞌ, yu jun tuꞌ, yuxan jix yakꞌ yij sbꞌi jun conobꞌ tuꞌ ebꞌ yin Hormá.a 18 Ma skeꞌ yiꞌon ecꞌ conobꞌ Gaza ebꞌ, Ascalón, Ecrón, yetoj cꞌal xꞌotxꞌ junjun conobꞌ tuꞌ yinlaj. 19 Yutol eyoc Jehová yetoj ebꞌ a Judá tuꞌ, yuxan jix skeꞌ yakꞌon eyqꞌuey wan ánima caan bꞌey txꞌotxꞌ sjolomlaj wonan, jal ebꞌ caan bꞌey txꞌotxꞌ acꞌal-laj tuꞌ xin, ma el ebꞌ ánima tuꞌ yujten ebꞌ, yutol jaꞌ ebꞌ tuꞌ, ey ẍꞌen carruaje yet jowal ebꞌ. 20 Jix akꞌle txꞌotxꞌ Hebrón tet naj Caleb, jaxca jix yun yalon can naj Moisés. Jaꞌ naj Caleb tuꞌ jix ujten el oxebꞌ bꞌulan ebꞌ scꞌaal naj Anac. 21 Jal pax ebꞌ yicꞌaal Benjamín, ma skeꞌ yujtele ebꞌ Jebuseo caan bꞌey Jerusalén tuꞌ yu ebꞌ. Jaꞌ ebꞌ Jebuseo yetoj ebꞌ yicꞌaal Benjamín, junne cꞌal caan ecꞌ ebꞌ bꞌey Jerusalén tuꞌ tinaniꞌ.
Jix Eyqꞌuey Conobꞌ Betel Yu Ebꞌ Yicꞌaal José
22-23 Jaꞌ ebꞌ yicꞌaal José, jix snaꞌbꞌalne el yakꞌon jowal ebꞌ yin conobꞌ Betel, jaꞌton jun conobꞌ tuꞌ chi yij Luz yet peyxa. Jaꞌ Jehová jix colwa yetoj ebꞌ. Jix ẍejontoj yilomal txꞌotxꞌ txꞌotxꞌ tuꞌ ebꞌ. 24 Jaꞌ ebꞌ ilom txꞌotxꞌ tuꞌ, jix yil ebꞌ yeltej jun winaj bꞌey conobꞌ tuꞌ, jix yalon ebꞌ tet jaxca tiꞌ: Ta tol oj ja txꞌox tzet oj yun koctoj bꞌey yul conobꞌ tiꞌ jon, cꞌam tzet oj jaach kute jon, ẍi ebꞌ. 25 Jaꞌ jun winaj tuꞌ jix txꞌoxon tet ebꞌ, yu tzet chi yun yoctoj ebꞌ yul jun conobꞌ tuꞌ. Catuꞌ jix stzokꞌon cam masanil ánima ebꞌ caan tituꞌ, jal jun naj jix txꞌoxon ebꞌ tuꞌ, ma makꞌle cam naj, yetoj cꞌal masanil ebꞌ caan yetoj yul sna naj tuꞌ. 26 Jaꞌ jun winaj tuꞌ, jix too caey bꞌey xꞌotxꞌ ebꞌ Hitita, jix swaꞌnen a jun conobꞌ tituꞌ, jix yakꞌon yij sbꞌi Luz, jaꞌton sbꞌi jun conobꞌ tuꞌ chi bꞌina tinaniꞌ.
Wan Conobꞌ Ma Eyqꞌuey Yu Ebꞌ Israel
27 Jaꞌ xol ebꞌ yicꞌaal Manasés, ma yujte el ebꞌ a Bet-seán, ebꞌ a Taanac, ebꞌ a Dor, ebꞌ a Ibleam cꞌal ebꞌ a Meguido, yetoj cꞌal yaldeail wan conobꞌ tuꞌ. Queytuꞌ jix yun scancan ebꞌ Cananeo caan tituꞌ. 28 Jaꞌ yet jix yiꞌon yip ebꞌ conobꞌ Israel tuꞌ, catuꞌ jix chejle oc ebꞌ Cananeo yin mulnail yu ebꞌ, yutol ma ujtele el ebꞌ.
29 Jacꞌalaꞌ pax ebꞌ yicꞌaal Efraín, ma cꞌal pax ujtele el ebꞌ Cananeo caan bꞌey Guézer tuꞌ, yuxan jaꞌ ebꞌ Cananeo tuꞌ jix caey cꞌal ecꞌ yetoj ebꞌ.
30 Jaꞌ xol ebꞌ yicꞌaal Zabulón, ma ujtele cꞌal pax el ebꞌ, ebꞌ a Quitrón yetoj ebꞌ a Nahalal, yuxan jaꞌ ebꞌ Cananeo jix caey cꞌal can ecꞌ tituꞌ, caw jix chejle oc ebꞌ yin mulnail yu ebꞌ.
31-32 Jacꞌalaꞌ ebꞌ yicꞌaal Aser, ma cꞌal pax ujtele el ebꞌ Cananeo caan bꞌey Aco, bꞌey Sidón, bꞌey Ahlab, bꞌey Aczib, bꞌey Helbá, bꞌey Afec, cꞌal bꞌey Rehob. Jix caey ecꞌ ebꞌ xol ebꞌ tuꞌ, yutol ma ujtele el ebꞌ yu ebꞌ.
33 Jacꞌalaꞌ pax ebꞌ yicꞌaal Neftalí, ma cꞌal pax ujtele el ebꞌ Cananeo caan bꞌey Bet-semes, cꞌal bꞌey Bet-anat, asan xin, caw jix chejle oc ebꞌ yin mulnail yu ebꞌ tituꞌ.
34 Ma chaꞌle oc ebꞌ yicꞌaal Dan yu ebꞌ Amorreo bꞌey txꞌotxꞌ acꞌal-laj, asanne bꞌey txꞌotxꞌ solomlaj wonan jix can ebꞌ. 35 Queytuꞌ jix yun scaey cꞌal can ecꞌ ebꞌ Amorreo tuꞌ bꞌey yich txꞌotxꞌ wonan Heres, bꞌey Aialón, cꞌal bꞌey Saalbim, jaxa wal yet jix yiꞌon yip ebꞌ yicꞌaal José tuꞌ xin, caw jix chejle oc ebꞌ Amorreo tuꞌ yin mulnail yu ebꞌ.
36 Jaꞌ smoonal xꞌotxꞌ ebꞌ Amorreo tuꞌ, chi too tacꞌal bꞌey txꞌotxꞌ wonan yul yet Acrabim, masantaꞌcꞌal chi apni oc bꞌey Selá, catuꞌ chi too cꞌal bꞌey yibꞌan atoj tuꞌ.