Jix too ebꞌ naj xin, jaꞌ bꞌey sna jun ix amul ix chi yij sbꞌi Rahab, jatuꞌ jix apni oc ebꞌ naj skꞌan sposada, jix eecꞌ ebꞌ naj jun akꞌbꞌal bꞌey conobꞌ Jericó. 2 Jaꞌ yet tuꞌ, ey ebꞌ ánima jix ilon yapni oc ebꞌ naj, yuxan jix bꞌet ebꞌ yal tet naj sreyal conobꞌ Jericó jaxca tiꞌ:

—Ey wal wan ebꞌ naj a Israel jix jul yul cu conobꞌ tiꞌ yet chi jul yilontoj ebꞌ naj tzet yili cu conobꞌ tiꞌ, ẍi ebꞌ tet naj rey tuꞌ.

3 Yu cꞌal jun tuꞌ xin, jix yaontoj kꞌane naj rey tet ix Rahab jaxca tiꞌ:

—Iꞌeltej ebꞌ naj a Israel eyecꞌ yin posadail bꞌey ja na tuꞌ, aoc ebꞌ naj yul cu kꞌabꞌ jon, yutol tucꞌal chi jul yiltoj ebꞌ tzet yili yul cu conobꞌ tiꞌ, ẍi toj naj rey tuꞌ.

4 Yutol jix ewbꞌale el ebꞌ naj yu ix, yuxan jix yalon ix jaxca tiꞌ:

—Yel toni, ey wan ebꞌ naj winaj jix ecꞌ titiꞌ, asan xin, caw man wotaj oj bꞌeytuꞌ jix kakꞌ stitoc ebꞌ naj. 5 Jaꞌ yet jix kꞌejbꞌi eyoj, jix too ebꞌ naj, yutol jaꞌ yet jun horail tuꞌ chi majican spuertail conobꞌ. Man wotaj oj tzet bꞌeal bꞌey jix kaꞌ stoo ebꞌ naj. Ta yin eymanil chex too tzajan yintaj ebꞌ, tejan chi to michꞌcha ebꞌ naj je yu tinaniꞌ, ẍi ix ix tuꞌ tet ebꞌ.

6 Quey cꞌal tuꞌ jix yun yalon ix, yutol jix chejle atoj ebꞌ naj a Israel tuꞌ yu ix bꞌey yibꞌan spananil sna, catuꞌ jix ewbꞌale el ebꞌ naj yu ix bꞌey xol wan lino kꞌalbꞌil ey yin stopanil, yutol jaꞌ tituꞌ chi taj an.

7 Jal ebꞌ ẍejabꞌ naj rey tuꞌ jix too tzajan ebꞌ naj yintaj ebꞌ, masantaꞌcꞌal jix apni oc ebꞌ bꞌey chi ẍaꞌle sbꞌa jaꞌ Jordán; jix cꞌal wal elcantoj ebꞌ naj soldado tuꞌ, catuꞌ jix majican spuertail conobꞌ Jericó. 8 Jaꞌ yet cꞌamto chi weya ebꞌ naj cawan ilwawom tuꞌ, jix atoj ix Rahab scꞌatan ebꞌ naj, catuꞌ jix yalon ix tet ebꞌ jaxca tiꞌ:

9 —Wotaj an tol jaꞌ Jehová jix akꞌon jun txꞌotxꞌ tiꞌ ey jex, yuxan caw ey jun miman xiwcꞌulal kibꞌan titiꞌ jon, yuxan jaꞌ yet chi kabꞌen je kꞌumal caw chi cu xiwa cu masanil jon. 10 Jix kabꞌ skꞌumal yet jix jex eltej bꞌey txꞌotxꞌ Egipto, tol jaꞌ Jehová jix poꞌon ey snan jaꞌ Cajin Mar, catuꞌ jix jex bꞌeyecꞌtej yin tajinal. Jix kabꞌen cꞌal pax skꞌumal tol jix je qꞌueycan el cawan sreyal ebꞌ Amorreo yetoj masanil ebꞌ sconobꞌ, bꞌey skꞌaxepal ecꞌtoj jaꞌ Jordán, jaꞌton naj Sihón cꞌal naj Og. 11 Caw chi cu xiwa yet jix kabꞌen je kꞌumal tuꞌ. Tumi ey junoj chi skeꞌ stecꞌbꞌan sbꞌa je sattaj, yutol jaꞌ Jehová je Diosal, jaꞌton sDiosal satcan, sDiosal cꞌal pax txꞌotxꞌ txꞌotxꞌ tiꞌ. 12 Yu tuꞌ xin, chin oc tean je yin, tol jin sattaj wal che yakꞌon can je tiꞌ sattaj Jehová je Diosal, tol chin je naꞌtej yetoj ebꞌ wican, jaxca wal chi yun jex jin colon el tinaniꞌ, jaxca ojabꞌ pax tuꞌ oj yun je colon el ebꞌ wican. Yuxan akꞌwej can je tiꞌ ey jin, ta tol yel che yalaꞌ. 13 Che colon pax el ebꞌ jin mam jin txutx, cꞌal masanil ebꞌ naj jin no, ebꞌ ix jin no yetoj cꞌal masanil tzet ey tet ebꞌ, cꞌam ojabꞌ che qꞌueyel ebꞌ, ẍi ix tet ebꞌ.

