2 Jaꞌ tinaniꞌ xin, ilaꞌ tuxa jix cam naj jin chejabꞌ Moisés, yuxan jaachxa oj ja wijbꞌa jun conobꞌ tiꞌ. Oj jex ecꞌ cantoj bꞌey yul jaꞌ Jordán tuꞌ, jaꞌ yet oj jex apnoj oc bꞌey sat txꞌotxꞌ txꞌotxꞌ oj wakꞌ ey jex tuꞌ. 3 Jaꞌ masanil txꞌotxꞌ txꞌotxꞌ bꞌey oj jex caey ecꞌoj, je yet oj yun can oc txꞌotxꞌ, jaxca jix yun walon can tet naj Moisés. 4 Masanil txꞌotxꞌ chi too tacꞌal bꞌey cusiltaj txꞌotxꞌ, masantaꞌcꞌal bꞌey txꞌotxꞌ Líbano, chi too tacꞌal bꞌey jaꞌ miman jaꞌ Éufrates, masanil txꞌotxꞌ yet ebꞌ Heteo, masantaꞌcꞌal chi apni oc bꞌey stiꞌ jaꞌ mar Mediterráneo yetcꞌulal bꞌey chi too cꞌu, oj wakꞌ cꞌal txꞌotxꞌ ey jex. 5 Jaꞌ yet iquis jaach ecꞌ bꞌey yul yibꞌankꞌinal tiꞌ, cꞌam cꞌal mactxequel oj stecꞌbꞌa sbꞌa yakꞌon jowal ja wetoj. Yutol ey jin cꞌal ecꞌ ja wetoj, jaxca jix yun weecꞌ yetoj naj Moisés. Cꞌam cꞌal bꞌakꞌin oj jaach jin bꞌejcanoj. 6 Tecꞌan cꞌal cha wute ja bꞌa xin, cꞌam ojabꞌ cꞌal chach xiwi, yutol jaach oj ja poꞌoecꞌ smajul txꞌotxꞌ ebꞌ Israel tiꞌ, jaꞌton txꞌotxꞌ jix wakꞌcan jin tiꞌ wakꞌon tet ebꞌ je yichmam. 7 Jaꞌ tzet chi wal ey jaach, tol cha tecꞌbꞌa ja bꞌa, cꞌam ojabꞌ chach xiwi, catuꞌ cha jijen cꞌal masanil jin ley jix yal can naj jin chejabꞌ Moisés ey jaach. Ta watxꞌ cꞌal chi yun ja jijen masanil, watxꞌ cꞌal oj jaach elocoj. 8 Cꞌam ojabꞌ cꞌal cha bꞌej ja wawten an juun bꞌey tzꞌibꞌebꞌilcan cuybꞌanile tiꞌ, cha naoꞌtane cꞌal yet cꞌualil cꞌal yet akꞌbꞌalil, yet watxꞌ oj skeꞌ ja jijen masanil tzet chi yalaꞌ. Ta oj ja jije cꞌal, watxꞌ cꞌal oj eloc masanil tzet oj ja waꞌne. 9 Jain chi wal ey jaach an, tol cꞌam ojabꞌ chach xiwi, tecꞌan cha wute ja bꞌa, cꞌam ojabꞌ cꞌal cha wakꞌ caabꞌcꞌulal, yutol jain Jehová ja Diosal jin chi wal ey jaach, tol ey jin cꞌal ecꞌ ja wetoj, yal cꞌal bꞌeytuꞌ chach eqꞌui, ẍi Jehová tet naj Josué.

10 Jix lawi tuꞌ xin, jix yalon naj Josué tet ebꞌ syaawil conobꞌ Israel jaxca tiꞌ: 11 Asiꞌwej bꞌey bꞌulan ey masanil ebꞌ conobꞌ, che yalon tet ebꞌ tol chi yakꞌ lista sloꞌbꞌe ebꞌ, yutol jaꞌ yet oxe chi cu ecꞌwejtoj yul jaꞌ Jordán, yet chi cu apni oc bꞌey txꞌotxꞌ txꞌotxꞌ oj yakꞌ Jehová cu Diosal ey jon, ẍi naj Josué tet ebꞌ.

12 Catuꞌ jix yalon cꞌal pax naj tet ebꞌ yicꞌaal Rubén, yetoj cꞌal tet ebꞌ yicꞌaal Gad cꞌal yetoj tet nanxa tujan ebꞌ yicꞌaal Manasés:

13 —Naꞌwejtej masanil tzet jix yal can naj Moisés, naj ẍejabꞌ cu Diosal yet jix yalon ey jex jaxca tiꞌ: Jaꞌ Jehová cu Diosal, jaꞌ oj akꞌon jun txꞌotxꞌ tiꞌ ey jex, yet watxꞌ jaꞌ titiꞌ oj jex caey ecꞌoj. 14 Jaꞌ tinaniꞌ xin, akꞌwej can ebꞌ ix je yistil cꞌal ebꞌ je yuninal cꞌal noꞌ je jobꞌbꞌeal noꞌ bꞌey txꞌotxꞌ jix yakꞌ can naj Moisés ey jex bꞌey skꞌaxepal ecꞌtej jaꞌ Jordán tiꞌ. Jaxa je masanil jaex winaj jex tiꞌ, tol stiempoal je to yin jowal, akꞌwej lista je bꞌa yetoj je mitxꞌkꞌabꞌ, catuꞌ chex bꞌabꞌi sattaj masanil ebꞌ ket conobꞌ tiꞌ, yet watxꞌ chex colwa yetoj ebꞌ, 15 masantaꞌcꞌal oj yakꞌ Jehová jun txꞌotxꞌ bꞌey oj caey ecꞌ ebꞌ tuꞌ, jaxca jix yun yakꞌle can txꞌotxꞌ je yet tiꞌ yu Naj. Jaꞌ yet oj yiꞌon can oc txꞌotxꞌ ebꞌ tuꞌ, catuꞌ oj jex meltzotej bꞌey txꞌotxꞌ je yet bꞌey skꞌaxepal ecꞌtej jaꞌ Jordán tiꞌ, yetcꞌulal bꞌey chi aol cꞌu, yet che yiꞌon can oc txꞌotxꞌ yin junelne, jaꞌton txꞌotxꞌ jix yakꞌ can naj Moisés ey jex, ẍi naj Josué tet ebꞌ.

16 Catuꞌ jix takꞌwi ebꞌ conobꞌ tet naj Josué jaxca tiꞌ:

—Jaꞌ tzet cha wal ey jon tiꞌ, oj cu jije jon, yal cꞌal bꞌeytuꞌ oj jon ja chejtoj, oj cu toj cꞌal jon. 17 Oj cu jije cꞌal tzet oj ja walaꞌ, jaxca cꞌal jix yun cu jijen tet naj Moisés. Asan xin, chi koche tol chi oc cꞌal Jehová ja wetoj jaxca jix yun scolwa yetoj naj Moisés. 18 Yal cꞌal mactxequel man oj jijenoj ma oj sten tzet cha walaꞌ, tol ojabꞌ chi cami. Asan jun chi yoche cu cꞌul tol cha tecꞌbꞌa ja bꞌa, cꞌam ojabꞌ chach xiwi, ẍi ebꞌ tet naj Josué.