Josué sbꞌi jun libro tiꞌ, jix tzꞌibꞌelecan yet abꞌil 1405-1385 a.C.

Jaꞌ naj Josué jix tzꞌibꞌencan yet eyecꞌ naj bꞌey txꞌotxꞌ Canaán.

Jaꞌ yul jun libro tiꞌ tzꞌibꞌebꞌilcan ey skꞌaneal naj Josué, jaꞌton naj ocnaj can sqꞌuexeloj naj Moisés yin yopiso. Jaꞌ jun libro tiꞌ chi yaltej skꞌaneal ebꞌ Israel. Jaꞌ naj Josué tiꞌ jix ijbꞌan ebꞌ yet jix yakꞌon jowal ebꞌ yetoj wan conobꞌ ey yul yet txꞌotxꞌ Canaán.

Jaꞌ bꞌey capítulo 1 masantaꞌ bꞌey capítulo 12, jaꞌ tituꞌ chi yaltej tzet jix yun skꞌaxbꞌo ecꞌtoj ebꞌ Israel yul jaꞌ Jordán, yetoj cꞌal tzet jix yun yeyqꞌuey conobꞌ Jericó, Ai, Hasor yetoj cꞌal wanojxa conobꞌ ey yinlaj tuꞌ.

Jaꞌ bꞌey capítulo 13 masantaꞌ bꞌey capítulo 22, jaꞌ yul wan capítulo tiꞌ chi yaltej tzet jix yun spoꞌon can ecꞌ txꞌotxꞌ Canaán ebꞌ yicꞌaal Israel. Chi yalon pax canoj tzet jix yun sicꞌle el wan conobꞌ bꞌey chi yewbꞌa el sbꞌa ebꞌ chi smakꞌ cam yet animail yin tol man yin oj snaꞌbꞌal chi tita. Chi yalon pax tzet jix yun xeclo can a sconobꞌ ebꞌ Levita, yutol ma ẍaꞌ smajul txꞌotxꞌ ebꞌ.

Jaꞌ bꞌey capítulo 23 yetoj capítulo 24, jaꞌ tituꞌ chi yaltej yu slawubꞌal skꞌane naj Josué yet jix stakꞌele can sbꞌa yetoj ebꞌ yet conobꞌ, yutol icham winajxa naj.

Chi yalon pax tej yet jix syambꞌa oc sbꞌa masanil ebꞌ yicꞌaal Israel bꞌey Siquem, yet jix swaꞌnen pax swa kꞌane Dios yetoj ebꞌ junelxa. Jix skꞌanle naj Josué tet ebꞌ ánima tzet ẍi snaꞌbꞌal ebꞌ. Jix yakꞌon stiꞌ ebꞌ, tol chi yakꞌ servil Jehová ebꞌ. Jaꞌ bꞌey slawubꞌal jun libro tiꞌ, chi yaltej yu scamichal cꞌal tzet jix yun smujle naj Josué, yetoj naj Eleazar, jaꞌton naj yakꞌomal xaambꞌal, scꞌaal naj Aarón.