14 Catuꞌ jix takꞌwi ebꞌ naj cawan tuꞌ tet ix jaxca tiꞌ:

—Chi kakꞌ cu tiꞌ ey jaach tol oj jex cu naꞌtej jon; asantane cꞌam bꞌey cha wal ecꞌoj. Jaꞌ yet oj yakꞌon Jehová jun txꞌotxꞌ tiꞌ yul cu kꞌabꞌ jon, oj jaach cu colcan eloj, ẍi ebꞌ naj tet ix.

15 Jaꞌ ix Rahab tuꞌ, jatuꞌ eyatoj sna ix yibꞌan smuroal conobꞌ tuꞌ, yuxan yin cꞌuancꞌulal jix yun yeytej tꞌununoj ebꞌ naj yu ix yin jun txꞌan bꞌey swentanail sna yin conobꞌ tuꞌ. 16 Jaꞌ yet cꞌamto chi eytej ebꞌ, jix yalon ix tet ebꞌ naj jaxca tiꞌ:

—Asiꞌwej bꞌey sjolomlaj wonan yet watxꞌ cꞌam chex ilcha yu ebꞌ naj chex seyon ecꞌ tuꞌ, chex cancan oxebꞌoj cꞌual tituꞌ, masantaꞌcꞌal chi jul ebꞌ naj chex seyon ecꞌ tuꞌ, catuꞌ chex pax toj bꞌey ey jex ecꞌ tuꞌ, ẍi ix tet ebꞌ naj ilwawom tuꞌ.

17 Jaꞌ yet eyto ecꞌ ebꞌ naj tituꞌ jix yalon can ebꞌ naj tet ix jaxca tiꞌ:

—Sowalil oj kakꞌ eloc bꞌey jix kakꞌ can cu tiꞌ ey jaach. 18 Jaꞌ yet oj jul kakꞌon jowal bꞌey ja conobꞌ tiꞌ, catuꞌ cha locbꞌan eytoj junoj cajin lasu bꞌey swentanail ja na bꞌey oj cu eytoj tꞌununoj tiꞌ jon, catuꞌ cha yambꞌan oc ja bꞌa yetoj ja mam, cꞌal ja txutx, yetoj ebꞌ ja no cꞌal ebꞌ ja wican bꞌey yul ja na tiꞌ. 19 Ta ey junoj chi eltoj bꞌey yul ja na tiꞌ yet oj oc jun jowal tuꞌ, ta chi cam jun tuꞌ, cꞌam chi oc cu penailoj jon; asan ta tol jaꞌ bꞌey yul ja na tiꞌ eyoctoj, catuꞌ chi low cu kꞌabꞌ yin jon, jaꞌ jun tuꞌ chi oc cu penailoj jon. 20 Yetoj cꞌal pax oj ta tol oj ja walel jun tzet chi jul kun tiꞌ jon, manxa oj kakꞌ eloc bꞌey chi kakꞌ can cu tiꞌ ey jaach, ẍi ebꞌ naj tet ix.

21 —Chi ẍaꞌ jin cꞌul jaxca je yalon tuꞌ, ẍi ix tet ebꞌ naj.

Jix lawi tuꞌ, jix yalon too sbꞌa ebꞌ naj tet ix, catuꞌ jix skꞌalon can oc ix jun cajin txꞌan bꞌey swentanail sna tuꞌ.

22 Catuꞌ jix too ebꞌ naj cawan ilwawom tuꞌ bꞌey sjolomlaj wonan yu stoo yewbꞌan el sbꞌa ebꞌ yin oxebꞌ cꞌual. Jix ecꞌ cꞌal ebꞌ naj soldado tuꞌ seyon ecꞌ ebꞌ, ma cꞌaltaꞌ ilcha oc ebꞌ naj yu ebꞌ, catuꞌ jix pax tej ebꞌ bꞌey conobꞌ Jericó. 23 Jix lawi tuꞌ xin, jix meltzo eytej ebꞌ naj cawan ilwawom tuꞌ, catuꞌ jix kꞌaxbꞌo ecꞌtoj ebꞌ bꞌey jaꞌ Jordán tuꞌ, jix apni oc ebꞌ bꞌey eyecꞌ naj Josué, jix kꞌoli yalon ebꞌ tet naj tzet jix bꞌet yilecꞌ ebꞌ naj tituꞌ. 24 Jix yalon ebꞌ naj jaxca tiꞌ: Jaꞌ Jehová oj akꞌon jun txꞌotxꞌ tuꞌ ey jonwej, akꞌbꞌil xa oc ebꞌ ánima tuꞌ yul cu kꞌabꞌ. Caw xiwcꞌulal xacꞌal ye spixan masanil ebꞌ ánima tuꞌ, ẍi ebꞌ tet naj Josué.